SEFOPE, Rogério Promete Hasa’e Saláriu Mínimu Ba $150 Kada Fulan

Imagem : SEFOPE Rogério Araújo Mendonça iha Salaun Timor Lodge, 15/01/2025

SAPNewsTL, Díli — Problema saláriu minimu ba trabalador iha Timor-Leste ne’ebe pendente durante tinan barak, Sekretáriu Estadu Formasaun Profesionàl no Empregu (SEFOPE) Rogério Araujo Mandonça kompremetidu sei rezolve problema  refere durante mandatu.

Tuir Sekretáriu Estadu Formasaun Profesionàl no Empregu Rogério Araujo Mandonça hateten, nia parte sei solusiona problema salariu minimu ba trabalador sira iha teritoriu nasional, tuir dezisaun ne’ebe nia rasik promete ba públiku.

“Saláriu minimu ne’e ita sei rezolve, maibé tempu mak ha’u seidauk determina, ha’u kompremetidu ba públiku katak ha’u sei rezolve problema saláriu minimu iha Timor-Leste”. Dehan Sekretáriu Estadu Formasaun Profesionàl no Empregu (SEFOPE) Rogério Araujo Mandonça ba jornalista sira, iha salaun Multifunsional Timor Lodge, Quarta (15/01/2025)

Nia akresenta projetu lei hodi solusiona problema saláriu minimu parte SEFOPE hato’o ona ba Konsellu Ministru hodi diskute, maibé Konsellu Ministru orienta SEFOPE atu hala’o chek up ba proposta refere molok submete ba Konsellu Ministru hodi diskute.

“Proposta ami lori ona ba Konsellu Ministru, hafoin Konsellu Ministru haruka fila fali mai SEFOPE hodi hadia pontu balun ne’ebe ita sei hadia, entaun parte SEFOPE sei halo komfirmasaun detailhu hodi diskute, nune’e hetan ona aprovasaun husi Konsellu Ministru, SEFOPE sei halo komfirmasaun ho Ministériu relevante sira hodi hasa’e trabalador sira nia salariu kontrolu ho presu merkadoria”.

Entretantu, antes ne’e Sekretáriu Estadu Formasaun Profesionàl no Empregu SEFOPE Rogério Araujo Mandonça informa, valor husi salariu minimu bazeia ba esbosu ne’ebé SEFOPE prepara mak sei hasa’e  salariu husi $ 115, $135 to’o $150.

Jornalista: Guilhermino Ramos da Cruz