Importánsia Kultura Barlakiadu ! Rekunhese Iha Kódigu Sivil Artigu 1478°

SAPNewsTL, Dili : Kultura nu’udar identidade povu Timor Lorosa’e nian, Kultura hanesan eransa ne’ebe bei-ala sira husik hela husi jerasaun ida ba jerasaun seluk, iha ne’ebe kada jerasaun sempre hatutan obra kultural ida ne’e hodi hametin relasaun famliar.

Tuir definisaun Barlake husi iha lian português haktuir; “ Barlake é uma atitude típica do povo timorense que leva a um contrato matrimonial segundo os usos e costumes tradicionais: origina uma troca de bens de valor equivalente entre as famílias dos noivos. A família do noivo deverá dar búfalos, cavalos, cabritos, Belak (um medalhão timorense) e uma espada, o Surik. (http://www.prof2000.pt/…/comefeito10/curiosidades.htm).

Barlake ne’ebe sai ona eransa husi beiala sira, jerasaun ba jerasaun sempre banati tuir no transmite ba nia oan no beioan sira, nune’e hafoin ukun rasik an Estadu Timor Leste hakerek no define mos iha Kódigu Sivil Timor Leste nian Lei Nú. 10/2011, 14 de Setembru liliu iha lei kódigu sivil Timor-Leste Artigu 1475º kona ba (Casamento civil, católico e barlaqueado monogâmico), haktuir katak Kazamentu fahe ba tolu kazamentu sivil, kazamentu katóliku no kazamentu kabarlake.

Artigu 1478° kona-ba kazamentu barlakiadu monogámiku, no Artigu 1479° kona-ba Kazamentu Urgente Bazeia ba Kódigu Sivil Timor Leste.

Munisipiu Lautém eziste postu administrativu neen hanesan Iliomar, Lore, Lospalos, Tutuala, Lautém no Luro, iha munisipiu ne’e sempre koalia kona ba kultura Lia Moris, Lia Mate no Barlake.

Uma-lisan Marapaki-Ratu hosi postu administrativu Lautém no uma-lisan Suale pertense postu administrativu Luro realiza serimonia barlake, familia rua hasoru malu, fetosan no umane aseita hodi oan na’in 2 hosi sira moris hamutuk ka forma uma ka’in liu hosi dalan kultura barlakiadu.

Feto foun nia aman hosi uma-lisan Suale, Armando Dias Soares hateten fetosan no umane hasoru malu atu fo respeitu ba malu hodi depozita responsabilidade ba oan sira bele hadomi malu to’o rohan.

“Fetosan no Umane respeitu malu tanba ita hatudu ita nia kultura ne’ebé desde Portugés seidauk tama Timor, ita nia beiala no avó sira hatur nanis ona koba-ba moris no futuru, ohin ita hatutan saida mak uluk sira halo”.

“Responsabilidade iha ita nia kabaas hodi kontinua, ita halo kultura barlake hodi fo responsabilidade ba sira hodi hadomi malu, familia hadomi malu, ami hadomi ita boot sira no ita boot sira mós hadomi ami, ne’e mak importante tanba riku ne’e ita empresta de’it”.

“Ita nia avó sira eduka ita katak wainhira halo tuir didiak ita nia kultura, ita nia jerasaun nunka mais atu falla, wainhira la halo tuir ita nia jerasaun sei hasoru problema”. Hatete Armando Dias Soares iha Bekora, postu Cristo Rei, 11/01/2025

Joaquim de Jesus Vaz hosi uma-lisan Marapaki-Ratu fo agradese ba familia Suale tanba bele hamutuk realiza serimónia barlake no prenda oan na’in rua sai família uma-kain ida iha sira nia leet.

“Lori familia Marapaki-Ratu nia naran fo agradese ba família Suale tanba bele servisu hamutuk halo prenda, ita espera sira sai família nazaré ne’ebé di’ak no ezemplu ba sosiedade Timor-Leste, mai ita hotu reza ba sira hodi sai familia forte no ba oin nafatin”.

