Leão XIV Krítika Polarizasaun Global & Husu “Halakon Hamlaha Iha Mundu”.
Imajem : Papa Leão XIV. Foto : Vatican News
SAPNewsTL, Vaticano : Iha âmbitu Konferénsia ba dala 44° no selebra tinan 80 Organizasaun Nasoens Unidas ba Ai-han no Agrikultura, Papa Leo XIV krítika polarizasaun global no husu komunidade internasional hodi halakon hamlaha iha mundu.
Marciana da Conceição – Mídia Sapnews / Fontes – Vatican News
Iha ninia testu, Amu-Papa denunsia uza hamlaha hanesan arma funu nian, kritika polarizasaun globál no husu ba komunidade internasionál atu atua ho korajen no fraternidade hodi halakon hamlaha iha mundu.
Bainhira dirije ba Diretór-Jerál FAO nian, Qu Dongyu, no delegasaun sira ne’ebé marka prezensa, Santu Padre espresa preokupasaun kle’an kona-ba agravamentu inseguransa ai-han nian iha mundu no alerta katak “seguransa ai-han globál kontinua sai aat liután, hodi halo sai la provável katak objetivu ‘Zero Hamlaha’ hosi Ajenda 2030 nian sei atinji”. Hatete Papa Leão XIV liu hosi iha Vaticano, 01/07/2025. Sita Vatican News
Amu-Papa denunsia no konsidera uza hamlaha ne’ebé aumenta ba beibeik nu’udar instrumentu funu nian:
“Sunu ai-horis, na’ok balada hakiak no blokeia ajuda umanitária hanesan tátika sira ne’ebé uza hodi kontrola populasaun sira ne’ebé laiha defeza. Hamlaha hanesan dalan baratu ida atu halo funu.”
Leão XIV kritika lójika ne’ebé permite ema sivíl sira atu terus iha kiak nia laran, enkuantu elite polítika sira sai riku liuhosi korrupsaun no impunidade, no alerta kona-ba nesesidade atu ultrapasa era slogan sira no promesa mamuk sira.
“Adia solusaun sira aumenta de’it sofrimentu. Tempu to’o ona atu nakfilak liafuan ba asaun konkretu”. Tuir Leo XIV, iha ligasaun direta entre krize klimátika, hamlaha no dezigualdade, no nia afirma katak sistema ai-han sira no mudansa klimátika sira influensia malu: “lahó asaun klimátika ne’ebé koordenadu, sei laiha seguransa ai-han.”
Amu-Papa kondena mós diversaun rekursu sira no teknolojia sira ba indústria armamentu nian, enkuantu ema millaun ba millaun sira kontinua hamlaha, no alerta katak polarizasaun ne’ebé aumenta estraga fraternidade, halo malirin relasaun umanu sira no hafraku komuñaun sosiál.
Pontífise husu ba komunidade internasionál atu sai artezanatu dame nian no fraternidade nian, Santa Sé sei iha nafatin servisu ba bem komún no ba sira ne’ebé vulneravel liu.
Santu Padre mos invoka Maromak nia bensaun ba serbisu FAO nian, atu nune’e bele fó fuan no benefísiu ba sira ne’ebé sofre liu no ba umanidade tomak.