JRX Oho Inan Isin Rua ! Maktoban Nia Mama To’o Dili Ho Matan-Ween

Imajem : Maktoban Berta Soares

SAPNewsTL, Dili : Inisial JRX hatudu fuan laek, oho fen Berta Soares ho kondisaun grávida ka isin rua iha Suku Bekora, Postu Administrativu Kristu Rei, Munisípiu Dili. Maktoban nia Mama hodi Uatulari to’o Dili ho matan-ween hodi hakuak oan feto nia retratu.

Tuir entrevista ho representa família, Rogito Guterres haktuir katak inan feton Berta Soares hetan oho husi laen rasik iha oras tuku 01:00 madrugada tanba deskonfia malu no hirus malu.

“Tuir informasaun ne’ebé ami asesu katak nia laen oho iha oras 1:00 madrugada, ami sente triste tebes tanba oho ema na’in rua dala ida, Matebean isin rua fulan ualu ona, falta fulan ida atu partus mak nia laen oho ho kanek hamutuk 25”. Tenik Representante família Rogito Guterres ba SAP News TL Iha Hospitál Nasionál Guido Valadares (HNGV) Bidau Dili, 21/10/2024

Rogito lamenta no husu ba tribunal atu prosesa tuir lei no fo sansaun tuir aktus ne’ebé nia halo hodi halakon ema na’in rua nia vida iha tempu hanesan.

“Ami husu ba parte justisa atu bele fo sansaun ne’ebe todan tuir nia aktu, ami mós husu ba mídia sira hodi fo akompanha ba kazu ne’e to’o hetan nia prosesu final”. Nia husu

Imajem : Maktoban Berta Soares ne’ebé hetan oho hosi inisial JRX Iha Bekora, no halo autopsia iha HNGV Bidau, 21/10/2024

Maktoban ninia mama ne’ebé hela dook husi kapitál Dili, rona novidade katak nia oan feto hetan ona oho husi nia mane, ho laran ne’ebé susar no dodok, hodi aranka husi Viqueque to’o Dili ho matan-ween hodi hakuak oan feto ninia retratu iha HNGV.

Inan feton Berta Soares sofre kanek hamutuk ruanulu resin lima (25) tanba hetan taa no sona husi nia laen iha loron 20 Fulan Outubru 2024 (01:00 oras madrugada).

Oras ne’e daudaun Matebian hetan ona autopsia hosi Polísia FORENSIK no parte ospitál ona entrega ba família ohin kalan hodi lori ba rezidensia Metinaru, aban sei kontinua lori ba rai-moris fatin Viqueque, molok halot ba nia deskansa fatin ikus.

Tuir observasaun SAPNews iha HNGV nota katak labarik refere hasai ona hosi inan nia kabun ne’ebé tau ona iha kaisaun ketak, no inan tau iha kaisaun ketak, matebean nain rua ne’e tula ho ambulásia rua, oras ne’e iha ona nia rezidensia, Postu Administrativu Metinaru, aban sei kontinua lori ba Uatulari, Munisípiu Viqueque hodi halot.

Maktoban Berta Soares no Suspeitu JRX forma uma kain hahoris oan feto nain tolu, inklui bebe ne’ebé mate ho nia inan iha nia kabun laran, sira na’in rua gradua ona iha Universidade Orientál Timor Lorosa’e (UNITAL) iha tinan hirak ba kotuk.

Entretantu, autor inisial JRX ne’ebé oho Matebean Berta Soares, oras ne’e iha ona Komandu Polísia Nasionál Nasionál Timor-Leste (PNTL) Kaikoli, Munisípiu Dili.

Jornalista : Dircia Belo & Daniel da Silva