Sei Atua Demonstrante Iha UNTL, Natalício Deklara “Prontu”, Konsidera PNTL “Viola Lei”
Imajem : Porta voz EUTL Natalício Nunes iha Kampus Sentral UNTL Dili, 10/09/2025.
SAPNewsTL, Díli : Ligadu ho asaun demonstrasaun ne’ebé sei akontese iha 15 Setembru, Porta Voz Natalício Nunes informa Komandu Polísia Nasionál Timor-Leste (PNTL) la autoriza arredor Univeridade Nasionál Timor-Leste (UNTL) ba manifestante sira halo demo maibe sira la aseita no deklara prontu simu konsekuénsia.
Porta voz Estudante Universitariu Timor-Leste (EUTL) Natalício Nunes informa durante audiênsia ho Komandu PNTL laiha konsensu kona ba fatin atu halo manifestasaun hasoru Parlamentu Nasionál (PN), kona-ba desizaun sosa kareta foun.
“Ami hatama ona karta, ami halo karta liu loron rua sira la fo resposta, signifika aseita ona ami-nia karta, maibe orseik sira kontaktu ami liu hosi telefone katak atu halo audiênsia, nune’e ohin ami ba halo enkontru ho PNTL”.
“Iha enkontru, sira la aseita atu uza fatin arredor UNTL iha PN oin, ami haree katak fatin ne’e mak estratéjiku atu halo manifestasaun, nune’e ohin ami la aseita desizaun PNTL, ami deside mantein uza fatin ne’ebé ami mensiona iha karta”. Hateten Porta voz EUTL Natalício Nunes ba Mídia Sapnews iha Kampus Sentral UNTL Dili, 10/09/2025.
Ligadu ho kestaun kapturasaun, Natalício deklara prontu simu dejafiu saida deit mak mosu iha loron 15 Setembru, “Ami sei assegura manifestasaun sira ho diak, garante paz, no estabilidade hodi kontra PN kona-ba desizaun sosa karreta ba deputadu sira”.
“Ami-nia karta vale ona atu halo manifestasaun, se sira halo kapturasaun ba ami la problema, ami prontu, sira mak viola regra, ami la viola regra, ami halo bazeia ba artigu 11, lei nú. 1/2006 no lei inan 42° kona ba liberdade reuniaun no manifestasaun”.
Bazeia ba konstitusiosaun RDTL artigu 42°, liberdade de reunião e de manifestação alinea 1 no 2 iha versaun portugês haktuir :
1. A todos é garantida a liberdade de reunião pacífica e sem armas, sem necessidade de autorização prévia.
2. A todos é reconhecido o direito de manifestação no termos da lei.
Natalício deklara manifestasaun ne’e sei la’o ho diak no laiha anarkizmu.
“Ami sei evita anarkizmu no asaun violentu, ami nia foku atu hapara lei pensaun mensal vitalísia, halakon lei distánsia 100 metru dook husi edifísiu ho públiku no hapara sosa karreta ba deputadu sira”. Nia afirma
Iha enkontru refere, PNTL fo tempu ba porta vos EUTL sira fila hodi halo koordenasaun aseita ona fatin ne’ebé PNTL autoriza iha Tasi-Tolu maka sira foin bele halo manifestasaun.
“Maibe sira la kumpri ida ne’e iha loron 15 fulan Setembru 2025, sira hakarak obriga aan halo manifestaun iha resintu UNTL, autoridade seguransa PNTL sei halo atuasaun hasoru sira”. Sita média PNTL
Entretantu, iha enkontru ne’e lidera direta husi Komandante Operasaun PNTL Superintendente Xefe Polísia Justinho Menezes ho Komandante PNTL Munisípiu Dili Superintendente Xefe Polísia Orlando Gomes hamutuk ho Komandante UEP ho ofisial superior PNTL sira.
Manifestasaun ne’ebé EUTL halo sei foku ba hapara lei pensaun mensal vitalísia, halakon lei distánsia 100 metru dook husi edifísiu ho públiku no hapara sosa karreta ba deputadu sira hodi investe ba setor produtivu sira hanesan edukasaun, saúde, agrikultura, ekonomia, turismu no infra-estrutura.