Inspira Foinsa’e Hatene Istória ! CNC Realiza Sertame Komemora 28 Novembru
Imajem : Diretor Jeral Ensinu Sekundariu, Deolindo da Cruz iha Salaun CNC Balide,14/11/2024.
SAPNewsTL, Díli — Prepara ba eventu istóriku proklamasaun independensia 28 de Novembru, Sentru Nasionál Chega (CNC sigla Portugués) organiza atividade kompetisaun sertame entre eskola primaria no sekundáriu sira kona-ba materia ciensia sosiais, istória Timor nian, Direitu Umanus no Sidadania.
Diretor Ezekutivu Sentru Nacionál Chega Hugo Maria Fernandes informa, fulan novembru hanesan tinan identifikadu ne’ebe Timor-Leste preparadu hodi komemora 28 de novembru Proklamasaun independénsia, tanba ne’e CNC kontinua esplora koiñesementu estudante primaria no sekundáriu sira hodi hatene kaptasaun estudante nian kona-ba materia ne’ebe sira aprende iha eskola.
“Ita iha faze preparasaun ba eventu 28 de novembru loron independénsia Timor-Leste nian maibe ida ne’e mos hanesan eventu ida atu partilla ba estudante sira koñesimentu entre eskola sira kona ba sira nia koñesimentu iha ciensia sosiais sira liu liu materia historia, direitus umanus, edukasaun no sidadania.” Dehan Diretor Ezekutivu CNC Hugo Maria Fernandes, ba Jornalista sira iha Salaun CNC Balide, Quinta, (14/11/2024)
Tuir Diretor Hugo, Iha tinan 2019 sentru chega, organiza ona atividade sertame kobre eskola sira iha territoriu nasionál, nune’e atividade kompetisaun refere hala’o anualemente ho objetivu hodi komemora 28 novembru aniversariu Proklamasaun independensia, liu husi realiza atividade sertame kada eskola sira iha iha baze mak to’o iha nasionál.
“49 anos ploklamasaun independensia nian, atividade ne’e ba tinan dala 5 nian, ita hahu ba sertame nian eskola iha Timor laran ne’e hahu kedan iha 2019, bainhira ita selebra 20 anos konsulta popular, ita halo nivel nasional prosesu husi kedan eskola postu administrativu sira depois mai iha nivel munisipiu mak mai iha Dili”. Tenik nia.
Imajem : Diretor Ezekutivu CNC Hugo Maria Fernandes
Hugo argumenta, tinan ida ne’e CNC trasa planu hodi idetifika, eskola sira, nune’e ho intensaun CNC nian bele enkuadra professores no estudante ativu sira partilla sira nia kapasidade ligadu ho materia hirak ne’ebe estudante sira hetan iha ida-idak nia instituisaun eskola sira.
“Tinan ida ne’e, ita halo selesaun ba eskola primaria ho sekundaria sira, ne’e ita halo selesaun nia objetivu mak entre estudante sira ho manorin sira bele hasoru malu no partilla sira nia esperiensia oinsa mak liu hosi prosesu aprendizajen husi materia tolu ne’e, nune’e estudante sira bele lembra hikas istória Timor-Leste nian” Nia salienta.
Enkuantu Diretor Jeral Ensinu Sekundariu, Deolindo da Cruz afirma, atividade kompetisaun sertame ne’e sentru chega realiza tamba parseria ho Ministeiru Edukasaun (ME) hodi halo teste ba estudante sira ligadu ho disiplina ne’ebe sira hetan iha eskola liu-liu realsa fila fali kona-ba istoria, direitos umanus no sidadania.
“Inisiativa chega serbisu hamutuk ho Ministeiru Edukasaun hala’o atividade importante tebes, oinsa ita nia estudante hosi eskola sira bele mai partisipa para atu promove sira nia koiñesimentu no partilha sira nia abilidade liga ho disiplina sosiais, direitos humanos no cidadania, Timoroan hatene nia historia atu hatene nia identidade liuliu liga ho nia prosessu luta ba ukun rasik an nian”.
Nia hatutan, parte Ministériu Edukasaun hala’o monitorizasaun hodi observa direita atividade sertame refere, tamba antes ne ME observa estudante barak laiha vontade atu aprende no hatene kona-ba istoria no identidade Timor-Leste nian.
“ME observa ita nia joven, foinsa’e barak mak ladun iha interese atu koinese no aprende ita nia identidade no istória rasik, tanba ne’e mak eventu ida importante para ita bele loke oportunidade ba ita nia estudante sira atu mai kompete oinsa sira bele hatudu sira nia koiñesimentu sira ho nia kolega sira”. Nia sublinha
Nia salienta, aleinde ida ne’e ME nia preokupasaun bo’ot ida mak publiku nia akompanhamentu iha tinan kotuk, kuda sentidu de espiritu patriotismu, nasionalismu ba foinsa’e sira atu iha konesimentu, iha mós referemdum iha prossesu de independensia ne’ebe ho lolos.
Entretantu, atividade kompetisaun sertame refere parte komisaun organizadora deside kada eskola eskoilha estudante nain tolu (3) mai husi eskola primaria no sekundáriu iha 13 akompanha ho professores sira, nune’e estudante sira sei pasa faze por faze, hafoin estudante ka eskola sira ne’ebe sai vensedor sei hetan prémiu ne’ebe komisaun organizadora prepara ona.
Jornalista: Dircia Baptista