Apresenta OJE 2.617 Billiõns ! Asume Dejafiu & Aproveita Oportunidade

SAPNewsTL, Dili : Nonu Governu apresenta proposta Orsamentu Jeral Estadu (OJE) tinan 2025 hamutuk billiaun 2.617, Primeiru Ministru Kayrala Xanana Gusmão hateten OJE refere ho vizaun ne’ebé brani ba futuru, mata-dalan konkretu ida atu hasoru desafios no aproveita oportunidades.

“Ita iha hela momentu krusial ba ita-nia Nação nia história. Orçamento Geral do Estado ba tinan 2025, ne’ebé ha’u apresenta ba Ita-Boot sira, la ós halibur deit númerus hodi halo verbas oi-oin OGE ida ne’e lolós sai hanesan declaração de intenções ida; vizão nebé brani ba futuro; no mata-dalan concreto ida atu hasoru desafios no aproveita oportunidades”.Tenik Primeiru Ministru Kayrala Xanana Gusmão iha Uma Fukun Parlamentu Nasionál, 06/11/2024.

Tema ba OJE 2025 mak ‘Investimento iha Infraestruturas estratégicas, Reforço iha Economia no Melhoria Bem-Estar Cidadãos sira-nian’, hakarak hatudu kontratu sosial ne’e ho orçamentu ne’ebé propõe hamutuk 2 biliões, 617 milhões de dólares americanos.

“Ami sei haka’as-an atu fó hakat ne’ebé diak, hodi hadi’a serviços públicos, nune’e impulsiona crescimento económico, no hari’i bases ba futuro ne’ebé prósperu.” Xanana afirma

Orçamentu ida ne’e halo ho hanoin atu garante katak cidadās no cidadãos hotu-hotu bele hetan benefícios, husi resultados do crescimento no desenvolvimento ita-nia nação nian, la haree ba fatin moris ka hela no la haré ba ida-idak nia posição social.

Governo iha confiança katak, ohin mai iha ne’e apresenta proposta ida ne’ebé estratégica no equilibrada ba Orçamento do Estado tinan 2025. Nune’e, Governu konsidera katak contributos ne’ebé sei mai husi Distintos Deputados sira, mak sei halo proposta ida ne’e sai representativa liu.

Debate demokrátiku, ne’ebé sei hala’o iha loron hirak tuir mai, certamente sei beneficia ita-nia povo. Nune’e, husu ba ema hotu atu buka fó hanoin ne’ebé positivu no diak liu husi ida-idak.

Iha tinan ida ne’ebé ita selebra 25 anos ba ita-nia histórica Consulta Popular, importante tebes atu fó hanoin ba malu katak ita kaer hela ita-nia povo ninia compromisso, husi tinan hirak liu ba. Compromisso atu sai livre no independente, só bele concretiza liu husi consolidação iha ita-nia democrasia no liu husi desenvolvimento nacional.

Hanesan Sua Santidade Papa Francisco, iha ninia visita foin dadaun ne’e, visita ida ne’ebé ita hotu fiar sei moris nafatin iha hotu-hotu ninia memória: “buat nebé Timor-Leste iha, diak liu no murak liu, maka ninia povo”.Xefe Governu sublinha

Governu, iha ninia preparação orçamentos ba tinan 2025 to’o 2029, hakarak atu dudu nafatin desenvolvimento social, económico no mós iha infraestruturas, hodi apoia hadi’a nível de vida povu nian.

“Ita sei kria condições atu povo ida di’ak tebes ne’e, bele hetan progresso ho alegria, ho estabilidade no harmonia iha nível hotu-hotu”.

Xanana Gusmão salienta tinan 2024 nu’udar tempu atu hadia frajilidade no irregularidade hirak ne’ebé nonu governu hetan iha iha instituisaun estadu nian.

“Iha tinan kotuk atan-oan ha’u dehan ba Ita-Boot sira katak, 2024 sei sai nudar tinan atu korrige tiha fragilidades no irregularidades, ne’ebé ami hetan iha instituições sira-nia laran, iha sistemas no processos públicos nia laran; ohin, ha’u hakarak dehan katak, ba tinan mai ne’e, sá-ida mak ami sei buka halo maka 2025 sai tinan ida ba implementação husi programas ne’ebé iha”.

