Atleta Maria Clara Kontente Oferese Medalla Osan Mean Ba Portugal
Imajem : Atribuisaun Medalha ba manan na’in sira iha estádiu Munisipal Dili, 21/07/2025. Foto : Marciana da Conceição
SAPNewsTL, Dili: Atleta Maria Clara kontente oferese medalla osan mean ba Portugal husi modalidade atletizmu husi klase metru 3000 ho 10,25 segundus.
Ekipa Kobertura – SAPNewsTL
“Ha’u sente orgullu tanba konsege hatudu prestasaun di’ak iha eventu ne’e iha metru 3000 ne’e, ha’u esforsu ikus okupa duni manan nain dahuluk hodi hetan medalla osan mean hodi oferese ba Portugal,” dehan atleta Maria Clara ba jornalista sira iha fatin kompetisaun Estadium Munisipal Dili, segunda (21/07/2025).
Clara hatutan, halai ida ne’e maski ladún susesu hanesan tuir nia hakarak,maibe sufisiente para manán ida-ne’e maka importante, tanba nia hakarak kontinua marka rekord pesoál sira hodi hetan tan premiu nasionál no internasionál sira, hanesan nia halo tiha ona, no nia kontinua serbisu maka’as di’ak liután.”
Nia husu ba joven sira katak determinasaun no esforsu iha desportu importante tebes, tanba ne’e atu sai manan na’in tenke konsiente no labele rende.
Entretantu, atleta Maria Clara Monteiro Lucas Pires, regista ba kompetisaun númeru halai 300 konsege sai manan nain dahuluk halakon nia adversariu sira husi, Cabo Verde, Angola no Timor-Leste, nune’e oferese medalla osan mean ida ba portugál.
Jogu CPLP husi modalidade atletismu ne’e hala’o akumula atleta sira husi nasaun CPLP sira ko’alia lian portugés hanesan, Poptugál, Angola, Cabo Verde no Timor-Leste.
Kompetisaun atletismu Jogu desportivu komunidade nasaun sira ko’alia lian portugués (CPLP) ba dala-XII rezultadu hatudu impressionante, Portugal lidera tabela medalla sira ho total 7 medalla kompostu husi osan mean lima no osan mutin rua.
Medalla sira ne’ebé portugal rekolla mak hanesan, iha Lansamentu Peso 3 kg (Feto): Margarida Braz Simões Bento, 1500 Metros (Mane): Atleta Portugés manán ho tempu 4 minutu no 42 segundu.
Halai 3000 m (Feto): Maria Clara Monteiro Lucas Pires manán ho determinasaun boot, 100 m (Feto): Laura Branco Jorge da Silva Agostinho, 100 m (Mane): Tiago André Barros dos Santos
Rezultadu halai 3000 m mak Clara Monteiro Lucas Pires ho minutu 10:25.72, Cilbelle Rodrigues Delgado ho minutu 10:25.89 no Fatima Amaral Xavier ho minutu 11:24.02.
Rezultadu halai 1500 mane mak Butarita Rodrigues ho minutu 4:12.13 husi Portugal, Patrick Nascimento Silva 4:20.19 husi Cabo Verde no Martins Amaral ho minutu 4:25.43 husi Timor-Leste.
Rezultadu faze eliminasaun 100 m feto mane mak André Barros Dos Santos ho segundu 10.75 husi Portugal, Miguel Martinhos de Almeida ho segundu 10.76 husi Portugal, Alexandre Semedo Ramos ho 11.63 husi Cabo Verde, Branco Jorge da Silva Agostinho ho segundu 11.98 Portugal, Silva de Freitas ho segundu 12.28 husi Portugal, Carina Delgado Gomes ho segundu 12.44 husi Cabo Verde
