Hari’i Durante Tinan 4 ! Governu Sobu Deit Iha Minutu Balun Nia Laran
Imajem : Uma komunidade ne’ebe hetan eviksaun husi Ekipa SEATOU iha loron 04/01/2025
SAPNewsTL, Dili : Governu liu hosi Sekretariu Estadu Asuntu Toponomia no Organizasaun Urbana (SEATOU) Germano Santa Dias Brites hala’o despezu administrativa ba uma komunidade hamutuk 288 iha Fomentu II.
Komunidade Nicolau Cab sente triste no lamenta tanba governu liu hosi SEATOU hasai sira la ho dignu maske sira hari’i uma ho durasaun tinan 4 molok hela iha laran.
“Ami sente triste tanba governu trata ami la ho dignu, sira haruka ami hodi husik hela fatin maibe la kria kondisaun ba ami, sobu ami nia uma ne’ebe hari’i durante tinan haat molok ami hela maibe konta deit minutu sobu rahun hotu”. Tenik komunidade Nicolau Cab ba SAPNews iha Fomentu II, 05/12/2024
Imajem : Nicolau Cab iha FomentuII II Suku Comoro, 05/01/2025
Nicolau hatutan, uma ne’ebe nia konstrui mai hosi rezultadu suru rai-henek, mahon ne’e uza hodi buka moris no oan sira hela ba eskola buka matenek maibe pasiensia tenki husik tamba hakruk ba desizaun governu nian.
“Ha’u hari’i uma ne’e hahu iha tinan 2006 liu hosi rezultadu suru rai-henek no faan sasan, ami uza uma ne’e hodi hela, ba buka moris no oan sira ba eskola, maibe governu mai sobu ona fatin ne’ebe ami hela, ami simu no koopera ho sira”.Nia sublinha
Nia deklara, familia sira prontu hodi husik hela fatin no fila fali ba rai moris fatin, Rejiaun Administrativa Espesial Oe-Cusse Ambenu (RAEOA), Sub-Rejiaun Nitibe.
“Ami prontu atu husik hela fatin no fila ba munisipiu maibe ami husu atu fasilita ami nia transporte hodi tula sasan no oan sira ba rai moris fatin”. Nicolau deklara
Tuir dadus ne’ebe SAPNews asesu katak komunidade afetadu ba eviksaun no risku dezastre natural ne’ebe identifikadu hodi husik hela fatin iha area Fomentu II hamutuk atus rua ualunulu resin-ualu (288).
Entre uma 288 ne’ebe hetan eviksaun inklui Kompanha Kafe Atsabe ne’ebe loke kafetaria no loza boot ida ne’ebe hetan aluga hosi Xineza ida iha Fomentu II.
Fo hanoin fali katak, asaun eviksaun ne’e mosu tanba iha loron 1 Fulan Janeiru 2025 udan boot rezulta mota tama uma komunidade ne’ebe hela iha fatin risku ka mota laran maske iha tinan 2024 governu liu hosi SEATOU halo ona dialogu ho komunidade afetadu sira.
Imajem : Uma komunidade ne’ebe hetan eviksaun husi Ekipa SEATOU iha loron 04/01/2025
Tuir observasaun SAPNews iha terrenu nota katak despezu administrativa ne’e sobu uma mutin barak no uma andar hirak ne’ebé komunidade sira konstrui ho sira nia kasar-ween, sakrifisiu no dedikasaun tomak.
Komunidade sira hahu arruma ona sira nia sasan no tula ba karreta hodi lori fila ba hela iha munisipiu no fatin sira ne’ebe sira prepara ona.
Jornalista : Ekipa Kobertura