Iha tempu ida ne’ebé ekonomia global rasik mos enfrenta daudauk insertezas ne’ebé boot no barak tebes, husi kedas konsequência pandemia nian to’o ba aumento da inflação no ba funu lubuk ida no tensões geopolíticas, Governo ida ne’e elabora orçamento ida ne’ebé haré ba necessidades povu-nian, hodi la haluha atu konsidera mos contexto vulnerabilidade husi fatores externos.

“Ami la konsentra deit ba recuperação imediata, maibé mos atu hasai políticas no medidas ne’ebé resilientes ka fortes, hodi permite atu Timor-Leste bele la’o ba oin iha prazo nebé naruk”.

Governu sei investe iha setores produtivos hanesan infraestruturas, educação, saúde, proteção social no ambiental no, la haluha, iha setor petrolífero. Sira ne’e mak sai nu’udar pilares hodi hari’i sociedade ne’ebé próspera no justa.

“Ha’u-nia dever, Senhoras no Senhores, hanesan mos Governo ida ne’e nia dever, maka atu assegura transparência kona-ba uzo de recursos públicos nacionais. Laoss novidade ona, ba sé deit, katak karik la iha recursos foun, Fundo Petrolifero sei hotu iha tinan 10 mai ne’e.”

“Maibé, visão ida ne’e labele sai fali fator ida atu desmoraliza ita no, liuliu, hanesan fali oportunidade atu halo declarações demagógicas no irresponsáveis. Pelo contrário, visão ida ne’e tenki sai hanesan fator união atu ita bele servisu hamutuk ho di’ak liu tan, hodi buka soluções alternativas ba povo no liu husi povo”.

“Orçamentu ida ne’e representa la’os deit reformas atu hametin sustentabilidade orçamental, mas investimentos concretos ne’ebé sei permite diversificação económica”.

Investimentos iha infraestrutura, ho total 654 milhões de dólares husi ne’ebé 440 milhões ba capital de desenvolvimento, la limita deit ba construção de estradas no pontes – maibé atu permite acesso ba malu husi ita-nia povo, atu permite comércio no atu promove oportunidades. Projetus sira ne’e bele hamosu emprego no estimula atividades económicas no sei hadi’a qualidade de vida cidadãos sira-nian.

Governo tau hela osan ho total 26 milhões de dólares ba programas Bé, Saneamento no Higiene, iha municípios balun, hodi haree liu ba desenvolvimento no manutenção infraestruturas Bé nian.

Iha setor seluk, implementação Cabo de Fibra Óptica, iha tinan ida ne’e, sei impulsiona crescimento económico hodi hadi’a indicadores económicos no desenvolvimento iha indústrias foun, ne’ebé antes labele halo. Nune’e, husi Fundu de Infraestruturas sei aloka 2,5 milhões de dólares ba projeto instalação da Fibra Óptica no 5 milhões de dólares ba ninia gestão. Aprovação ba licenças de serviços Internet nian, liu husi satélite Starlink, sei mos ajuda hadi’a conetividade, mesmu ke Fibra óptika la to’o iha ne’ebá.

Iha sikun seluk, ita labele husik deit ita-nia Recursos, ne’ebé natureza fó tiha ona mai ita, atu bele uza hodi dezenvolve no progride. Ita sei investe iha setor petróleo no recursos minerais, liu husi investimento de 40,5 milhões de dólares, no ita sei avança ho desenvolvimentu Greater Sunrise nian ho investimentu de 12 milhões de dólares.

“Ami sei esforça-an maka’as nafatin atu estabelece fronteiras terrestres no marítimas ho Indonésia. Ida ne’e, prioridade nacional ida, la ós deit atu kompleta funu naruk kona-ba soberania, maibé mós atu hetan segurança jurídica no téknika kona-ba recursos iha espaço marítimo iha ita ninia jurisdição, no ne’e hotu sei permite mai ita atu implementa políticas de economia azul nebé sustentáveis”.

Iha início tinan ida ne’e, ita formaliza tiha ona adesão ba Organização Mundial do Comércio. Iha tinan mai né, ita atu sai membru ba ASEAN. Iha Organizações rua ne’e nia laran, mercados foun no oportunidades foun sei nakloke mai ita, hodi exige ba ita atu usa ho inteligência no responsabilidade.

