Komemora Proklamasaun Independénsia, Atoni Oan Loke Torneiu

SAPNewsTL, Dili : Movimentu Estudante Tane Oe-cusse sei loke torneiu Atoni Cup iha kapital Dili, Prezidente Komisaun Mateus Lopo hateten  Torneiu ida ne’e atu komemora Loron Proklamasaun Indepedénsia ba dala XLVII no hametin lasu amizade entre Oe-cusse oan iha Kapital Dili

 “Ita nia konstituisaun RDTL iha artigo 19^o fo dalan katak estadu tau fiar ba joven sira, oinsa bele hako’ak  metin Unidade Nasionál hodi kontribui ba prosesu Dezenvolvimentu Nasionál, objektivu prinsipal ne’e maka oinsa ita bele hametin lasu amizade entre Oe-cusse oan hotu ne’ebé maka mai buka moris iha kapital Dili”. Dehan nia ba jornalista sira iha Mataduro Dili 06/08/2022.

Prezidente Komisaun ne’e hatutan fundus ne’ebé hetan hodi apoiu aktividade desportu ne’e mai husi kontribuisaun Oe-cusse Oan sira, Instituisaun Privadu no Instituisaun Guvernu nian.

“Fundus ne’ebé ami hetan mai husi rejistu entre klube sira, karta Kontribuisaun ba Oe-cusse oan tomak, halo proposta ba instituisaun privadu sira no instituisaun  Guvernu, dadauk ne’e ita fo pedidu atu husu ekipamentus hanesan  Bola, Rede no Farda ba komisaun no mos nesesidade seluk ne’ebé maka koresponde ba Torneiu ne’e, ami fiar katak  proposta hirak ne’e sei hetan  resposta maske la barak”. Nia hateten

Entretantu, lider komisaun ne’e informa jogu ne’e sei hahú iha loron 14 fulan Agostu no sei remata iha loron 28 fulan Novembru.

“Prosesu  ba jogu ne’e, ita halo ona estimasaun sei hahú iha loron 14 fulan Agostu tinan 2022 no ita sei termina iha loron 28 Novembru tinan 2022 hodi komemora ita nia loron Proklamasaun Independensia ba dala XLVII (47)”. Nia informa

Enkuantu, tuir lista rejistrasaun ba Torneiu Atoni Cup ida ne’e hamutuk sanulu resin-hitu (17) husi Suku sanulu resin ualu iha Rejiaun Administrativa Espesial Oe-cusse Ambeno (RAEOA), portantu, Asosiasaun Movimentu Estudante Tane Oe-cusse hari’i iha loron 10 Fulan Maiu Tinan 2021 mai ho nia misaun no vizaun atu kontribui ba prosessu Dezenvolvimentu Nasionál

Jornalista :  Pascoela da Conceição  &  Antonina  Lopes da Silva

Editor        : Luis dos Santos