Ekipa Jestaun Merkadu Tuku Malu Ho Negosiante, Inan Feton 1 Halo Intervensaun
Imajem : Inan Feto 1 halo intervensaun ba negosiante no ekipa jestaun merkadu ne’ebé tuku malu iha kampung-baru Dili,23/10/2024.
SAPNewsTL, Díli : Ekipa Jestaun Merkadu hala’o kontrolu iha Merkadu Kampung-Baru Suku Comoro, Durante kontrolu ekipa jestaun hadau produtu negosiante sira nian hodi tula ho karreta no estraga produtu ne’ebé komunidade sira fa’an, iha tempu hanesan, negosiante sira lamenta no tuku malu ho sira.
Normalmente, ekipa jestaun merkadu sempre halo kontrolu no haruka negosiante sira hodi la fa’an iha trotoar leten ka dalan ninin liliu estrada públiku sira iha kapitál Dili, inklui Kampung-Baru.
Iha loron 23 Fulan Outubru 2024, ekipa jestaun merkadu munisípiu Dili hala’o intervensaun ba negosiante sira iha area kampung-baru, iha ne’ebé hadau negosiante sira nia sasan hodi tula ho karreta, halo negosiante sira lamenta no tuku malu ho ekipa jestaun sira ne’ebé hadau sira nia sasan.
Durante intervensaun, mosu aktu brutalismu hodi rezulta tuku malu entre ekipa jestaun merkadu no negosiante mane sira, iha momentu ne’ebé tuku malu mosu liafuan hosi mane ida dehan, ”Baku…….Baku Deit”, wainhira ema ida halo video ba akontesimentu refere, inan feton ida halai mai dehan, “Jornalista Ka, Lae, Taka Tiha Kamera”, sidadaun refere taka duni kamera. Situasaun ne’e akontese iha Kampung-Baru, Suku Comoro, Dili, 23/10/2024. (Oras Loraik, haleu oras 18:00) SAPNews Screenshot
Wainhira negosiante no ekipa jestaun merkadu tuku malu hela, inan feton ida uza ho kamizola mutin no lipa ida halai ba mai hodi halo intervensaun no hapara, maibe hetok sira tuku no tebe negosiante mane ne’ebé tuku malu ho sira. Iha ne’ebé sama negosiante refere ba rai wainhira nia latan ona iha estrada.
Durante halo intervensaun no kontrolu, Membru Ekipa Jestaun Merkadu sira uza sapeu no hena metan hodi taka tomak nia oin, difikulta atu kunhese sira nia identidade pessoal.
Iha fatin ne’e, iha mós Membru Polísia Nasionál Timor-Leste (PNTL) ne’ebé akompanha ho ekipa jestaun merkadu, halo mós intervensaun hodi hakalma situasaun iha fatin akontesimentu.
Durante intervensaun, produtu komunidade nian barak hetan estragus hanesan tomante, repollu, modo tahan sira inklui meza ne’ebé negosiante sira uza hodi fa’an sasan no kadeira ne’ebé negosiante sira tur hodi hein sira nia produtu.
Antes ne’e, iha fulan hirak ba kotuk, molok Santu Padre Papa Francisco halo visita mai Timor-Leste, mosu mós akontesimentu ne’ebé baku negosiante, sobu sasan fa’an na’in sira no halo labarik ida tanis hakilar tanba haree aktu sira hosi ekipa jestaun merkadu ne’ebé lidera hosi Sekretáriu Estadu Asuntu Toponomia no Organizasaun Urbanu (SEATOU) Germano Santa Dias Brites.
Hafoin notísia ne’e publika, SAPNews seidauk halo komfirmasaun ho parte Presidente Autoridade Munisípiu Dili no Sekretáriu Estadu Asuntu Toponomia no Organizasaun Urbanu (SEATOU) Germano Santa Dias Brites ligadu ho akontesimentu ne’e.
Jornalista : Marciana da Conceição