Papa Francisco Hadomi Timor-Leste & Hakfodak Ho Singapura

Imajem : Santu Padre Papa Francisco Iha Timor-Leste

SAPNewsTL, Vatikanu : Expressaun Santu Padre Papa Francisco durante vizita iha oseania katak Papa Francisco Hadomi Timor-Leste, Hakfodak Ho Singapura, Satisfeitu Ho Indonézia no Impresionadu ho Papua Nova Guiné.

Tuir informasaun ne’ebé SAPNews asesu liu hosi Média Vatican News (14/09/2024) haktuir katak Papa Francisco Hadomi Timor-Leste, Hakfodak Ho Singapura, Satisfeitu Ho Indonézia no Impresionadu ho Papua Nova Guiné.

Sentimentu hirak ne’e Santu Padre fo sai ba jornalista sira ne’ebé akompanha Papa Francisco durante nia vizita iha Viajen Apostólika Internasionál ba dala 45⁰ ne’e.

Iha konferénsia imprensa ne’ebé nia fó ba jornalista sira ne’ebé akompaña nia iha peregrinasaun ne’e, Papa Francisco destaka aspetu sira husi etapa ida-idak.

Ba povu Singapura, Santu Padre hateten, nia la espera saida mak Singapura iha, nasaun ne’ebé dezenvolvidu tebes, ema moos, edukadu, sidade tebes no edifisiu boot barak, inklui iha kultura inter-relijiaun ne’ebé di’ak tebes.

“Ha’u la espera atu hetan Singapura hanesan ne’e. Sira bolu ida-ne’e Nova Iorke Leste nian, nasaun dezenvolvidu ida, ema moos, edukadu, sidade, edifísiu boot sira. Aleinde ne’e, ida-ne’e iha kultura inter-relijiaun ne’ebé di’ak tebes.” Nia dehan

Ba Timor-Leste, Santu Padre dehan nia laran monu ba povu Timor-Leste, povu ne’ebé simples, familiar no ksolok tebes. Bainhira ko’alia kona ba Lafaek, Papa Francisco sita kona ba ideia oioin ne’ebé mai hosi liur hodi estraga sira nia armonia no kultura moris nian.

“Timor-Leste iha kultura ne’ebé simples, familiar no ksolok sai kultura moris nian, Sira iha oan barak, foinsa’e barak. No bainhira ha’u ko’alia kona-ba lafaek sira, ha’u ko’alia kona-ba ideia sira ne’ebé bele mai hosi li’ur hodi estraga armonia ida-ne’e ne’ebé povu iha. No ha’u sei hatete tan buat ida: ha’u nia domin monu ba Timor-Leste, hadomi Povu Timor-Leste.” Papa Francisco deklara

Kona ba Papua Nova Guiné, Xefe Estadu Vatikanu ne’e sublinha Papua Nova Guiné país ne’ebé forte iha dezenvolvimentu, dezenvolvimentu iha arte ne’ebé desenvolve tebes.

“Ha’u gosta Papua Nova Guiné no haree nasaun ida ne’ebé maka forte iha dezenvolvimentu. Hafoin, ha’u hakarak bá Vanimo hodi hasoru grupu padre no madre sira husi Arjentina ne’ebé serbisu iha ne’ebá no ha’u haree organizasaun ne’ebé di’ak tebes. Iha nasaun hotu-hotu, arte dezenvolve tebes: dansa sira, espresaun poétika sira seluk… Maibé iha Papua Nova Guiné no Vanimo dezenvolvimentu arte nian impresionante. Ida-ne’e impresiona tebes ha’u.”

Ligadu ba Nasaun Indonésia, Santu Padre kontente tebes vizita Indonésia, país ne’ebé furak tebes, maibé presiza reforsa relasaun sosial sira iha nasaun refere.

“Indonézia hanesan nasaun ida ne’ebé sei dezenvolve hela, no buat ida ne’ebé karik presiza atu dezenvolve mak relasaun sosiál sira. Ha’u kontente tebes ho ha’u nia vizita ba nasaun ne’e. Furak tebes!”

Tópiku sira seluk iha konferénsia imprensa maka funu iha Gaza no situasaun dramátiku iha Terra Santa. Pergunta ida ko’alia kona-ba tópiku eleisaun Amerikanu nian no difikuldade atu hili ema Katóliku ida. Pontífise uza liafuan sira abertura nian kona-ba Xina, hodi define ida-ne’e nu’udar “promesa ida no esperansa ida ba Kreda”.

Ko’alia mós kona-ba kastigu mate nian, abuzu hasoru menór sira, situasaun iha Venezuela no posibilidade viajen ida ba Arjentina, ho parajen ida iha illa Kanáriu sira.

“Ha’u hakarak bá, ne’e ha’u nia ema sira, maibé seidauk deside”.haktuir Papa Francisco

Fo hanoin fali katak, Papa Francisco konklui ona ninia visita ba Ázia no Oseánia nian, orseik fila hikas ona husi Nasaun Singapura ba Vatikanu.

Jornalista : Marciana Da Conceição & Conzita Mota