Dário Kestiona Emisaun Kona-Ba Sertidaun RDTL No BI Ba Subsídiu Idozu Sira  

SAPNewsTL, Dili: Deputadu Bankda Fretilin Dário Madeira kestiona kona ba emisaun ba Sertidaun RDTL no Bilhete Identidade(BI) ne’ebe liga ho idozu sira tanba iha ema barak tinan tama ba idozu nian atu simu osan, maibé sira la iha sertidaun RDTL no Bilhete Identidade (BI) agora difikulta hela sira labele simu sira nia direitu

Nia dehan, sira-nia naran mos Xefi Suku no Xefi Aldeia aprezenta beibeik ona maibé la iha nafatin iha lista benefisiáriu, tanba ne’e Nia rekomenda ba governu karik bele emisaun ba sertidaun RDTL ho Bilhete identidade (BI) ne’e tenke ba to’o iha postu, para suku sira ne’e bele asesu hotu iha nivél postu deit.

“Tanba kondisaun estrada territóriu tomak ne’e la permiti ba ita-nia inan aman sira ne’ebé idade avansadu ona ho defisiente sira ne’e transporta mai iha Munisípiu ne’e difisíl tebes, tanba ne’e di’ak liu governu mak besik sira para sira bele asesu ba sertidaun RDTL ho Bilhete identidade (BI) ne’e”. tenik Deputadu Bankda Fretilin Dário Madeiraiha Uma Fukun PN, Dili, 19/07/2022

Nia hatutan, kona-bá Bilhete Identidade (BI) ne’e seidauk iha preokupasaun tanba BI ne’e periode mai tan mak foin bele presiza BI, maibé konforme deklarasaun governu nian, mais ida agora sertidaun RDTL mós sira atu asesu ne’e difisíl, la’ós ba idozu deit maibe estudante sira mós atu asesu sertidaun RDTL difisíl la halimar, tanba ne’e presiza tebes governu nia prezensa iha nivél Postu nian para bele fasilita liu komunidade para sira bele hetan sertidaun RDTL ho Bilhete Identidade.

Iha parte seluk mós Deputadu Bankda Fretilin Dário Madeira ko’alia kona-bá agrikultura ninian, liu-liu iha Munisipiu Viqueque Postu Administrativu Watulari, agora kuaze tinan neen (6) ona, komunidade la iha apoiu tratór halo sira nia servisu hanesan to’os na’in, to’o agora tratór la tama tiha ona

“Foin daudauk fin de semana komunidade hato’o nafatinsira nia lamentasaun, agora tempu atu tama bailoron presiza halo preparasaun ba tinan oin ninian, tanba ne’e sira husu governu para bele desloka ou destaka tratór ruma baPostu Watulari nian liu-liu iha suku Macadiki ho Matawei, rai luan tebes no rai bokur maibe to’o agora la iha tratór ruma ne’ebé fasilita sira”. Tenik nia

Iha parte ida mos deputadu Dário foti kestaunkona-ba inundasaun ne’ebé akontese iha dia 04 de Abril 2021 nian, ne’e realidade ida ne’ebé akontese iha postu Cristo Rei, iha inundasaun ne’e uma-kain haat ka lima ne’ebé rai taka hotu tiha sira-nia uma, sira hela deit iha Eskola Ensinu Báziku Cristo Rei.

“Iha momentu akontesimentu ne’e governu ba fó han sira kuaze fulan ida, estudante sira atu tama eskola fali haruka sira ses husi fatin ne’eba, to’o iha semana ida liu ba governu komesa ba halo atendimentu ona, fahe kalen, fó osan para bele halo fila falsira nia uma, maibé uma-kain haat ka lima ida ne’ebé mak momentu hela iha eskola ne’e ninia naran la iha lista, sira la hetan, ema sira ne’ebé la refuzia ba uma eskola ne’e, sira ne’e mak hetan faapoiu”. Nia hakotu.    

Jornalista : Eduardo Moniz