Abertura Ba Preparasaun ! Sarani 1.000 Sei Sai Voluntáriu Permanente Ba Uma Kreda

Imajem : Voluntariadu Selesionadu 1.000 ne’ebe partisipa serimonia abertura ba preparasaun simu vizitasaun Amu Papa Francisco. Salaun DIT,29/06/2024. Foto : Marciana da Conceição

SAPNewsTL, Díli – Dom Virgílio Cardeal do Carmo da Silva hala’o abertura ofisial ba ekipa voluntáriu hamutuk rihun ida (1000) ne’ebe prepara atu simu Sua Santidade Papa Fransisco Iha fulan Setembru tinan ne’e.

Bispu Dom Virgilio Cardeal do Carmo da Silva fo agradese ba sarani sira hotu liu-liu ba joven sira ne’ebé iha prontidaun no disponibilidade rejistu ba voluntariadu hamutuk rihun ida (1000), hodi halo preparasaun ba vizitasaun Sua Santidade Papa Fransisco mai Timor iha loron 9-11 fulan Setenbru tinan ne’e.

“Lori Igreja lokal, konferensia episkopal no Bispu husi Dioseze tolu nia naran, agradese tebes ba sarani sira hotu liu-liu ba joven sira nia prontidaun ho disponibilidade ne’ebé rezistu ba voluntariadu rihun ida (1000) hodi halo preparasaun ba vizitasaun Sua Santidade Papa Fransisco ne’ebé sei mai Timor-Leste iha loron 9-11 Fulan Setembru”.

“Sua Santidade Papa Fransisco nia vizitasaun mai Timor, atu kompleta mos idade ba 89, maske ita haree fizikamente ho idade ne’ebé boot, maibé Papa Fransisco iha fuan bot ho vontade atu mai vizita ita nia rai doben Timor-Leste”, dehan Bispo Dom Virgilio Cardeal do Carmo da Silva liu husi nia diskursu, iha salaun Díli Institutu of Teknologi (DIT), Sabadu (29/06/2024).

Amu Bispo Dom Virgilio Cardeal hatutan, vizitasaun Amu Papa laos de’it mai hanesan Igreza Katólika nia ulun, maibé mai hanesan mos Xefe Estadu Vatikanu.

“Iha loron sia (9) tuku rua (2) Amu Papa to’o iha Timor serimonia simples hodi simu Amu Papa, hafoin tuku neen (6) loraik sei iha aktividade ofisial Estadu nian iha Palasiu Prezidensial, tanba vizitasaun Amu Papa laos deit hanesan Igreza nia ulun, maibé mai hanesan Xefe Estadu Vaticano”. Bispo Cardeal akresenta.

Amu Bispo Cardeal salienta, vizita Xefe Estadu Vatikanu iha Palasio Prezidensial sei halo enkontru ofisial ho Prezidente Republika Jose Ramos Horta, no Primeiru Ministru Vaticano Emenensia Kardeal Pietro Parolin sei halo vizitasaun ho Na’i Primeiru Ministru Kay Rala Xanana Gusmão iha Palasio Governu, hafoin remata enkontru Amu Papa sei halo diskursu ofisial ba Nasaun Timor, Autoridade politiku no ba ema hotu.

“Iha vizita estadu iha palasiu prezidensial sei iha enkontru ofisial hamutuk ho Prezidente Republika, no Primeiru Ministru Vaticano nian Emenensia Kardeal Parolin sei halo vizita ho ita nia Primeiru Ministru Kay Rala Xanana Gusmão, simultaneamente iha Palasiu, depois de enkontru Amu Papa sei halo diskursu ofisial ba Nasaun Timor, autoridade politiku, no ba ema hotu ne’ebé sei konvida husi Prezidente Republika husi kategoria oi-oin hodi partisipa enkontru ne’e iha loron primeiru Amu Papa nia vizitasaun durante oras ida (1) nia laran”. Hateten Amu Bispo Cardeal.

Imajem : Dom Virgílio Cardeal do Carmo da Silva

Amu Bispo informa, iha loron daruak 10 fulan fevereiru, Amu Papa sei hala’o enkontru ho Bispos, Padres Relijiozus, Seminaristas, no katekistas Iha Igreza katedral, antes halo enkontru refere Amu Papa sei vizita Kongregasaun Alma, ikus sei vizita mos padre Zejiutas hamutuk tolunulu resin-hitu (37), ne’ebé hein Amu Papa iha Motael.