Mane Foun, Melkyor Vaz Dias Quintas orgullu no agradese ba Maromak no Matebean sira tanba bele fo matak no tulun hodi realiza serimonia barlake.

Mane Foun Melkyor hatutan, familia rua ne’e hamutuk tanba mai hosi kultura antigu ne’ebé avó sira hatudu, ohin la halo dalan foun maibé hafoun dalan ne’ebé tuan.

“Família boot rua ne’e la’os foun, maibé familia rua ne’ebé iha dalan tuan, ohin ita hafoun dalan ne’e, entaun hanoin foun ne’ebé mosu hodi forma uma-kain foun liu hosi barlake ne’ebé familia rua halo”.

“Lilita Soares Dias sai ha’u nia fuan sorin, obrigadu barak ba imi hotu nia suporta, ami rua laiha buat ida atu oferese maibé kalan ne’e ami sente imi nia domin, serimónia ne’e bele sai ezemplar ba alin sira ne’ebé iha ami nia kotuk, ami rua sei foti responsabilidade ba família rua ne’e”. Melkyor sublinha

Durante serimónia, familia hosi uma lisan Marapaki representa hosi oan mane tau Brinkus, Kadili no Korenti ba feto foun hosi uma lisan Suale, enkuantu familia hosi uma lisan Suale representa hosi oan mane tara tais ba nia mane foun hodi simboliza katak relasaun entre familia rua sempre metin no fo responsabilidade ba nia rian hodi kuidadu no hadomi ninia feto foun.

Feto foun Lilita Soares Dias no mane foun Melkyor Vaz Quintas, sira nain rua tau kadili ba malu hodi simboliza domin no uma-kain ne’ebe hari’i sei metin, buras no laiha ida mak sei hafahe.

Kultura Barlakiadu ka Hafolin malu entre fetosan no umane sai ona mata dalan ba sosiedade hodi hametin relasaun entre feto ida no mane ida ne’ebe forma uma kain ida, kultura ne’e atu kesi metin relasaun entre familia fetosan no umane husi jerasaun ba jerasaun, nune’e kultura barlakiadu nu’udar baze ba relasaun família ne’ebe hari’i uma kain.

Nune’e, Barlake hanesan parte ida husi sistema tuan adat ka lisan nian ne’ebe desenvolve liu ona tinan rihun ida liu ba husi beiala sira hodi regula sosiedade iha ambiente difisil, portantu, Barlake regula familia sira no sosiedade hodi foti no hametin solidariedade no armónia sosial sira.

Normalmente, sosiedade ida-idak iha nia kultura no lisan, maske nia lala’ok la hanesan. Husi lala’ok ne’ebe diferente, mak ema deskobre katak, kultura ou lisan iha Timor-Leste mesak furak. Kultura hirak ne’e husi kedas Bei-ala sira, maske balun emita ona ho rai seluk. Sistema Barlake ne’ebe aman-inan, avo no tiu sira pratika wainhira oan feto to’o ona tempu atu forma uma kain.

Kazamentu sivil mak kazamentu ne’ebe registradu iha notariadu ne’ebe ho fixa família, Katóliku maka kazamentu ne’ebe selebra iha igreja no Kazamentu Barlake Monogámiku mak kazamentu ne’ebe familia husi noivu no noiva hasoru malu ne’ebe hanaran fetosan no umane.

Munisipiu ida-idak iha nia kultura no lisan, maske nia lala’ok la hanesan. Kultura hirak ne’e husi kedas Bei-ala sira, maske balun emita ona ho rai seluk.

Barlake sasin uluk relasaun ida, atu família sira bele apoiu malu iha loron ikus wainhira infrenta difikuldade. Legaliza kazamentu kulturalmente. Barlake maka kustume ida ne’ebe Timor Leste iha, atu hanai no simu malu sai fetosan no umane.

Jornalista : Daniel da Silva & Marciana da Conceição