Karreta Truck Soke Mate Xefe Aldeia Uanamibere Agusto Barikassa
Imajem : Motor no Maktoban Agusto Barikassa ne’ebe monu hamutuk iha estrada ninin iha Daudere, 11/11/2024.
SAPNewsTL, Lautém : Relasiona ho asidente ne’ebé akontese iha Suku Daudere Postu Administrativu Lautém rezulta Eis Xefe Aldeia Uanamibere Agusto Barikassa lakon vida tanba hetan soke hosi karreta truck.
Iha loron 11 Fulan Novembru Tinan 2024, Eis Xefe Aldeia Uanamibere Agusto Barikassa halo viajem ho motor refo ne’ebé marka xapa matríkula 3674, durante viajem nia sofre asidente iha area Suku Daudere, postu Lautém, Munisípiu Lautém.
Tuir informasaun ne’ebe SAP News TL asesu katak asidente ne’e mosu tanba motor refere hetan soke hosi karreta truck ida iha oras loraik nian.
Asidente ne’e rezulta Agusto Barikassa mate fatin tanba nia isin baku ba estrada, iha ne’ebe halo nia oin sai rahun, motorizada mos monu sai hosi estrada no rahun.
Hafoin akontesimentu, ambulásia to’o kedas iha fatin akontesimentu hodi transporta mate isin ba matebean nia rezidénsia.
Kodutor ne’ebe konduz karreta truck refere entrega an ona ba Polisia Eskuarda Postu Administrativu Lautem no submete ba prosesu investigasaun.
To’o informasaun ne’e publika, SAPNews seidauk halo komfirmasaun ho parte Xefe Suku Daudere no parte Polísia Nasionál Timor Leste (PNTL) iha postu Lautém kona ba kronolojia hosi akontesimentu refere.
Jornalista : Ekipa Kobertura