Papel Mídia Iha Luta Libertasaun Nasionál, “Presiza Respeitu Servisu Jornalista”

SAPNewsTL, Lautém : Durante Semináriu ne’ebe hala’o iha Luro hodi komemora 12 Novembru, Diretor Mídia Nasional SAPNewsTL, Sergio Alves da Costa apresenta “Papel Mídia Iha Libertasaun Nasional, Entre Libertasaun Pátria no Libertasaun Povu” ba Lautém oan sira.

Papel mídia importante iha luta libertasaun nasionãl (Libertasaun Pátria no Libertasaun Povu), laiha mídia ka jornalista nasionál no internasional, mundu la hatene Timor, laiha mídia, direitu povu nian ema viola no diskrimina perante iha komunidade internasional, tan ne’e Timor-Leste nia ukun an la ses hosi mídia no jornalista sira nia kontribuisaun ne’ebé klean no frutuoza tebes.

Uluk nana’in ita simplifika tema refere ba lima : Saida Mak Papel, Mídia, Libertasaun Patria, Papel Mídia, Oinsa Servisu Mídia Iha Libertasaun Povu ?

Papel katak knar, dever, obrigasaun, responsabilidade no misaun ida ne’ebé atribui ba ema, ka grupu ka instituisaun ida hodi hala’o ninia dezempenhu ba bem estar komun sosiedade nian.

Mídia, Matenek na’in sira define katak Mídia maka kanal ka orgaun komunikasaun sosial ne’ebé transmite informasaun, ideia, entertainment sira liu hosi jornal, rádiu, televizaun no plataforma online.

Libertasaun patria maka luta ida ne’ebé heroi sira halo desde kolonizasaun Portugal durante tinan 450 no invazaun indonésia durante tinan 24, iha ne’ebé halo povu barak sofre intimidasaun, torturasaun, violasaun direitus humanus, no mate tanba kauza atu hetan ukun rasik an to’o ema liu rihun atus rua limanulu lakon vida, molok konkista Timor-Leste sai nasaun independente, livre, demokrátiku no soberanu iha mundu.

Libertasaun Povu mak esforsu koletivu no dedikasaun ampla ne’ebé komponente hotu halo liu hosi investimentu ba dezenvolvimentu infraestrutura, dezenvolvimentu sosial, ekonomia, no dezenvolvimentu fortalesimentu instituisional bazeia ba Planu Estratéjiku Dezenvolvimentu Nasionál (PEDN 2011-2030) ne’ebé atu atinji rendimentu media altu iha tinan 2030.

Papel Mídia importante no fundamentu tebes iha prosesu luta libertasaun nasionál, iha libertasaun patria mídia hola papel importante hodi divulga informasaun iha rai-laran ba rai-liur, ezemplu ida maka Jornalista Internasional na’in lima ne’ebé hetan assasinatu iha Balibo, ohin loron ita hanaran Balibo Five.

Jornalista Max Sthal ne’ebé fo sai akontesimentu 12 Novembru 1991 hodi halo mundu hakfodak, loke matan no fo atensaun ba Timor-Leste nia luta ba autodeterminasaun liliu nasoins unidas ne’ebé iha autoridade ba determinasaun ezisténsia estadu ida nian.

12 Novembru sai notisia ne’ebe viral ka popular iha mundu tanba kobertura jornalista internasionàl Max Still, Alone no Mídia Internasionàl sira seluk ninia kontribuisaun.

Nune’e, laiha mídia nasionál no internasional, mundu la hatene Timor, laiha mídia, direitu povu nian ema viola no diskrimina perante iha komunidade internasional, tan ne’e Timor-Leste nia ukun an la ses hosi mídia no jornalista sira nia kontribuisaun ne’ebé klean no frutuoza tebes.

Papel mídia iha kontextu libertasaun povu :

Papel Mídia iha prosesu libertasaun povu kontinua imporante tanba Estadu Timor-Leste konsagra ona iha Konstituiasaun Repúblika Demokrátika Timor-Leste (K-RDTL) artigu 40° no 41° kona-ba liderdade imprensa no liberdade expresaun katak estadu garante ba konstrusaun imprensa no liberdade asesu informasaun no hato’o opiniaun.

Entaun, Mídia asume papel importante hodi defende no hametin konstrusaun estadu direitu no demokrátiku, mídia maka bele haburas demokrasia, defende lialos, ajente kontrolu sosial, asegura boa governasaun, defende sidadaun vulneravel no abandonadu sira iha rural tantu urbanu.

Komandante em Chefe, Presidente Partidu Congressu Nacional Reconstrução Timorense (CNRT), Atual Primeiru Ministru Kayrala Xanana Gusmão hateten Mídia nu’udar elementu importante iha konstrusaun estadu no nasaun, imprensa la’os de’it informa maibe eduka sidadaun liu hosi kobertura ne’ebe analítiku, krítiku no investigativu, Imprensa mak bele lori Timor ba mundu no lori mundu mai Timor.

Prezidente Partidu Libertasaun Popular (PLP), Eis Prezidente Repúblika, Jeneral Taur Matan Ruak konsidera liberdade imprensa no expresaun importante tebes, mídia no jornalista mak ponte ba informasaun loos no kredivel, jornalista inkomoda, kontrola no fo sai lialos, eduka sosiedade no prezerva istória. Mídia laiha nosaun, dala ruma jornalista sente ki’ik iha ema boot sira le’et maibe jornalista no mídia nia lian kroat no folin ba sosiedade.

