KONISTIL Konsidera Lei La Vale Ba Familia Elite, Drogadu Orgullozu

SAPnewsTL, Dili : Relasiona ho kazu Ilísitu Drogra ne’ebe sai preokupasaun públiku nian oras ne’e daudaun, Presidenti Konsellu Nasionál Islámico Timor Leste (KONISTIL) konsidera lei la vale ba ema boot nian oan sira, la aseita ho atuasaun ba hahalok ba suspeitu Droga nian ne’ebe envolve ema boot nia oan sira, maibe tribunal la prosessa tuir lei ne’ebé Timor iha.

Presidenti Konsellu Nasionál Islamico Timor Leste Pascoal Pinto Soares Lemorai Hateten labele aplika lei haree ba ema boot ka kiik, aplika lei tenki ba Timor oan ho hanesan

“Aplika lei hanesan ba ema hotu, labele haree bá ema boot no ema kiik tanba lei Vale ba ema hotu-hotu, maibe realidade agora hatudu oin seluk, tuir lolos ne’e sira hetan pena maibe ita hatene katak ne’e desizaun husi boot nian ne’e mak sira hetan Termu Identidade Residénsia (TIR), tanba sá boot nia oan lábele hakruk ba lei, bainhira sala ona tenke sala labele haree bá familia”. Tenik Prezidente KONISTIL ba Jornalista SAPNewsTL iha Knaar fatin Kampu Alor Dili, 18/08/2022

Nia Akresenta, sé deit mak iha rai ida ne’e tenki hakruk bá lei, se haree de’it ba familia maun boot sira nia familia mak konsumo droga la uza lei hodi hanehan,sira husik livre deit maibe kuandu kiik nia oan sira mak konsumu droga, sira direta ba foti lori kedas ba kadeia

“Agora ida ne’e mak akontese iha ita nia Rai, sira ida kiik senti triste tanba familia la iha, no sira ida iha familia boot senti kontenti, maibe ema seluk ne’ebe senti an katak uluk akontese hanesan ne’e bá nia maibe Governu la halo sistema hanesan ne’e, sira senti triste ho ida ne’e, hau lá aseita kona ba TIR ne’e tanba sira konsumo ona Droga”. Dehan Nia

Presidente KONISTIL sente triste tanbá kiik nia oan hanesan kiik duni, boot nia oan hanesan maromak nia oan, sira ba kaer ho Algemas (borgol) maibe boot nia oan husik livre deit no la kaer ho borgol ne’e halo sira kontenti tanba sira konsumu ona droga maibe la kaer sira tuir lei ne’ebé los, tanba deit sira iha familia ne’ebe bo’ot

“Ita hatene katak lolos ne’e tuir Lei no Lei mak sei desidi maibe realidade ita haree ho matan katak sira la halo kapturasaun tuir lei ne’ebe mak iha ona, kaer sira ne’ebe konsumo droga maibe lá tuir prossesu ne’ebe mak iha, ida ne’e halo sira ne’ebe konsumo droga ne’e senti kontenti no sira la kona pena maibe hetan fali TIR, maibe tuir lolos ne’e tenki kona Pena”. hatete nia.

Enkuantu, Presidenti islámico husu ba tribunal atu aplika Lei tuir Lei ne’ebe Timor iha la bele haree ba ema

“Aplika Lei tuir Lei ne’ebe Timor iha labele haree ba ema maibe hare ba Lei, Kuandu ita haree ba ema, realidade mak hanesan ne’e ona tinan ba tinan mos nafatin hanesan ne’e, media no joventude barak mak la aseita ho hahalok sira hanesan ne’e, tanba ida ne’e estraga juventude bá futuru, aban bainrua mós sei akontese nafatin tanba ita nia rai hanesan ona merkadu livre ita nia fatin hanesan ona merkadu livre droga tama tuir nia hakarak”. Nia sublinha

Reportajen : Ekipa Kobertura

Editor          : Ekipa Editorial