AUG 2022 Iha Tailandia, Atleta Timor Oan Oferese Medalla 4 Ba TL
SAPNewsTL, Dili : Eventu Regionál ASEAN University Games (AUG) 2022 iha Sidade Ubon Rachathani, Tailandia, Vise delegasaun Joviano Salves Reis hateten Atleta Universitáriu oferese medalla haat ba Timor-Leste husi modalidade atletizmu, taekwondo no voleibol praia,
“Ita nia atleta unviersitáriu ne’ebé partisipa no kompete iha eventu rezionál ASEAN University Games AUG 2022 ne’ebé realiza iha Ubon Rachathani-Tailándia, konsege manan medalla osan mutin 1 no osan metan 3, atleta Joel Savio Valente no Tito Miguel Morais Gusmão husi modalidade praia mós kontribui medalla osan metan ida”. tenik Vise Delegasaun Joviano Salves Reis ba jornalista SAPNewsTL liu husi via WhatsApp iha Tailandia domingu (07/08).
Vise Delegasaun ne’e aumenta, atleta Felisberto de Deus hetan medalla osan mutin ida kompete iha 5000 m no metan ida iha 10.000 m, Ana da Costa da Silva Pinto Belo hetan medalla osan metan ida
“Atleta Felisberto de Deus husi modalidade atletizmu konkista medalla osan mutin hafoin kompete iha kategoria 5000 m no hetan medalla osan metan ida iha kategoria 10000 m nian, atleta Ana da Costa da Silva Pinto Belo ne’ebé hetan medalla osan metan husi modalidade taekwondo ho klase kilograma 46 halakon atleta sira husi nasaun Laos no Malázia, atleta voleibol praia Timor-Leste B ne’ebé kontribui mos medalla osan metan 1 hafoin halakon nia adversáriu sira husi ekipa Timor-Leste B iha jogu hadau pozisaun datoluk”. tenik Joviano
Joviano informa, medalla halo Timor-Leste okupa pozisaun 10 husi nasaun 11, federasaun agradese atleta sira ne’ebe kompete ho dignu no fo orgullu ba nasaun Timor-Leste
“Prestasaun hirak ne’e halo ita nia nasaun Timor-Leste okupa iha pozisaun 10 husi total nasaun 11 ne’ebé mak partisipa iha AUG tinan 2022 ne’ebe Federasaun Desportu Akadémiku Timor-Leste (FDA-TL) agradese ba solidariedade no lia-murak sira ne’ebé enkoraza ona ita nia atleta sira hotu hodi kompete ho dignu no hein katak kompetisaun sira tuir mai ne’e, atleta universitáriu sira sei bele konkista tan prestasaun diak liu nune’e bele lori orgullu ba povu Timor-Leste”. Xefi Delegasaun hateten
Nia rekomenda, governu presiza apoiu federasaun sira liu husi kompetisaun regular interna institutu ka universidade sira iha Timor-Leste
“Ita nia governu presiza apoiu federasaun sira liu husi kompetisaun regulariu interna universidade no institutu sira inklui kompetisaun entre universidade sira hodi bele melloria kualidade atleta sira molok partisipa iha AUG tuir mai, hanaruk periodu treinamentu intensivu ba atleta sira atu atleta selesinadu sira bele halo preparasaun masimu, presiza mos iha try out barak nune’e bele melloria mentalidade ita nia atleta sira nian”. Nia hatete
Reportajen : Augusto dos Santos
Editor : Ekipa Editorial