Presidente Partidu Demokrátiku, Atual Vise Primeiru Ministru Mariano Assanami Sabino deklara katak Mídia mak klamar ba demokrasia, laiha mídia demokrasia la moris, labele iha monopolia lialos, liberdade espresaun no liberdade imprensa tenki forte no metin nafatin. Mídia tenki funsiona hodi luta ba ezisténsia kada sidadaun nian tuir lei inan no lei oan sira hodi garante no promove sosiedade ne’ebé sivilizadu, demokrátiku no iha respeitu ba direitus humanus.

Bazeia ba sitasaun hirak mak temi iha leten, atu aprofunda katak papel mídia kaer knaar sagradu, papel ne’e fundamental tebes iha luta ba ukun an inklui iha luta ba libertasaun povu liliu kona-ba hatutan povu nia lian, sai lian ba lian laek sira, sai mata dalan ba sosiedade ne’ebe informativu, inspirativu, edukativu, konstrutivu, krítiku, responsivu, justisa, paz, estabilidade no dezenvolvimentu nasionál.

Tuir dadus tinan 2024, Konsellu Imprensa rejista mídia hamutuk 48 no númeru jornalista besik atus lima (500) iha Timor-Leste, ita bele dehan mídia nu’udar defensor, guardiaun no servidor ne’ebé sempre iha komunidade nia leet hodi defende ema kiak no kiik sira, ema kbiit laek no marzinalizadu, mídia no jornalista mak ponte entre povu ba governu no governu ba povu.

Molok remata, atu konklui katak mídia hala’o knar importante no makaas tebes iha luta libertasaun patria, ohin loron patria libertada, enkuantu, mídia nia papel kontinua importante iha prosesu libertasaun povu liliu kontra injustisa sosial, dezigualdade, korupsaun, koluzaun, nepotizmu, partidarismu, partidarizasaun ba funsaun públiku sira, prátika rasismu, grupuismu.

Servisu Mídia National sira kontinua sai fundamental hodi halo mitigasaun ba mudansa klimátika, kontra degradasaun ambiental, disinformasaun sira, notísia falsa, reduz instabilidade no divizionismu iha nivel lokal, nasional, rejional no internasional.

Iha ámbitu komemorasaun ba loron nasionál juventude no em memoria ba loron masakre santa kruz, momentu krusial ne’ebe atu relembra ba Jornalista Internasionàl Max Sthall ne’ebe fo nia an tomak liu hosi halo kobertura hodi fo sai akontesiemntu 12 Novembru 1991 ba komunidade internasionàl.

Loron nasional juventude hafanun sidadaun ida-idak atu kria paz no estabilidade, hatudu dedikasaun no dixiplina ne’ebe forte, jovens ida-idak tenki buka sai espellu, modelu no ezemplu ba ema seluk. Jovens hotu tenki hatene valoriza, dignifika no tane aas ispíritu fraternidade umana no sakrifisiu heroi no heroina sira nian iha luta libertasaun nasional.

Jovens feto no mane hotu tenki buka hatene ninia istória nasaun nian atu ita hamutuk hodi bele ho seguru ba futuru no labele repete ita nia pasadu iha futuru, tanba dala barak ema dehan, “povu ne’ebe la hatene nia istória, nia rasik kondena nia an hodi repete ninia pasadu iha futuru”.

Ha’u hakarak rekomenda katak :
1. Governu no entidade hotu atu hatene respeita no promove nafatin liberdade imprensa no expresaun iha estadu Timor-Leste tanba media mak elementu determinante iha nation building, states building, peace building, character building no capacity building.

2. Sidadaun sivil no militar hotu atu asegura, rekunhese no tane aas servisu jornalista hot-hotu nian iha ne’ebé deit, bainhira deit no ba saida de’it.

3. Mídia no Jornalista hotu importante tebes atu iha nafatin respeitu ba kódigu konduta jornalismu 10 ne’ebé hatur hosi konsellu imprensa de Timor-Leste tanba agora index liberdade, Timor sei okupa ba dala ruanulu iha mundu no dahuluk iha The Association of SouthEast Asian Nations (ASEAN).

4. Mídia no Jornalista sira presiza kontinua promove reportajem ne’ebé inkluzivu no sensivel ba jéneru liliu violénsia bazeia ba jéneru hanesan sidadaun vulneravel, feto, labarik feto, LGBTQI+, marzinalizadu sira, reduz risku mudansa klimátika, degrasaun ambiental no seluk tan.

Nota katak Normalmente, bee mak fo moris ba balada sira, ai-horis no ema hotu. Nune’e mós mídia mak bee ne’ebé bele haburas diretus umanus, demokrasia, liberdade, lialos no justisa sosial. Mídia mak odamatan, janela no roman ba mundu.

Semináriu ne’e hetan partisipasaun maksimu husi Administrator Postu Administrativu Luro Gaspar Xavier, Komandante PNTL Eskuarda Luro, Diretora Ensinu Báziku Sentral Númeru 2 Luro Deolinda da Costa Hornay, Xefe Suku Lakawa, Pontu Fokal Ministériu Juventude Deportu Arte no Kultura Luro.

Partisipa mos hosi Membru Parlamentu Foinsa’e Nian (PFN) Postu Luro, Membru Klibur Foinsa’e Fini Lautém (KFFL), Foinsa’e Katolika Parokia Luro, Alumni Jovens Ba Mudansa Postu Luro, Xefe Juventude Suku Luro no Lakawa, Komunidade Luro no foinsa’e Luro oan sira.

Hakerek Na’in : Sergio Alves da Costa