Ezequiel Pinta Lembransa Furak Iha TVE-T & Husik Hela Komunidade Mídia Ho Istória

Sapnews Pro, Díli : Xefe Redasaun TVE-T Ezequiel das Neves hakotu ninia peregrinasaun iha mundu tanba sofre moras no la konsege rekupera maske família halo esforsu hodi kura nia moras.

Komunidade média iha Timor-Leste lakon jornalista profissional no atual Xefe Redasaun TVE-T Ezequiel de Rosa das Neves tanba Maromak bolu nia, nune’e nia fila hikas ba Aman Maromak nia kadunan santu.

Jornalista TVE-T Victor hateten Maktoban Ezequiel das Neves nu’udar joven ne’ebe domin, Matenek no jornalista ne’ebe profesional, família TVE sente mamuk ho ninia falesimentu.

“Maun Zequi, nia la’os deit Xefe Redasaun maibe nia mós maun ba ami, nia mak ida ne’ebe iha tempu naruk ami sadere an ba, nia laiha ajenda ba halimar, ami hasoru nia, konviviu ho nia, ami aprende barak hosi nia, nia ema ida intelektual, no profissional, nia laiha, ami sente mamuk”.

“Nia ema ida la kria inimigu ho ema seluk, nia ema ida haree ema hotu hanesan, nia domin na’in no laran luak, ami la hatene atu ba ne’ebe ho deit ami-nia pai (Armindo Crisna)”. Hateten Jornalista TVE-T Victor

Iha fatin hanesan, Fundador TVE-T Armindo Crisna haktuir nia sente lakon ema ida ne’ebe potensial, profissional, simples, onestu no responsabilidade.

“Ezequiel das Neves ema ida ne’ebe ha’u kunhese kleur ho nia, ha’u nu’udar nia pai segundu, nia ema ne’ebe potensial, kualidade, simplesidade, honestidade, dedikasaun no responsabilidade, mehi barak ne’ebe ami iha seidauk realiza nia husik ona ami, deskansa em paz”. Nia sublinha

Matebian nia bin, Justina Maria das Neves hateten Ezequiel das Neves mak oan mane ikun ne’ebe família tau fiar no laran metin, nia mai husi família ne’ebe simples no kiak, nia fo an tomak ba TVE-T to’o husik mundu.

“Nia oan mane ikun, maibe ami rekunhese ninia kapasidade, nia mak ema ne’ebe intelektual, talentuozu no matenek tebes iha família laran, nia fo an tomak ba instituisaun ida ne’e”.

Representante família ne’e, fo agradese ba Colégio São Miguel Arcanjo (CSMA), ninia inan no aman segundu no família TVE-T inklui komunidade média sira ne’ebe fo solidariedade no hato’o orasaun ba matebian.

“Ha’u só agradese ba ninia pai no maen segundu, média sira ne’ebe durante ne’e suporta ona nia, buat ne’ebe nia halo sai lembrança ida mai ita hotu, karik nia halo sala ruma ka hahalok balun ladiak, ami husu desculpa”.Nia dehan

Ohin, família hamutuk ho TVE-T halot ona Ezequiel de Rosa das Neves ba nia deskansa fatin ikus iha postu administrativu Baguia, munisipiu Baucau.

Biografia

Matebian Ezequiel de Rosa das Neves, koñesidu ho naran bolu Jecky, moris iha Aldeia Darloi, Suku Samalari, Postu Administrativu Baguia, Munisípiu Baucau, iha loron 26 fulan Setembru 1997. Nia nu’udar oan husi Aman Domingos das Neves, husi uma lisan Lariisi no inan Celestina de Rosa, husi uma lisan “Isi-Luaboru, Ahekoni” husi Suku Larisula.

Jecky nu’udar oan da-ikus husi maun-alin na’in sia (9), kompostu husi: Justina Maria das Neves, Albertina Maria das Neves, Augustinho de Rosa das Neves, Xisto de Rosa das Neves (falesidu), Roque de Rosa das Neves, Alexandrinha de Rosa das Neves, Pasquela das Neves, Felíz Miguel Guterres no Maktoban Ezequiel de Rosa das Neves rasik.

