Mauputar Otimista Manan Ramelau Ho Jogador Estranjeiru Nain 4
Imajem : Jogador Mauputar FC no Ramelau FC
SAPNewsTL, Dili: Klube zigante Mauputar FC otimista manan klube zigante Ramelau FC iha abertura Liga Futsal Timor-Leste epoka 2025 tanba sira halo preparasaun masimu no reforsa husi jogador estranjeiru nain haat.
“Ami nia preparasaun masimu atu ba kompete iha liga futsal divizaun dahuluk epoka 2025, tanba ne’e ami optimis hodi rekolla pontu tolu husi Ramelau FC tanba tinan ne’e ami nia ekipa reforsa jogador estranjeiru, husi Indonesia nain tolu no Norwegia nain ida”, dehan asisten treinadór Mauputar Fc, Cristovão dos Santos ba jornalista sira liu husi komferensia imprensa ba iha Ademeki, Lecidere, kinta (17/07/2025)
Asistente treinador hatutan, sira mos iha ambisaun boot ida katak hakarak sai kapiaun ba Liga Futsal Timor-Leste iha epoka ne’e, ba liga tinan ne’e Mauputar FC lori jogador nain-23 kompostu jogador husi Indonesia nain tolu Norwegia nain ida no lokal nain-19.
iha biban hanesan, kapitaun ekipa futsal Mauputar Fc, Cesario Barreto, akresenta, hanesan jogador sente entuziasmu tebes atu enfrenta jogu iha aban.
“Ami antuziasmu tebes, tanba durante ne’e ami hein hela liga atu la’o, ne’ebe Liga Futsal Timor-Leste aban komesa ona, no ha’u fiar katak jogador mauputar hotu iha espiritu ne’ebé makas tebes ba jogu ida ne’e,” tenik Cesario
Cesario salienta tan, nia mos fiar tan katak aban sira bele hetan rezultadu pozitivu iha jogu abertura ne’e.
Treinadór ekipa futsal Ramelau FC, Joe Baptista, hatutan, sira sei hatudu buat ne’ebé sira iha ba jogu hasoru Mauputar FC depois rezultadu minute 40 mak determina.
“Ami prepara masimu, maibe atu manan ka lakon depois minute 40 mak sei determina, se mak manan no se mak lakon,maibe ha’u iha esperansa katak aban ha’u nia jagador sira sei hatudu jogu ne’ebé di’ak,” treinador hatete
Treinador informa tan, Ramelau FC rasik la iha jogador estranjeiru maibe sei reforsa de’it husi jogador lokal sira.
Sorin seluk kapitaun Ramelau FC, Joe Fernandes, otimista sei hatudu jogu ne’ebé di’ak hasoru ekipa adversáriu.
“Ha’u hanoin mauputar mai ho jogador estranjeiru, maske ami mai ho de’it jogador timoroan sira maibe ami nafatin esforsu hodi hatudu jogu diak kontra Mauputar FC maibe depois minutu 40 mak deteremina rezultadu lakon ka manan,”, Joe dehan