Saudozu Maucalo Vizita CCLN, CCF & F-FDTL ! Lu Olo Husu Veteranu Sira Kuidadu Saúde

Imajem : Prezidente FRETILIN Francisco Guterres Lu Olo nahe bandeira FRETILIN ba kadáver Saudozu António Soares da Silva Maucalo iha CCF Fatuhada, 22/10/2024. Foto : Daniel da Silva

SAPNewsTL, Dili : Ohin família hamutuk ho komisaun hahú translada Kadáver António Soares da Silva Maucalo ba Conselho Combatentes da Libertação Nacionál (CCLN), Kuartel Geral FALINTIL Forsa Defeza de Timor-Leste (F-FDTL) Fatuhada, Comité Central Frente Revolucionário Timor-Leste Independente (CCF) hodi presta omenajem ikus ba Saudozu Maucalo, molok lori ba halot iha deskansa fatin ikus Jardim dos Herois Metinaru Dili.

Presidente Partidu FRETILIN Francisco Guterres Lu Olo lori partidu nia naran hato’o omenajem no agradesimentu ba Saudozu Maucalo, Lu Olo husu veteranu sira hodi kuidadu saúde, kuidadu malu tanba veteranu sira sura deit ona ho liman.

“Lori FRETILIN nia naran presta omenajem no agradesimentu ba Saudozu António Soares da Silva Maucalo ne’eb husik ona mundu, ba veteranu hotu tenki kuidadu malu, kuidadu saúde no kuidadu an didiak tanba veteranu sira sura deit ona ho liman”. Tenik Presidente Partidu FRETILIN Francisco Guterres Lu Olo iha CCF Fatuhada, 22/10/2024.

Fo hanoin fali katak, Saudozu Koronel António Soares da Silva alias “Maucalo” moris iha Macadiqui, Postu Administrativu Uatulari, Munisipiu Viqueque, loron 09 fulan Dezembru 1962, tinan sanulu resin neen (16) nia partisipa iha luta libertasaun nasionál, iha ne’ebé hola parte iha Postu Desmobilizasaun Komandante de Unidade.

Saudozu Koronel António Soares da Silva simu kondekorasaun ho Medalha Ordem de Guirrilha iha loron 19 fulan Maiu 2007 no hetan fitun tolu bazeia ba ninia partisipasaun, dedikasaun no sakrifisiu naruk ne’ebé nia fo ba Timor-Leste nia luta ba ukun rasik an.

Molok tama iha periodu invasaun Saudozu tama Forsa Armada Libertasaun Nasionál Timor-Leste (FALINTIL) nu’udar Soldado iha sentru instrusaun Taibessi Dili. Hafoin invazaun Maucalo kontinua sai militar ho kargu soldado partensia ba kompanhia movel ho Komando Paulino da Gama Mauk Moruk iha Setor Ponta Leste.

Imajem : Saudozu Koronel António Soares da Silva “Maucalo”.

Iha tinan 1976 Maucalo asumi kargu Komandante Pelutaun Movel ne’ebe ikus mai transforma ba forsa intervensaun.

Iha 1977-1978, Maucalo noemadu Komandante pelutaun primeira kompanhia de Choque . Hafoin zona libertadas rahun, husi 1979-1980 Maucalo kontinua Komandante pelotaun forsa konsentrada.

Liu tiha Konferensia reorganizasaun Nasional iha 1981 Maucalo ezerse kargu Komandante pelotaun da kuatru kompanha husi Brigada Vermelha kolokadu iha Regiaun Nakroma.

Iha tinan 1984-1991 Maucalo asumi kargu segundu Komandante ba III Unidade ba forsa konsentrada.
Bataliuan 303 husi forsa invazaun Indonesia kaptura Maucalo iha dia-20 junhu 1991 no sai prizoneiru iha Soibada , Ainaro 1996.

Iha prizaun Maucalo involve iha atividade organizasaun frente Klandestina to’o 1999, ikus mai reingresu ba forsa Armada FALINTIL.

Iha periodu ukun rasik an, Saudozu Maucalo asumi kargu nu’udar Chefe da Repartisaun da Justiça das-F-FDTL hodi servi instituisaun sagradu ne’ebé ho domin, konsisténsia, responsabilidade no honestidade.

Iha tinan 2017, Saudozu António Soares da Silva “Maucalo” eskollidu sai Xefe Casa Militar, Prezidente Repúblika Demokrátika Timor-Leste (RDTL) Francisco Gusterres Lu Olo iha tinan 2017 to’o 2022.

Saudozu António Soares hakotu iis ka remata ninia peregrinasaun iha mundu ho idade neenulu resin-rua (62), iha loron 12 fulan Outubru tinan 2024, wainhira hala’o tratamentu iha ospitál Malásia tanba sofre moras prostat.

Notisia kompletu bele akompanha transmisaun direta hosi Mídia SAP News TL iha terrenu.

Jornalista : Dircia Belo & Daniel Silva