Hafoin Jogu CPLP ! Boxista Hamutuk Na’in 20 Sei “Fight” Iha Revolta Combat
Imajem : CEO Revolta Combat Xander Serrano ko’alia jornalista SAPNewsTL iha otel Novo Turismo Lecidere, Dili kuarta (16/07/2025).
SAPNewsTL, Dili: Boxista husi Timor-Leste no Indonesia hamutuk nain-20 prontu fight iha rin Revolta Combat season 1 iha loron 1 fulan agostu 2025.
“Ita nia preparasaun ba Revolta Combat tama 90%, hela 10% tama semana oin para ita simu boxista husi Indonesia, instalasaun ekipamentu iha jinajiu desportu Dili (GMT) iha loron 28 fulan jullu 2025”.
“Hein jogu CPLP 2025 remata,atleta kompete iha Revolta Combat hamutuk nain-20, nain-10 husi Timor-Leste no nain-10 husi Indonesia, atleta Timor-Leste kompostu husi amatir nain-9 inklui influencer nain ida no profesional nain ida hanesan mos atleta sira mai husi Indonesia, nune’e jogu (partai/laga) hamutuk 10”, dehan CEO Revolta Combat Xander Serrano ba jornalista SAPNewsTL iha otel Novo Turismo Lecidere, Dili kuarta (16/07/2025).
Xander hatutan, jogu iha Revolta Combat ne’e sei utiliza APB (Amatir Pro Boxing), boxista kompete iha jogu amatir 8, jogu ba influencer no jogu ida ba boxista profesional harame iha kompetisaun ne’e, klase atleta sira atu kompete mak husi 51 Kg to’o 71 Kg.
Nia informa tan, revolta Combat ne’e hetan apoiu husi Highland Legend, Metrolink, Telemor liu husi live iha TV Timor, Bee Leste, Otel Novo Turismo no parte MJDAC iha komitmentu atu apoiu depois jogu CPLP remata tanba daudaun MJDAC okupadu ho jogu CPLP maibe fatin jinajiu desportu Dili (GMT) MJDAC autoriza ona ba realiza Revolta Comba.
Ekipa arbitrajen nain neen ba jogu amatir nian sei mai husi Federasaun Boxe Amadora Timor-Leste (FBATL) tanba servisu hamutuk ho FBATL no ba jogu profesional arbitrajen nain rua sei mai husi Indonesia mai reforsa tan arbitrajen federasaun nian.
Nia salienta tan, boxista Timor-Leste nian mai husi klube Revolta Boxing Club, Oriental Boxing Club, Benfica Boxing Club, EL Matador Boxing Club, Mascarenhas Boxing Club no Dili Boxing Club, boxista Indonesia no boxista sira ne’ebe kompete ona iha PON no Sea Games.
Premiu ba manan nain sira husi amatir sei hetan medalla no sertifikadu, enkuantu ba profesional sei hetan sintu depois komisaun mos sei oferese orsamentu oituan ba manan nain sira.
CEO Revolta ne’e afirma tan, antes komisaun mos konvida boxista Indonesia Forlan Rivaldo atu kompete iha Revolta Combat maibe boxista Indonesia la konsege kompete tanba tinan ne’e nia sei ba kompete iha WBC Asia.
Deklarasaun kompletu bele akompanha entrevista hosi SAP News TL ho CEO Revolta iha Dili :
https://www.facebook.com/SAPNewsTimorLeste/videos/767118445975478/?mibextid=rS40aB7S9Ucbxw6v