MAE Lansa Loron Konsulta Popular, Paz No Estabilidade La Monu Husi Lalehan
SAPNewsTL,Dili: Ministru Administrasaun Estatal Miguel Carvalho halo Lansamentu Ofisial Ba Komemorasaun Loron Konsulta Popular ba dala XXIII (23) ne’ebé maka sei selebra iha loron 30 fulan Agostu tinan 2022, Ministru ne’e hateten tema ba komemorasaun maka ho Espiritu Loron Konsulta Popular 30 de Agostu 1999, Mai Ita Hametin Páz no Estabilidade ba Dezenvolvimentu Timor-Leste
Tuir Governante ne’e hateten lansamentu ida ne’e hakarak atu prepara molok hakat ba iha selebrasaun nian hodi bele hanoin no reflete kona-ba saida maka Governu sira halo tiha ona, saida maka sira seida’uk halo no hein atu realiza iha tempu tuir mai.
“Ita hotu hatene katak hafoin 5 de Maio 1999 Organizasaun das Nasoens Unidas nian konsege hola parte rua (2) hanesan Poténsia Administrante Divires Governo Português no Poténsia Adminstrante de Faktu husi Governu Indonesia atu tur hamutuk hodi konkorda malu no buka solusaun ida di’ak liu ba kazu Timor nian no kumpri programa Nasoens Unidas nian kona-ba autodeterminasaun, UNAMET hala’o konsulta Popular ba ema Timor oan sira hodi rona no komprende sira nia hakarak liu husi opsaun rua katak Ukun rasik an ka Integra ba Indonesia hodi sai hanesan rejiaun autonomu ida”. Dehan Ministeriu Estatal Miguel Carvalho ba Jornalista sira iha Estadium Nasional Munisipiu Dili, Sexta-Feira, 5/08/2022.
Ministru ne’e aumenta tan katak komisaun organizadora diskute ona kona-ba tema ba loron konsulta popular iha tinan ida ne’e nian.
“Tinan ida ne’e komisaun organizadora hafoin hala’o debate lubuk ida kona ba tema reflesaun nian maka ikus mai determina atu sai hanesan tema reflesaun ba komemorasaun ba tinan 2022 maka ho Espiritu Loron Konsulta Popular 30 de Agostu 1999 Nian Mai Ita Hametin Páz no Estabilidade ba Dezenvolvimentu Ita Nia Rai Timor Leste Ida Ne’e”. Tenik nia.
Enkuantu Ministru ne’e hatutan objetivu husi tema ba reflesaun konsulta popular nian mak oinsa lori ema hotu ba hanoin kona-ba realidade konsulta popular no ema hotu bele harii paz no estabilidade ba dezenvolvimentu Timor nian.
“Espiritu konsulta popular ohin loron nian iha Timor independente tenki nafatin hetan ninia sentidu iha ita ida-idak nia kosiénsia katak ita hakna’ar an iha espasu governasaun nian, tantu iha intituisaun públika ka privadu,ita tenki buka parseiru estadu Timor Leste nian hodi bele harii Paz no estabilidade dezenvolvimentu liu husi prosesu ida adekuadu ba konsulta popular”. Tenik nia
Nia akresenta, ema hotu presiza iha vontade popular no bele hakat ba oin; konsulta popular hanesan persepsaun ida ne’ebé bele akumula inspirasaun popular no asenta lolos fundamentu ba inisiativa paz no estabilidade
“Paz la’os buat ida ne’ebé monu husi lalehan maibé ita hotu tenki buka realiza paz iha ita ida-idak nia konsiénsia, konsulta popular hanesan inspirasaun ida ne’ebé bele revolusiona no hafoun ita nia Nasaun bainhira atu deside dezenvolvimentu ba ita nia País“. Hatete Nia
Entretantu, guvernu preve orsamentu por volta de Sein Mil Dolares Amerikanu, komisaun organizadora sei realiza atividade hahú husi loron 05-30 de Agustu ho modalidade desportu komunitária sira iha munisipiu sira maka hanesan kompetisaun futebol, voleibol iha suku, Postu Administrativu no Nivel Munisipiu inklui seminariu nasional no marsa saudavel.
Jornalista : Pascoela da Conceição
Editor : Antonina Lopes da Silva