Oan Mate Iha Corea ! Maria : “Ha’u Laiha Forsa, Lakon Aman Daruak Família Nian”.

SAPNewsTL, Ermera : Relasiona ho Trabalhador Manuel Albuquerque ne’ebe mout iha tasi iha loron 25 fulan Novembru 2025, Matebian nia inan Maria do Carmo sente triste no lakon esperansa moris tanba lakon oan mane boot ne’ebé ba servisu hodi hadia ekonomia família.

Ermelinda Soares & SAPNewsTL

Inan feton Maria do Carmo hatete nu’udar inan sente triste bainhira rona lian ida hanesan anin mak hu husi dook dehan katak “ha’u-nia oan mane boot mout iha tasi, laiha forsa no atu ko’alia nonok no hasai matan-been ne’ebe moruk no todas tebes”.

“Ha’u sente triste tamba laiha ona forsa atu moris hanesan ema seluk tamba moris presiza kompleta husi aman inan no oan, ha’u hanesan feto faluk ida no oan iha nain mane nain tolu, Mane boot mak hanesan ami nia aman kedua hodi esforsu no tulun familia nia nesesidade, maibe ohin loron hanesan inan sente triste hafalun matan-ween ne’ebe nakonu ho tristeza”. Hateten Inan feton Maria do Carmo iha Ermera, 29/11/2025

Alin husi Familia matebian, Mario de Jesus dos Santos hatete hanesan familia rona novidade refere nu’udar alin sente triste no lakon maun ida iha ami na’in 3 (inan faluk no alin na’in rua) ami laran metin nia hanesan ami-nia aman maibe senti tristi tebes bainhira rona ida ne’e no atu Iaran metin Ioss ba se.

“Alin ami nain rua mesak ho inan faluk laran metin ba matebian atu ba servisu iha Korea Sul atu haree ami-nia eskola no inan ne’ebe mesak iha uma maibe matebian ba serbivu la halo ami kontente maibe lori tristeza hafalun familia sira”.

Matebian ba Korea Sul iha loron 20 fulan Novembru tinan 2022, hafoin Tinan tolu, matebian hetan dezastre iha loron 25 fulan Novembro tinan 2025.

Matebian durante ne’e suporta nesesidade uma Iaran no halo avo sira-nia rate no mos Pai nia rate, sosa material konstrusaun uma nian atu halo matebian nia uma foin halo fundasaun, maibé Iha loron 25/11/2025, rona fali nia kolega telefone katak “polisia buka Manuel no ami familia hanoin nia halai sai husi sistema maibe rona fali katak Manuel mout iha tasi”.

“Familia rona husi nia kolega telfone husi Korea katak nia mout iha tasi no ami telfone matebian nia nomor telfone la atende maibe ami sei duvida hela maibe ami haree husi media mak ami sente hakfodak rona katak nia mout iha tasi, ami familia la simu realidade no senti todan tebes ba ami”.

Enkuantu, familia husi matebia husu ba parte governo no estado Timor nian oinsa mak halo lina kordenasaun ho governo ka estadu koreanu no patraun husi kompanha Korea nian hodi buka tuir, wainhira hetan bele prosesa ho lais no translada mai Timor-Leste.

Trabalhador Timor-oan ne’e hala’o servisu iha área peskas nian, hafoin mout iha tasi Geoje Corea do Sul, 25 fulan Novembru, ekipa konjunta ho elikópeteru no ro to’o ohin loron sei kontinua buka tuir iha tasi-laran.

Matebian Manuel Sequeira origem hosi Suku Haupo, postu administrativu Letefoho, Munisipiu Ermera, matebain nu’udar oan mane dahuluk iha família laran ne’ebe deside ba buka moris iha ema rain hodi hadia ekonomia família nian.

Iha loron 26 Novembru 2025, Embaixada Timor-Leste nian iha Seul liu-husi Adidu Traballu, Feliciano Mendonça ne’ebé akompaña husi Benjamin Bano halo vizita traballu direta ba fatin akontesementu iha area Haegando, Tongyeong.

Objektivu vizita ida né hodi ba haree direta fatin akontesementu no iha biban ida ne’e mós atu halo koordenasaun institusionál no akompaña prosesu kona-ba insidente ne’ebé hasoru husi sidadaun Timor-Leste ho Naran: Manuel De Albuquerque ne’ebé lakon iha tasi área Haegando, Tongyeong.

Iha loron hanesan oras tuku 16h35, Adidu Traballu halo vizita kedas ba Stasaun Polísia Marítima Tongyeong no akompaña mós husi Kordenador no Xefe area Tongyeong hodi hasoru Komandante Investigasaun Marítima para atu halo enkontru koordenasaun institusionál hodi ko’alia kona-ba insidente ne’ebé maka Manuel hasoru.

Iha biban ida ne’ebá mós Adidu Traballu hala’o vizita ba fatin acontecimento – Ilha Haegando hodi halo observasaun diretu no hetan informasaun husi Patraun no kolega
Eko PRASETYO sidadaun Indonézia ida ne’ebé maka servisu besik liu Manuel.

Bazeia ba Kronologia badak ne’ebe mak konta husi testamunha Eko kona-ba akontesimentu ne’e iha oras Tuku 09:00 dader , patrão, Manuel no Eko fila husi fatin ne’ebé sira foti kul (sipu).
Depois ida ne’e sira fila no sira hahu aruma rede no tali sira ne’ebe maka sempre utiliza ba foti kul.

Tuir informasaun husi kolega refere katak Manuel halo servisu iha ro nia kotuk iha parte liman loos; no kolega Eko iha parte liman karuk. Depois ida ne’e kolega Eko remata ona parte servisu no la’o ba ro oin atu kontinua aruma tan rede sira ne’ebé iha oin. Bainhira fila fali ba ro kotuk, Eko hare katak “Manuel” la iha ona iha ro, no Eko bolu no komesa buka ona no bolu Manuel nia naran dala barak, maibé la iha resposta.

Ho ida né Eko fó hatene ba patraun, no sira nain rua hahu halo buska kedas no kontaktu diretamente ba autoridade marítima hodi fo hatene informasaun kona-ba ba insidente refere.

Iha koordenasaun institusionál refere liga ho situasaun atual insidente ne’e Autoridade kompetente sira iha Tongyeong kontinua halo operasaun, uza meiu marítimu no tékniku oioin atu hetan fali Manuel nia isin maibe to’o agora seidauk hetan informasaun ikus kona ba matebian nia paradeiru.

Lembra fali katak iha loron 10 fulan Outubro 2025 trabalhador timoroan Domingos Nunes “Acoli” mos hetan asidente mout iha tasi laran, buka tuir durante loron tolu hafoin hetan nia mate-isin no translada mai Timor-Leste iha loron 2 fulan Novembru 2025.

Entertantu, familia husi matebian iha maun alin nain rua no matebian mak oan dahuluk husi aman Américo dos Santos (falesidu) no inan Maria do Carmo no alin mane nain rua Mario de jesus do Santos no Mateus Monis.