Governu Hapara Bolsa Hakbi’it ! Maubere Oan Lakon Esperansa

Imajem : Benefisiariu Bolsa Hakbi’it, Estudante Universidade Catolica Timorense (UCT) hala’o komunikadu imprensa kontra governu liu husi FDCH ne’ebe revoga bolsa integral ba bolsa hakbi’it. Kampus UCT. 01/07/2024

SAPNewsTL, Díli – Estudante Benefisiariu Bolsa Hakbit, Universidade Catolica Timorense  (Sigla Portugues, UCT) ejize ba Governu liu hosi Fundu Dezenvolvimentu Kapital Humanu (FDCH), hodi labele transforma bolsa hakbi’it ba bolsa parsial tanba fo impaktu ba sira nia nesesidade (kustu de vida) no depresaun ba estudante sira atu la kontinua estudu iha ensinu superior.

Portavos Bolseiru Bolsa Integral, Estudante Catolica Timorense  (Sigla Portugues, UCT) Jose da Costa   haktuir estudante UCT deside la asina kontratu bolsa hakbit tanba governu muda ba bolsa parsial.

“Governu liu hosi Fundo Dezenvolvimento  Kapital Humano (FDCH) atu halo mudansa ba  bolsa hakbit  atu ba fali bolsa parserial  tanba ne’e ohin loron determinadu husi FDCH  iha kontratu foun ne’ebé maka atu  atribui ba ami estudante sira hodi hili fali bolsa parsial, tanba ne’e FDCH, ohin fó kontratu maibe estudante UCT la konsege asina”. Dehan portavos Jose da Costa  iha resintu UCT,segunda (01/07/2024).

Jose da Costa akresenta, karik desizaun ne’e muda duni, kbi’it laek nia oan laiha ona esperansa hodi kontinua sira nia estudu, estudante UCT nafatin ejize hodi hasoru desizaun tanba ne’e direitu sidadaun hodi asesu ba edukasaun.

“Karik dezisaun ne’e muda duni, ami kbi’it laek nia oan laiha esperansa  atu kontinua estudu ba oin tanba ami povu maubere,  povu ain tanan nia oan, ami nafatin ezize para hasoru  dezisaun ne’e tanba ne’e ami nia direitu no  governu liu husi  FDCH  sira viola  ami nia direitu  baziku ne’ebé hakarak  atu asesu edukasaun, tanba ne’e mak  kontinua eziji hodi foti alternativa  no dezisaun ida ne’ebé di’ak”. Jose da Costa

Jose hateten, ohin loron dahuluk ba sira hodi asina kontratu maibé tanba hasoru hela problema barak ho razaun ne’e estudante Katolika Timorense organiza malu hodi la asina kontratu refere, antes ne’e sira la halo dialogu FDCH relasiona ho kontratu refere.

“Ohin ne’e loron dahuluk ba asina kontratu foun maibé la asina tanba ami hasoru poblema barak ho razaun  ami husi estudanre katolika timorense organiza malu la asina kontratu refere neebé antes ne ami nunka hatene tanba antes ne’e, ami la halo dialogu hamutuk FDCH, tanba ne’e ami la konkorda  atu asina bolsa parsial nian derepente deit iha pagina  FDCH nian  katak sei revoga ou muda ba bolsa hakbit”.

“Ami estudante kbi’it la’ek depende liu ba bolsa hakbit  maibe daudaun ne’e sira hapara tanba ne’e kolega barak mak la selu ona kos  tama fulan 6 to’o fulan 8, balun kos na’in atu  duni sai husi kos,  karik dezisaun ne’e maka sira nafatin mantein ami kontra”. Hakotu Jose da Costa.

Imajem : Estudante Institutu Profisional Canossa Luciana Marques Mendes iha Jardim 5 Maiu, loron 26/06/2024

Antes ne’e, Estudante Institutu Profisional Canossa Luciana Marques Mendes, depende ba bolsa  hakbi’it tanba nia familia laiha kbi’it atu selu nia eskola hodi kontinua estudu iha ensinu superior to’o remata.

Luciana hateten fatin ne’ebé daudaun nia hela ba, laos nia uma rasik, maibe kos no uma nain ne’e duni sai tanba la selu durante fulan ualu (8).

“Fatin ne’ebé ha’u hela atu hala’o prosesu aprendizajen, laos uma rasik maibé José nian no ha’u kos, maibe nia duni sai tanba ho razaun fatin ne’e fulan walu ona la selu”.

Luciana mos konta, nia depende deit ba bolsa hakbi’it tanba familia laiha kbi’it atu sustenta nia moris, no selu nia eskola durante hala’o prosesu aprendizajem iha sidade Dili.

Imajen : Angelita Saldanha

Iha sorin seluk, Estudante Universidade Dili (UNDIL) Angelita Saldanha hatene, nia rasik ko’alia mós kos durante fulan neen (6) nian seidauk selu tanba iha tersa (25/06/2024) kos nain obriga haruka selu kos.

“Mai ha’u rasik ko’alia ba kos nain hanesan ne’e tenke haraik an husu sira dehan ami laos promete maibé ida ne’e hanesan uluk ami kontratu los tiha ona, ami dehan ba sira ajuda lai ami hela netik fulan ida, ami husu haraik an ida ne’ebe iha los sira nia ain okos, ami sira kbiit laek inan aman laiha ne’e atu ba husu osan ba se, ami eskola pois ami buka tan osan ne’e bele fó presaun mai ami ba buka osan ba eskola ne’e ami fahe tempu la to’o”. Hateten Angelita.

Angelita mos hateten, bolsa integral ka hakbi’it ajuda tebes sira kbi’it laek nia oan hodi asesu ba hala’o estudu iha ensinu superior, no hela iha kapital Díli no munisipiu iha nesesidade barak ne’ebé sira presija.

“Bolsa integrál ka hakbi’it, tulun tebes ami kbi’it la’ek nia oan sira hodi bele asesu ba ensinu superiór iha rai laran, tanba hanesan ita hatene, estudu iha kapitál hanesan Dili no munisipiu, la’os deit selu eskola, maibé mós presiza sosa ai-han, selu kós, selu bemo, sosa livru, pulsa internet, print, fotokópia no nesesidade sira seluk ne’ebé bele fasilita estudu estudante kbi’it la’ek nian ho di’ak bazeia ba kontratu nebé iha”. Hakotu Angelita.

Estudante husi Universidade sanulu resin-neen (16) ho total estudante hamutuk 3.030, ne’e rekomenda ba reprezentante povu iha Parlamentu Nasional liu husi komisaun Governu neʼebé trata asuntu edukasaun atu levanta problema ida ne’e iha Parlamentu ho seriedade.

Relasiona ho preokupasaun refere, SAPNews tenta halo komfirmasaun ho parte Fundu Dezenvolvimentu Kapitál Humanu (FDCH) maibe seidauk iha resposta kona ba asuntu refere.

Tuir informasaun ne’ebe SAPNews asesu katak se IX Governu la rezolve ho diak hodi mantein desizaun maka estudante hamutuk 3.030 sei halo asaun pasífiku hasoru nonu governu konstitusional tanba konsidera hamate sira nia futuru liu husi hapara bolsa hakbiit ne’ebe antes ne’e VIII Governu fo kontratu ba sira.

Jornalista : Marciana Fernandes & Ermelinda Soares