Loron Nasionál Liberdade ! Otélio Preokupa Mídia & Jornalista Barak Laiha Kondisaun

SAPNewsTL, Bobonaro – Iha ámbitu selebrasaun  loron Nasional Liberdade ba dala rua (2)  no trajedia Balibo Five ba dala 49, Prezidente Konsellu Imprensa Timor-Leste (CI sigla Portugues) Otelio Ote hateten média nasional hahú trasforma an maske media no jornalista barak seidauk iha kondisaun di’ak, maibe sei hetan nafatin intervensaun husi polítiku na’in sira.

Prezidente Konsellu Imprensa hateten, media iha papel importante atu ko’alia lialos, maibé kontekstu real ne’ebe sai dezafiu iha kobertura media nian mak hetan intervensaun husi polítiku na’in sira hodi hata’uk jornalista halo kobertura.

“Ita mós ko’alia kona ba direitu ba expresun, direitu atu ko’alia, independénsia editotial maibe ita triste tanba sei iha intervesaun poder polítiku sira, intervensaun ema riku na’in sira, intervesaun ema individu sira  ba independénsia editorial, maske dezenvolvimentu meiu komunikasaun sosial makas tebes, ita triste tanba sei iha intervesaun poder politiku sira”. Dehan Prezidenti CI Otelio Ote, liu husi nia diskursu, Balibo, (16/10/2024).

Lider Orgaun Regulador ne’e aprofunda katak trajédia Balibo, ohin loron sai Balibo Five, jornalista na’in lima ne’ebé mate iha Balibo inspira jornalista sira hodi defende lialos, sira mate tanba defende lialos no direitus umanus.

“Sakrifisiu jornalista estranjeiru na’in lima (5) nian, inspira jornalista Timoroan sira atu ko’alia lialos”.Nia dehan

Otelio Ote akresenta, Tinan rua liu ba Parlamentu Nasionál aprova ona dia 16 de outubru nu’udar loron nasional ba liberade, maibé realidade polítiku na’in sira sei kontinua halo intervensaun hasoru jornalista sira iha terenu.

Otelio Ote sublinha, “Ita nia dezenvolvimentu meiu komunikasaun sosial, uluk ita haree, ita iha deit plataforma hanesan jornal, Radiu no Televisaun maibé bainhira teknológia telekomunikasaun modernu, era dizitalizasaun ita komesa ho plataforma media dizital”.

“Plataforma dizital mós nu’udar dezafiu ida ba média sira, tanba ne’e konsellu imprensa nu’udar orgaun reguladora sei kontinua  halo regulasaun kona ba meius komunikasaun sosial sira, oinsa jornalista ida jere nia aan atu sai ema produtivu ho kualidade ba públiku”.

Otelio preokupa tanba média no jornalista barak laiha kondisaun, jornalista barak nia saláriu sei mínimu.

“Ita ko’alia iha ne’e katak média no jornalista barak maibé ita triste tanba sira nia kondisaun seidauk diak, ita mós ko’alia kona-ba direitu ba expresaun no direitu atu ko’alia ou independensia editotial maibé ita mos triste tanba jornalista sira barak mak sei simu salariu minimu”.

Entertantu, iha selebrasaun loron nasional liberdade ba dala rua no loron trajedia ba dala 49^o partisipa husi Vice Ministru Asuntu Parlamentar Aderito Hugo, Prezidente Konsellu Imprensa Otelio  Ote, Reprezentante  Prezidente Autoridade Munisipiu Bobonaro, Komandante Munisipiu Bobonaro, Jestor Media sira, Membru CI, Diretor Jeral husi Instituisaun Estadu, Jornalista Nasional no Internasional sira.

Jornalista : Dircia Baptista Belo