Outubru, TL Sai Membru ASEAN ! Myanmar La Apoia & Malásia Suporta

Imajem : VMA-ASEAN Milena Rangel & Vise Presidente Senadu Parlamentu Malásia Datuk Nur Jazlan iha Dili, 02/07/2025. Foto : Média MEC & SAPNews

SAPNewsTL : Myanmar ofisialmente informa ona ba Malázia, Presidente Atuál ASEAN nian, katak sei la apoia Timor Leste nia adezaun iha fulan Outubru.

Pozisaun ofisiál Naypyidaw nian foin lalais ne’e hato’o ba Presidente ASEAN, hodi hateten katak Timor-Leste la konsege kaer metin prinsípiu la halo interferénsia ba asuntu internu, hanesan konsagra ona iha Karta ASEAN.

Tuir informasaun ne’ebe SAP News – TV asesu liu hosi Média PBS World Tailándia katak Konsellu Administrasaun Estatál (SAC) husu ba Timor Leste atu “hadook an” hosi envolve ho entidade sira ne’ebé esplísitu kontra ka iha konflitu ho pozisaun Estadu-membru sira ASEAN nian.

Entidade sira ne’e inklui Governu Unidade Nasionál (NUG), governu iha ezíliu, no forsa rezisténsia sira ne’ebé agora daudaun kombate hasoru junta militár.

Karta ne’ebé asina husi Han Win Aung, Diretór-Jerál no Líder Reuniaun Ofisiál Superiór Suplente (SOM) husi ASEAN-Myanmar, repete katak se governu Timor-Leste kontinua ninia violasaun klaru ba prinsípiu la-interferénsia iha asuntu internu Myanmar nian, “ita tenke rejeita ho firmeza konsiderasaun ruma kona-ba adezaun ba ASEAN ba Timor Leste.”

Iha simeira ne’ebé relasiona ho ASEAN iha fulan Maiu liubá, bloku nia líder sira konkorda atu admite Timor Leste nu’udar membru ba dala 11 liu hosi Simeira ASEAN ne’ebé sei mai iha fulan Outubru. Iha deklarasaun konjunta, dirijente sira fó kna’ar ba ofisiál relevante sira atu hala’o pasu prosedimentál sira ba admisaun Timor-Leste nian.

Myanmar insiste ona ba Presidente ASEAN no Sekretariadu ASEAN atu “suspende konsiderasaun prosesuál sira hotu ne’ebé iha relasaun to’o Timor Leste halo revizaun ba nia abordajen no hatudu kompromisu ida ne’ebé klaru atu hadi’a ninia polítika hasoru Myanmar”, tuir karta ne’ebé haree hosi PBS World Tailándia. Myanmar, 02/07/2025

Iha fulan-Maiu, Primeiru-Ministru Malázia nian, Anwar Ibrahim, hala’o konferénsia vídeo ida ho líder sira hosi Governu Unidade Nasionál, inklui Primeiru-Ministru Mahn Winn Khaing Thann, hafoin nia enkontru pesoál ho Jenerál Senior Min Aung Hlaing iha Bangkok hodi ko’alia kona-ba asisténsia umanitária no prosesu dame nian iha Myanmar

Konversasaun sira marka enkontru dahuluk ne’ebé rekoñese públikamente entre NUG no membru ASEAN ida.

Fontes hatutan tan katak durante Enkontru Ministeriál ASEAN ne’ebé sei mai iha loron 9–11 fulan Jullu, prezidente sei hasoru knaar delikadu ida hodi simu Timor-Leste enkuantu buka Myanmar nia apoiu.

Iha simeira Maiu, reprezentante Myanmar nian, Sekretáriu Permanente ba Negósiu Estranjeiru Aung Kyaw Moe, la fó komentáriu kona-ba kestaun adezaun Timor-Leste nian, sira nota.

Iha loron hanesan, Vise Ministra Asuntu ASEAN Milena Rangel reafirma katak Timor-Leste prontu atu sai membru ASEAN ba dala XI iha fulan Outubro 2025, Nia apresia mós ba Malázia tanba kontinua suporta adezaun Timor-Leste ba ASEAN.

Vise Presidente Senadu Parlamentu Malásia Datuk Nur Jazlan Bin Tan Sri Muhamad deklara kontinua iha komitmentu forte hodi apoia Timor-Leste nia adezaun ba ASEAN iha integrasaun rejional.

https://world.thaipbs.or.th/detail/myanmar-opposes-timor-lestes-asean-membership/5806