APC : Ema 1 Mate Tan Sa’e Ai, Komunidade 38 Sai Afetadu Ba Dezastre
Imajem : Portavoz CNOPC-APC Nelson Orleans Nunes
SAPNewsTL, Díli – Autoridade Proteção Civil (APC – sigla portugues) halo konferénsia imprensa hodi atualiza situasaun dezastre naturais durante semana ida hamutuk neen (6) no númeru ema afetadu tolunulu resin-ualu (38).
Hahu iha loron 25 novembru to’o 02 dezembro 2024, durante semana ida iha rejiaun Timor-Leste normal akontese tipu dezastre naturais hamutuk neen (6) no ema ida lakon vida kauza hosi sa’e ai.
Portavoz CNOPC-APC Nelson Orleans Nunes hatete, APC rejistu kazu dezastre naturais hanesan anin sobu uma haat (4), bee sa’e (2), tolu maka prense kriteria, ema ida lakon vida, apoiu emerjensia tolu (3) no númeru afetadu (38).
“Ami rejistu kazu dezastre naturais mak hanesan anin sobu komunidade nia uma (4), bee sa’e (2), prense kriteria (3) no ema na’in (1) mate, nune’e apoiu de’it emerjensia (3) no númeru ema afetadus (38)”. Dehan Portavoz CNOPC-APC Nelson Orleans Nunes iha APC Caicoli, 02/12/2024.
Nelson Orleans Nunes haktuir, dezastre sira ne’e akontese iha munisípiu Aileu anin sobu uma ida (1), Bobonaro anin sobu komunidade nia uma ida (1), iha postu administrativu Atsabe vitima ida lakon vida kauza husi sa’e ai.
“Iha munisipiu sira hanesan munisípiu Aileu, postu administrativu Remexio, Aldeia Samalete, iha loron 26 Novembru 2024 akontese anin sobu komunidade nia uma ida (1). Iha munisípiu Bobonaro, postu administrativu Cailaco, suku Ohoana iha loron 25 Novembru 2024 akontese anin sobu komunidade nia uma (1), iha postu administrativu Atsabe, suku Aidabaleten, aldeia Harame iha loron 29 Novembru 2024 akontese vitima ho naran Vasco Angelino lakon vida kauza husi sa’e ai mak monu no mate fatin. Iha munisípiu Ermera, postu administrativu Hatulia A, suku Ailelo, aldeia Betepu akontese anin sobu Komunidade nia uma (1)”. Nia afirma.
“Iha Municipiu Díli, postu administrativu Dom Aleixo, suku Bebonuk, aldeia Metin akontese be’e sa’e afeta komunidade nia uma rua (2) maibe la tama kategoria no hetan deit apoiu emerjensia, iha Suku Comoro, aldeia Golgota akontese anin sobu komunidade nia uma (1) maibe la tama kategoria no hetan de’it apoiu emerjensia”. Nia hatutan.
Nia afirma, komandu APC munisipal ho parte relevante fornese ona asistente emergensia ba familia afetadu ho ai-han no laos ai-han (food item & non-food item), sira sei kontinua halo levantamentu ho detallu ba sasan estragus no lakon.
“Komandu APC munisipal ho parseirus relevante fornese asistensia emerjensia ba familia afetadus sira mak hanesan ai-han no la’os ai-han”.
“Komandu Operasional Autoridade Protesaun Sivil (APC) munisipiu sira sei kontinua halo hela levantamentu detallus kona-ba sasan ne’ebe estragus no lakon. Assaun ka intervensaun ba dezastre hira ne’e komando APC munisipal sira halo ona assesmentu no verifikasaun hodi fó apoiu emerjensia”. Nia hakotu.
Jornalista : Dircia Baptista Belo
