Kuda Ai-Hun Ida Sei Fo Oksijéniu & Bee Ba Futuru Gerasaun
Imajem : Kuda ai-oan iha RAEOA,24/01/2026
SAPNewsTL, RAEOA : Juventude no estudante sira husi Centru Foinsa’e Lela-Ufe (CFSL), hamutuk ho Amu Estasaun Misionáriu São José Oelfab no professores ho estudante EBF Binino, kuda ai-oan iha area igreja Oelfab no komunidade sira-nia uma hahu husi bairo Oelfab to’o Bebo.
Prezidente CFSL Jemirio Taec Falo hateten, atividade kuda ai-oan nu’udar atividade ida hodi proteje ambiente no moris sustentável ba jerasaun foun.
“Ami hala’o atividade kuda ai-oan iha area igreja Oelfab no komunidade sira nia uma oin, asaun ne’e nu’udar parte husi esforsu hametin protesaun ambiente no promove moris sustentável ba gerasaun foun”. Dehan Prezidente CFSL Jemirio Taec Falo ba Jornalista SAPNewsTL, Oé-Cusse 24/01/2026.
Jemirio Taec akresenta, pograma kuda ai-oan refere estudante no joven sira servisu ho kontente no objetividade hodi kuda ai iha dalan públiku inklui komunidade sira-nia hela fatin.
“Iha atividade ne’e, labarik, estudante no juventude sira hatudu animu servisu hamutuk, ho alegria no responsabilidade iha prosesu kuda ai-oan sira iha dalan públiku no fatin komunidade”. Nia subliña.
Prezidente CFSL afirma, benefisiu kuda ai-oan sei fó impaktu pozitivu ba komunidade sira iha futuru.
“Ai-oan sira ne’ebé kuda sei ajuda prevene erozaun rai, hadia kualidade anin, fó sombra no bele fó benefisiu ba moris komunidade iha futuru”.
Amu Estasaun Misionáriu São José Oelfab hateten, atividade ne’ebe sira hala’o importante tebes hodi forma joven sira atu hadomi natureza no hametin solidariedade iha sosiedade.
“Atividade hanesan ne’e importante tebes atu forma mentalidade hadomi natureza hosi idade ki’ik, governu lokal mos apresia inisiativa ida ne’e tanba bele aumenta konsiensia ambiental no hametin solidariedade sosial iha komunidade”.
Objetivu husi atividade kuda ai-oan ne’e mak atu:
1. Hametin konsiensia juventude no estudante sira kona-ba importansia hadomi ambiente no proteje natureza.
2. Prevene erozaun no hadia kualidade ambiente liu-liu iha area komunidade.
3. Fó kontribuisaun ba fornese oksijéniu no bee ba futuru hodi garante moris diak ba jerasaun tuir mai.
4. Forma atitude responsabilidade, disiplina no servisu hamutuk ba labarik no juventude sira hosi idade foinsa’e.
“Komunidade hein katak atividade kuda ai-oan hanesan ne’e sei kontinua iha tempu mai, atu kria ambiente ne’ebé di’ak, moos no seguru ba ema hotu iha rejiaun Oé-Cusse”.
Entretantu atividade kuda ai-oan refere hetan apoiu husi Diretor Jerál Oé-Cusse, Diresaun Rejionál Agrikultura Oé-Cusse liu husi Departamentu Floresta no Diretor Edukasaun no Solidariedade Sosial ne’ebé hatudu kompromisiu governamental atu hamutuk ho Joventude no Estudante Centru Foin Sa’e Lela-ufe atu hadia ambienti no hahoris edukasaun ambiental ba labarik no juventude sira.
