Dialogu Iha Ainaru, PR Horta : Kria Unidade Fokus Ba Desenvolvimentu Reduz Sub-Nutrisaun

SAPNewsTL, Ainaro : Relasiona ho Eleisaun Parlamentar Iha tinan 2023, Presidente da Republica José Manuel Ramos Horta no Membru Governo Balun halo Dialogo ho populasaun sira iha Munisipiu Ainaro ho Tema KULTURA BA DAME, iha Diskursu Presidente Repúblika hateten Kultura Ba Dame hanesan biban ida atu komunidade apresenta sira nia preokupasaun ba Governo no hametin kultura Dame iha Sosiedade Timor-Leste

“Halo Dialogo hodi rona imi nia preokupasaun ruma, mai ho Membru Governo, Ita besik ona Eleisaun Parlamentar foun, Ita hotu bele kolabora atu labele iha instabilidade, atu labele fo impaktu ba ekonomia no povo nia moris, iha inisiu hanesan Presidente, Ha’u buka kedas Dialogo Nasional ho Lider Sira, Presidente Parlamentu, Primeiru Ministru tanba sai Presidente diak presiza hetan informasaun husi Governu”. Dehan Presidente da Repúblika Jose Ramos Horta Iha Salaun Paroquia Ainaro Sexta-Feira ne’e (05/08/2022).

Aleinde ida ne’e, Presidente da Repúblika mos iha inisiativa hakarak realiza programa Tour de Timor, Dili Marathona, Festival kultura Ramelau no programa seluk tan, hodi kontribui ba promosaun Paz no Estabilidade hodi tulun governu hodi hala’o prosesu desenvolvimentu.

“Iha Primeiru Presidensial 2007, Ita foin sai husi krize, Ha’u kria Tour de Timor, Marathona Internasional, Festival Kultura Ramelau, Kail no ate halo konkursu Prezépiu nu’udar promosaun ba Dame iha Timor ba Mundu, tane governu kria unidade iha Rai-Laran, nune’e husik Governu fokus ba Desenvolvimentu iha Rai laran”. Dehan Presidente da Repúblika.

Relasiona ho programa Nutrisaun, Chefe Estadu promete sei apoiu Governu, hodi kombate subnutrisaun iha Timor-Leste.

Entretantu, Iha Dialogo ne’e, Administrador husi Maubisse, Hatubuilico, Hatu-Udo, no Ainaro Villa, apresenta Preokupasaun kona ba estrada aat, eletrisidade, asesu ba bee, saude no mos preparasaun ba Selebrasaun Loron Proklamasaun Independensia 2022 ne’ebe sei halao iha  Municipio Ainaro.

“Tinan ne’e selebrasaun loron proklamasaun Independensia 2022, sei halao iha Ainaro, maibe ami nia estrada husi Postu mai Villa ladiak, nune’e mos idozu  no ema ho defisiencia balun lakon direitu, no Mal-Nutrisaun kontinua aas” Informa Administrador Postu Administrativu Ainaro Villa, Agapito de Fatima.

Enkuantu,  Tuir Sensus 2010, Ainaro iha habitantes hamutuk 59.175, Munisipiu refere Iha potensialidade ba sektor Agrikultura no Turismu, portantu, marka prezensa iha Dialogu ne’e partisipa husi Membru Governu, Autoridade Lokal, Veteranus no komunidade husi Munisipiu Ainaro.

Jornalista : Vinsensius Morais Araujo

Editor       : Justino de Jesus Soriano