Jürgen Sente Laran Kanek, Lakon Ema Ne’ebe Hatene Hadomi & Kuidadu.
Imajem :
SAPNewsTL, España : Jogadór portugés Diogo Jota mate hafoin hetan asidente iha auto estrada A-52, iha España. Jürgen Klopp sente fuan kanek tanba ladauk konkista objetivu ne’ebe boot maibe rona katak Diogo Jota laiha ona.
Treinador Liverpool Jürgen Klopp hakerek katak, “Ida-ne’e maka momentu ida ne’ebé ha’u luta! Tenke iha objetivu ida ne’ebé boot liu! Maibé ha’u labele haree ida-ne’e! Ha’u laran-kanek bainhira rona kona-ba Diogo ho nia maun André nia mate”.
“Diogo la’ós de’it jogadór fantástiku ida… maibé nia mós belun di’ak ida, la’en no aman ida ne’ebé hadomi no kuidadu!”.
“Ami sei saudades tebes ita-boot! Ha’u nia orasaun, hanoin no kbiit tomak ba Rute, labarik sira, família, belun sira no ema hotu ne’ebé hadomi sira. Deskansa ho dame, Diogo… haruka domin”. Jürgen Klopp, Liverpool, 03/07/2025
Tuir informasaun ne’ebé SAPNews asesu husi CNN Portugál haktuir katak Diogo Jota mate ho idade 28, mate iha madrugada Kinta-feira loron 03 fulan Jullu 2025 tanba hetan asidente iha kilómetru 65 auto estrada A-52, iha área filacios de Sanabria, provínsia Zamora, España.
Kareta ne’ebé sira sa’e halai sai hosi estrada no ahi han, ho ahi-lakan ne’ebé namkari ba ai-horis sira. Kauza sira hosi asidente ne’e agora daudaun investiga hela hosi autoridade españól sira.
Imajem : Cristiano Ronaldo no Diogo Jota
Bainhira rona Diogo Jota mate, Cristiano Ronaldo mos hatete iha rede sosiál sita katak “Laiha sentidu, agora ita hamutuk iha selesaun nasionál, imi foin kaben”, hakerek Ronaldo, iha mensajen ida ne’ebé nakonu ho emosaun no la fiar.
Avansadu portugés aproveita hodi hato’o sentidu kondolénsia ba Jota nia família: “Ba família, feen no oan sira, ha’u haruka sentidu kondolénsia no dezeja forsa tomak iha mundu. Ha’u hatene katak imi sei hamutuk nafatin ho sira”.
Iha nia liafuan ikus sira, Ronaldo fó mós omenajen ba André Silva, Diogo Jota nia maun ne’ebé mós mate iha asidente ne’e, reforsa sentidu koletivu lakon nian: “Deskansa ho hakmatek, Diogo ho André. Ami hotu sei saudades imi”.
Mensajen Ronaldo nian fahe no hetan komentáriu barak, reflete impaktu ne’ebé sente iha mundu futeból no iha sosiedade portugés hosi mate prematura hosi jogadór talentu ne’e.