Ba tinan 2025, Governu aloka estratégikamente total de 40,8 milhões de dólares atu dinamiza setores agríkola, pesqueiro, pecuário no florestal. Hakarak atu estimula pequenas no médias emprezas (PME), hodi aumenta produção local, reduz dependência ba importação no atu promove inovação. Fiar iha kbit ita-nia setor privadu atu dudu kresimento no kria emprego, nune’e duni maka sei buka kapasita ita-nia empresários sira liuliu iha agricultura no infraestruturas.

Husi fundos sira ne’e, ita haruka hela mensagem ba ita-nia agricultores sira, ba ita-nia empresários no ba aspirantes ba empresários: Governo fiar iha imi e ami sei fó apoio ba imi nia sucesso. Ami hatene katak força económica lolós mai husi rai-laran e ami empenhado atu ajuda desenvolve indústrias locais ne’ebé bele aguenta tempo naruk.

Governo mos aloca 23,3 milhões de dólares ba iha programa Investimento no Diversificação Económica atu reforça setor Comércio no Indústria, hodi haré liu ba investimentos iha infraestruturas críticas ne’ebé sei reforça base economia.

Liu husi Fundo de Infraestrutura ho alocação verba de 4,6 milhões de dólares, sei constrói mercados foun iha Ainaro, Maliana, Loes no Manatuto, no moderniza mercados municipais iha Baucau no Ermera, atu estimula crescimento empresarial local, cria emprego no melhora resiliência económica.

Nune’e mos, sei investe iha Centro Nacional de Incubação de Empresas iha Dili no sei investe iha estudos de viabilidade no projetos detalhados de engenharia ba parque industrial foun iha Liquiçá no centros comerciais iha Manleuana no Taibesse. Iniciativas sira né atu bele atrai investimentos, bele estimula atividade económica no gera oportunidades de emprego.

Projeto ida ne’e sei acompanha ho programa nacional de estágio atu fó experiência prática ba jovens profissionais sira, liu husi centros de desenvolvimento profissional, iha nível nacional no municipal, inclui mós RAEOA. Investimentos iha centros de formacão no construção de instalações foun iha Lautém, Covalima no Aileu, mak sei garante katak força de trabalho bele hetan ona kbit atu atende ba crescentes demandas económicas país-nian.

Governo hakarak melhora bem-estar cidadãos sira nian, nune’e sei investe 741 milhões de dólares ka 35% husi orçamento consolidado iha setor capital social, tanba importante hanesan mos mak apoiu ne’ebé sei fo ba população sira nebé vulnerável liu ho 190 milhões de dólares ba Veteranos sira, ita sei honra nafatin sira-nia sacrificio no reconhece katak Liberdade no paz ne’ebé ita hetan ohin loron, mai husi sira-nia koragem.

Para além de transferência ba Fundo dos Combatentes de Libertação Nacional, ita sei halo transferência de 124 milhões de dólares ba Segurança Social. Enkuantu ita seidauk bele atende didiak ema hotu, ho ita-nia recursos internos, ita tenki buka soluções alternativas. Ami mód aloka 8,1 milhões de dólares ba prestação de tratamentu de saúde iha estrangeiru.

Orçamentu ida ne’e mós prevê atu reforsa Bolsa da Mãe ho 1 milhão de dólares ho total 7 milhões de dólares, no adisional liu 2 milhões de dólares ba subsídiu kondisional ba saúde no nutrição ba feton isin-rua no ba labarik sira.

Maibé ita-nia investimento la ós deit ba bem-estar social. Ita kuda hela fini ba futuru liu husi investimentu ne’ebé boot iha educação ho 17,2 milhões de dólares, ba bolsas de estudo no formação profissional, ita prepara hela próxima geração de líderes, ne’ebé bele sai inovadores no agentes timoroan rasik ba mudança. Sucesso ita-nia nasaun iha hela ita-nia jovens sira nia kabás e ita hotu empenhados atu fó ba sira ferramentas ne’ebé precisa ba sira- nia sucesso.

Cerca de 145,8 milhões de dólares aloca hela ba investimento iha educação, osan ne’ebé fahe kedas ba agências oioin, no mós ba konstrucão no renovação de infraestruturas no edifícios escolares, ba formação de professores no ba melhoria do sistema de gestão de educação. Governo ida ne’e fiar katak educação mak sai hanesan dasin boot ida no ita sei fó prioridade máxima ba setor ne’e.