Laran Triste Hafalun ho Nakukun sente moras tebes, iha loron 22 fulan Janeiru 2026, iha tuku 08:20 dadeer, matebian hakotu nia iis iha nia rezidénsia Vila Nova, Baucau, tanba sofre moras komplikadu. Momentu sedu ida ne’e husik laran susar ba família Neves, belun, Mestre no komunidade jornalista sira iha Timor-Leste.

Iha área edukasaun, Jecky hahú nia estudu Primária (2004–2009) iha Eskola Katólika São José Baguia. Nia kontinua ba Pre-Sekundária (2010–2012) iha Eskola São José Baguia no iha tinan 2013–2015, kontinua nia estudu Secundária iha Colégio São Miguel Arcanjo (CSMA).

Iha nivel superiór, matebian kontinua nia formasaun iha Universidade da Paz (UNPAZ), iha área Jestaun Ekonomia, husi tinan 2016 to’o 2019.

Hafoin remata nia estudu iha Eskola Secundária São Miguel Arcanjo, Jecky la para iha dalan, hodi serví no duni nafatin nia karreira sira. Nia kontinua fó nia tempu no matenek ba Colégio São Miguel Arcanjo (CSMA), envolve-an iha prosesu aprendizajen, inklui atividade extra-kurikular.

Iha Colégio São Miguel Arcanjo (CSMA), nia profisaun la’ós de’it hanesan maronín nain, maibé mos hanesan jornalista no formador ba joven lubuk ida ne’ebé aprende iha vida jornalismu iha Televizaun Edukasaun (TVE-Timor), ne’ebé funda husi fundador CSMA, Maun/ Pai Armindo Crisna Caetano.

Kareira jornalizmu Jecky nian hahú iha TVE no kontinua to’o nia vida remata. Nia nu’udar ema ne’ebé fó kontribuisaun bo’ot ba dezenvolvimentu CSMA no TVE iha tinan hirak ikus ne’e, hamutuk ho Pai Armindo (Crisna), ho nia dedikasaun ne’ebé bo’ot no servisu ne’ebé la hatene nia tempu.

Jecky la’ós de’it koñese hanesan jornalista kompetente ida, maibé mos hanesan promotór modelin no Master of Ceremony (MC). Nia nu’udar foin-sa’e ho qualidade iha matenek no riku ho Potensia oin-oin, ninia determinasaun fó mos kontribuisaun ba rai Timor-Leste. Infelizmente, ninia jornada ne’e sedu tebes, lori hotu nia planu no mehi ne’ebé seidauk realiza hotu.

Iha duni Fatin ida ne’e, nia sai hanesan Dalan no Ponte, atu Halibur Ema hotu-hotu ne’ebé hamahan-an iha Knua CSMA no TVE, liu-liu ba Se deit ne’ebé sente nu’udar família ida iha fatin refere. Iha TVE Jecky nu’udar Xefe Redasaun ho oin midar, hirus iha situasaun servisu, maibé la hatudu odiu iha laran. Nia sempre motiva, orienta no eduka nia maluk sira iha dalan jornalizmu nian.

Ezemplu husi nia amizade no dedikasaun ne’ebé nia halo, balun husi nia kolega sira ohin loron sai ona Media Officer iha instituisaun Estadu sira no media Nasionál hanesan RTTL, Tatoli, SMNEWS-Timor, GMNTV, Timor-Post, Hatutan, Media-Indepedent, Eto-TV, Lafaek-News, MF-TV no media seluk. Nia partisipa mos iha grupu asosiasaun jornalista nu’udar membru Asosiasaun Jornalista Timor-Leste (AJTL).

Memória no Formasaun barak ne’ebé belun Jecky husik hela ba nia belun sira, Mestre, Estudante, família no komunidade Jornalista sira iha Timor-Leste. Naran Jecky sei hela nafatin iha istória TVE no “Colégio São Miguel Arcanjo”(CSMA) hanesan símbolu dedikasaun, servisu ho domin no amizade.

Adeus belun Jecky.

Obrigadu ba amizade, dedikasaun no ezemplu moris ne’ebé ita husik hela mai ami hotu.