“Iha loron daruak 10 fulan fevereiru, iha aktividade tolu, tuku sanulu dader sei enkontru ho Bispus, Padres Relijiozus, seminaristas no katekistas iha Katedral, maibe molok to’o iha katedral amu Papa sei liu hosi kongregasaun Alma iha ne’ebé Madre sira tau matan de’it ba labarik sira ho defisiente oi-oin, sira sei reprezenta defisiensia hotu iha Timor laran tomak, hafoin ba katedral hodi hala’o enkontru ho uma kreda nia ema, hafoin remata enkontru, iha tuku sanulu resin-ida to’o tuku sanulu resin-rua Amu Papa sei vizita nia maluk padres jezuitas sira hamutuk tolu nulu resin-hitu (37) ne’ebé sei Hein Amu Papa iha nia nunsiatura iha Motael”. Amu Bispo Dom Virgilio Cardeal esklarese.

“Iha tuku haat loraik bainhira sarani sira prepara hotu ona iha Tasi-Tolu Amu Papa sai husi nunsiatura hodi vizita sarani Timor iha ne’ebá, sarani hotu-hotu halibur hamutuk, no tuir lisan Timor sei simu ofisial dala ida tan hafoin hahu hala’o misa”, hatutan Amu Bispo Cardeal.

Bisku Dom Virgilio Cardeal mos hateten, Bispo konferensia episkopal deside hodi orienta Parokia hotu-hotu atu rekruta Ministru extraordinarius, rekruta leigus kada Parokia ema hamutuk nain haat nulu (40), hodi hamutuk ho madre no Relijiozus hodi prepara ema rihun haat (4.000) sai distribuidores komiñau.

“Bispo Konferensia Psikopal deside ona hodi orienta Parokia hotu-hotu atu rekruta Ministru estraordinarius, katak rekruta leigus husi kada Parokia hamutuk ema nain haat nulu (40), hodi hamutuk ho madre no Relijiozus sira hodi prepara maiz ou menus rihun haat (4000) distribuidores komiñau, ita nia planu previstu ema ida bele fahe komiñau ba sarani hamutuk atus ida (100) ka atus ida lima-nulu (150), atu labele dada oras naruk tanba amu papa hakarak misa ne’e to’o oras ida ho balun remata ona”.

Bispo Dom Virgilio Cardeal hateten, iha 11 fulan fevereiru loron ikus Amu Papa Fransisco iha Timor, antes atu halo viajen ba Nasaun Singapore sei ba vizita Centru Convenção de Díli (sigla Portugés, CCD), ne’ebé sei hasoru reprezentante joven rihun rua rein ho kategoria oi-oin iha oras ida (1) nia laran.

“Iha loron dahikus 11 fulan fevreiru dader tuku sia (9), Amu Papa mos sei vizita CCD, ne’ebé sei iha reprezentante juventude rihun rua resin ho kategoria oi-oin iha oras ida (1) nia laran, hafoin vizita juventude sira Amu Papa ba direta iha Kampu Aviasaun, no sei iha seremonia ofisial despedida nian hafoin Amu Papa kontinua hala’o viazen ba Nasaun Singapura”. Hateten Amu Bispu Cardeal.

Entretantu, Durante hala’o preparasaun ba vizitasaun Sua Santidade Papa Fransisco ne’ebé sei mai Timor-Leste, iha ekipa rua ne’ebé servisu hanesan ekipa Igreza ne’ebé sei haree liu kona-ba misa nian, no ekipa Governu ne’ebé responsavel ba parte logístiku nian.

Iha fatin hanesan, Vise Koordenador Servisu Voluntáriu Bruder Nico Lay haktuir voluntáriu ne’e mai husi inisiativu uma kreda nian hodi prepara no simu vizitasaun Amu Papa Francisco nian.

“Parabens ba belun, maun alin no sarani sira hotu ne’ebe eskollidu hodi sai voluntáriu servisu simu Amu Papa Francisco, ekipa rejistu 3.000 maibe ekipa servisu ho dedikasaun no paixaun hodi hili 1.000 hodi servisu voluntáriu”.hateten Vise Koordenador Nico Lay

“Obrigadu ba imi ne’ebe hatan sim, imi simu dala ida amu papa iha moris tomak, ami sei koloka imi ba grupu sira hodi hala’o servisu durante loron tolu iha fulan setembru liu husi formasaun ispiritual, karater umanu no servi maluk sira, voluntariu ida ne’e sei permanente no forsa ba uma kreda”. Nia informa

Jornalista : Marciana da Conceição & Ermelinda Soares