Asegura Polítika Jéneru ! Lígia : “Valoriza Diversidade, Hari’i Sosiedade Ne’ebe Metin Ho Nasionalismu”.
Imajem : Vise Reitora Asuntu Estudantil UNTL Lígia Tomas Correia iha Auditóriu FCS-UNTL Kaikoli,29/05/2025
SAPNewsTL, Díli : Relasiona ho loron restaurasaun independénsia ba dala-XXIII, Vise Reitor Asuntu Estudantil UNTL Lígia Tomas Correia hateten UNTL sempre asegura polítika jéneru no valoriza diversidade hodi hari’i sosiedade ne’ebe metin ho espíritu nasionalismu.
Gabinete Vise-Reitora Asuntu Estudantis, Universidade Nasional Timor Lorosa’e (UNTL) organiza programa “Café Género” (Conhecimento com Abordagem de Forma Ética)”
Marciana da Conceição – SAP News TL
Objetivu realiza programa refere atu fó vizibilidade ba igualdade entre feto no mane, atu asegura politika igualdade jéneru, naun diskriminasaun no naun violénsia iha rai laran através komprimentu ba prinsipiu Ensinu Superiór nian liuliu iha parte ensinu hodi kontribui ba prevensaun Violénsia Bazeia ba Jéneru.
Vise Reitora Asuntu Estudantis Ligia Tomas Correia hateten, 20 de maio laos selebra deit liberdade polítika maibe reforsa tan komprimisiu ho independensia ne’ebe klean, fó liberdade ba ema hotu hodi koalia la haree ba jeneru.
“Ohin, ita la selebra de’it liberdade polítika, maibé reforsa ita-nia kompromisu ho independensia ne’ebé kle’an liu, liberdade ba ema hotu-hotu atu bele koalia tantu mane no feto”. Hateten Vise Reitora Asuntu Estudantis Ligia Tomas Correia iha Auditóriu Fakuldade Siensias Sosiais – Kaikoli Kuinta-feira, 29/05/ 2025.
Nia akresenta, istória Timor-Leste hakerek ho sakrifísiu mane no feto ne’ebe hulan rezisténsia no esperansa, maibe eróina klandestina barak ne’ebe naran nunka tama iha livru istória.
“Istória Timor-Leste nian hakerek ho sakrifísiu mane no feto sira ne’ebé hulan rezisténsia no esperansa. Feto barak, hanesan eróina klandestina, sira-nia naran nunka tama iha livru istória, maibé sira-nia funu mak semente ba igualdade ne’ebé ita buka ohin loron”. Nia subliña.
Vise Reitora informa, programa refere hodi transmite ba sidadaun sira atu valóriza diversidade no hari’i sosiedade ne’ebe metin ho espíritu nasionalismu no patriotizmu.
“Programa ida ne’e organiza husi Gabinete Politika Genêru UNTL nian, la’ós debate akadémiku, maibe bolu ita hamutuk atu hatudu asaun, nu’udar universitáru iha misaun atu transmite ba sidadaun sira, atu valóriza diversidade no hari’i sosiedade ne’ebe metin ho espíritu nasionalismu no patriotismu”. Nia esklarese.
“Ita agradese ohin loron marka prejensa iha programa Kafé Genêru ida ne’e, orador prinsipal sira, Feto no Mane ne’ebe marka mos historia iha prosesu ba Libertasaun Nasional. Sira-nia istória atu inspire estudante sira ho diálogu no liuliu atu transorma iha pratíka”. Nia konklui
Iha fatin hanesan, Senadu Jeral Universidade Nasional Timor Lorosa’e Cejar João konsidera partisipasaun feto importante tebes iha tempu funu no tempu ukun an.
“Igualdade jeneru liu-liu partisipasaun feto nian importante loos, figura Roza Buki Bonaparte iha ne’ebe nia konsolida feto timoroan hotu hodi hatete deit katak la aseita ho prezensa imperalismu iha iha rai”.
“Figura importante ida tan maka ita-nia maen, veterana ida husi Liquiça, nia feto ida ne’ebe hari’i rasik eskola ho pensaun ituan ne’ebe estadu atribui ba nia, se feto hotu-hotu iha Timor-Leste liuliu akademista no feto sira ne’ebe servisu diak ho pensamentu hanesan, feto iha Timor ne’e sei diak no influensia boot”.
Sensibilizasaun ne’e hetan partisipasaun maksimu hosi estudante Universidade Nasional Timor Lorosa’e (UNTL).