Governu sei hadi’a mos serviços de saúde iha país tomak, ho verba de 92,2 milhões de dólares, no sei investe iha Hospital Nacional no Hospitais de Referência, nune’e mos atu konstrói no reabilita postos no centros de saúde comunitários ho investimento de 14 milhões de dólares, ita sei tau matan didiak ba necessidades iha área ai-moruk no equipamentos médicos nebé essenciais.

“Permite ha’u atu koalia lolós, ka klaro, katak Orçamentu ida ne’e reflete empenho firme husi Governo iha boa governação. Ami sei assegura katak Fundos Públicos tenki gere ho máxima transparência no responsabilidade”.

Governu mós kria daudauk agora sistemas de gestão de finanças públicas ne’ebé forte, no reforça mecanismos de auditorias internas, hodi garante katak execução ba orçamento ida ne’e sei hetan acompanhamento ne’ebé diak. Corrupção no má gestão de fundos públicos, labele hetan fatin iha futuru Timor-Leste.

“Ita tenki promete ba povo katak cêntimo ida, ne’ebé aloka iha orçamentu ne’e, sei serve duni objetivo ne’ebé ita hotu hakarak no produz rezultados ne’ebé hadi’a duni povo nia vida”.

Governu buka descentraliza daudauk governação, buka atu capacita ita-nia Municípios sira ho recursos ne’ebé sira precisa atu lidera sira-nia desenvolvimentu rasik. Liu tiha tinan ida ne’e, hala’o ona ações balun, inklui mos quadro regulamentar ba descentralização hodi apoia processo de descentralização ne’e.

Estratégia de descentralização sei liu fases tolu: descentralização administrativa, descentralização administrativa territorial no descentralização administrativa institusional noIta iha daudauk iha fase atu hakbiit liu autonomia ba Autoridades Municipais, hodi reforça síra-nia kbit kona-ba gestão financeira, patrimonial no recursos humanos hodi bele gere sira-nia receitas.

40 milhões de dólares ne’ebé fó ba Autoridades Locais sei permite implementa projetos nebé sai nudar necessidades específicas iha sira-nia comunidades. Governo ida ne’e fiar iha poder Liderança local nian e fiar katak Governos Locais sei utiliza didiak fundos nebé fó, atu beneficia cidadãos sira.

Ho total Orçamento, ne’ebé propõe hamutuk 2 biliões no 617 milhões de dólares, sei halo investimentos ne’ebé críticos iha serviços públicos, iha infraestruturas, iha crescimento económico no proteção social ba cidadãos mais vulneráveis. Orçamento ida ne’e reflete visão longo prazo, husi Governo tuir PED 2011-2030, no mos atu responde ba necessidades imediatas ohin loron nian.

Mundu enfrenta hela desafios globais ne’ebé todan, perspetivas económicas ba Timor-Leste, iha 2025, sei bele dehan di’ak. Prevê katak crescimento real PIB não-petrolifero aumenta ba 4,1%, compara ho 3,7 iha tinan 2024. Aumento ida ne’e mai husi investimentos públicos ne’ebé lolós no husi recuperação iha ita-nia setor privado, tanba rua né mak essencial tebes ba crescimento económico sustentável. Nune’e mos, prevê katak inflação bele tun ba 2.2%, hodi ajuda poder de compra husi população no estabiliza custo de vida..

Ita-nia estratégia fiscal kaer metin hanoin kona-ba depesas prudentes no sustentáveis, ho atenção liu ba despesas de capital iha infraestruturas, programas alargados de proteção social no investimento iha capital humano. Prioridades sira ne’e sei ajuda atu garante katak crescimento económico beneficia regiões hotuhotu no cidadãos hotuhotu iha Timor laran tomak.

Orçamento consolidado 2025 nian ba Admnistração Central no ba RAEOA sa’e ba 2 biliões, 125 milhões de dólares, nebé representa aumento iha 12%, compara ho orçamento anterior. Aumento ida ne’e hatudu ita-nia empenhamento iha desenvolvimento infraestruturas no ba melhoria iha serviços públicos.

