JRX Oho Ema Na’in 2 Dala 1, Família Husu Fo Sansaun Todan
Imajem : Maktoban Berta Soares ne’ebé hetan oho hosi inisial JRX Iha Bekora, no halo autopsia iha HNGV Bidau, 21/10/2024
SAPNewsTL, Dili : Inisial JRX oho inan feton, fen Berta Soares ho kondisaun grávida ka isin rua iha Suku Bekora, Postu Administrativu Kristu Rei, Munisípiu Dili.
Tuir entrevista ho representa família, Rogito Guterres haktuir katak inan feton Berta Soares hetan oho husi laen rasik iha oras tuku 01:00 madrugada tanba deskonfia malu no hirus malu.
“Tuir informasaun ne’ebé ami asesu katak nia laen oho iha oras 1:00 madrugada, ami sente triste tebes tanba oho ema na’in rua dala ida, Matebean isin rua fulan ualu ona, falta fulan ida atu partus mak nia laen oho ho kanek hamutuk 25”. Tenik Representante família Rogito ba SAP News TL Iha Hospitál Nasionál Guido Valadares (HNGV) Bidau Dili, 21/10/2024
Rogito lamenta no husu ba ministériu públiku atu prosesa tuir lei no fo sansaun tuir aktus ne’ebé nia halo hodi halakon ema na’in rua nia vida iha tempu hanesan.
Representante Família Rogito Guterres
“Ami husu ba parte justisa atu bele fo sansaun ne’ebe todan tuir nia aktu, ami mós husu ba mídia sira hodi ativu akompanha ba kazu ne’e to’o hetan nia prosesu final”. Nia husu
Inan feton Berta Soares sofre kanek hamutuk ruanulu resin lima (25) tanba hetan taa no sona husi nia laen iha loron 20 Fulan Outubru 2024 (01:00 oras madrugada).
Oras ne’e daudaun Matebian hetan ona autopsia hosi Polísia FORENSIK no parte ospitál ona entrega ba família no lori ba rai-moris fatin Postu Administrativu Uatulari, Munisípiu Viqueque hodi halot ba nia deskansa fatin ikus.
Tuir observasaun SAPNews iha HNGV nota katak labarik refere hasai ona hosi inan nia kabun ne’ebé tau ona iha kaisaun ketak, no inan tau iha kaisaun ketak, matebean nain rua ne’e tula ho ambulásia rua, oras ne’e kadáver to’o ona Uatukarbau.
Entretantu, autor inisial JRX ne’ebé oho Matebean Berta Soares, oras ne’e iha ona Komandu Polísia Nasionál Nasionál Timor-Leste (PNTL) Kaikoli, Munisípiu Dili.
Jornalista : Dircia Belo & Daniel da Silva