Hanesan temi tiha ona, atu hetan crescimento económico sustentável iha longo prazo, tenki diversifica ita-nia economia. Nune’e, 310 milhões de dólares, nebé tau iha Fundo de Infraestruturas, sei tau matan ba áreas cruciais hanesan infrestruturas ba estradas no pontes, eletricidade, desenvolvimento infraestrutura portuária, transportes públicos no serviços públicos.

Obstáculo nebé sei iha nafatin ba investimento iha infraestruturas mak problemas sira nebé mosu, kona-ba rai no titulo de propriedade. Ba 2025, sei cria iha Ministerio da Justiça dotação específica ida atu buka resolve problemas sira né. Kuandu hakotu tiha litijios fundiários no clarifica tiha propriedade kona-ba rai, sei mosu ambiente propício liu ba investimento público no privado, iha infraestruturas nebé essenciais.

Depois de mai kaer tiha ukun, iha 2023, Governo ida ne’e adopta tiha ona abordagem ida nebé cautelosa, kona-ba empréstimos no kona-ba financiamento externo. Liu husi análise nebé kle’an, hasai tiha decisão atu cancela tiha acordos balun kona-ba empréstimos, hodi continua halo avaliação ba selu-seluk. Abordagem cuidadosa ida ne’e reflete ami-nia compromisso ba responsabilidade orçamental no ba sustentabilidade iha longo prazo.

Ita tenki garante katak compromissos financeiros hotuhotu nebé ita assume, la’o ho ita-nia objetivos desenvolvimento nian e sei la fo encargos nebé la lós ba gerações futuras.

Maski ita cauteloso, ita sei loke-an atu bele dudu opções de financiamento ba projetos essenciais, nebé sei contribui diretamente ba ita-nia prioridades nacionais.

Atu garante execução eficiente ba orçamento ida ne’e, ami sei reforça nafatin Sistema de Gestão de finanças públicas. Ne’e inclui implementação ba procedimentos foun kona-ba aquisição atu hadi’a taxas de execução capital-nian no reduz atrasos iha projetus. Transparênsia no responsabilidade sai nafatin pedras angulares iha ita-nia modelo governação e ita empenhado atu assegura katak cidadãos hotu hetan acesso ba informações kona-ba oinså gere gastos husi Fundos Públicos.

Sei reforça mos mecanismos de auditoria interna atu prevene corrupção no garante katak práticas financeiras hotuhotu respeita duni normas internacionais. Ita-nia objetivo maka constrói Governo ida nebé transparente, responsável no hatán duni ba necessidades povo nian.

“Ha’u tenki reconhece katak execução governamental moderada liu, iha primeiro semestre tinan ida ne’e. Maibé, iha fulan ikus-ikus né, ita bele haré iha aumento iha capital desenvolvimento. Tan ne’e, maka execução governamental to’o ohin loron 63% deit, maibé bele regista aumento to’o fim do ano”.

“Ami fiar katak sei to’o 86%, iha 31 de dezembru de 2024, ne’ebé hetan aumento de 9% compara ho tinan 2023. Nune’e mós, ami confiantes katak execução governamental sei melhora progressivamente, ba la menos 90% iha 2027, nudar resultado husi reformas de gestao de finanças públicas nebé ami implementa daudauk”.

Orsamentu ida ne’e sai hanesan pontu de viragem ida ba ita-nia Nasaun. Ita buka investe ba ita-nia futuru, atu bele garante katak Timor-Leste sei hamrik husi desafios ne’ebé ita enfrenta daudauk, nudar país ida forte liu tan, unido liu tan no próspero liu tan.

Orçamentu ida ne’e estabelece alicerces ba futuru ne’ebé promissor, estável no inclusivo. Hamutuk, hanesan Nação ida, ita sei konkretiza vizaun kona-ba Timor-Leste prósperu Timor-Leste, iha ne’ebé cidadãos hotu-hotu bele moris ho dignidade no hetan acessu ba oportunidades.

Bainhira ita enfrenta daudauk desafios globais no internos, ita hotu tenki hanoin nafatin katak ita-nia força maka unidade no resiliência.

Hamutuk, ita sei konstrói futuru ida ne’e, futuru ne’ebé sei hamrik ho bases iha justiça, estabilidade no confiança mútua.

Jornalista : Conzita Mota