Tempu Kuaresma, Pe. Guilhermino : “Hamulak, Hadera An & Karidade La’os Palku Atu Hatudu An”

Imajem : Espesial

SAPNewsTL, Dili : Evanjellu fó-sai maneira hakribi sala ida-ne’ebé lolos. Jezus dehan “bainhira ó haderan aan, keta halo oin nakraik, wainhira ó fó esmola keta husik liman karuk hatene ó nia liman loos halo saida, wainhira ó hamulak  buka tama iha ó nia-uma laran”.

Jezus fó hanoin katak “hamulak, haderaan no karidade la’os palku atu show, laos palku atu hatudu aan”, nune’e ema seluk bele haree, maibe halo hanesan oferta lolos ida ba Maromak. Konversaun lolos laos kestaun aparensia exterior maibe kestaun laran ne’ebe fila ba Maromak ho laran moras.

Padre Paroku Santu António Motael Guilhermino da Silva hateten, ahu-kdesan laos deit nu’udar simbolu ida ne’ebé marka iha rentos maibé ne’e sai hanesan lingua ida atu ko’alia ba fuan oinsa ema idak-idak reflete ba nia moris.

“Ohin, ita tama fali ona iha tempu espesial Kuarta-Feira Sinjas, ahu-kdesan ne’ebe ita simu iha ita-nia rentos laos apenas simbolu maibe lingua ne’ebe ko’alia mai ita-nia fuan atu hatene ita-nia aan, hatene ita-nia ezisténsia no atu hatene ita ne’e se?”. Dehan Padre Parokia Igreja Motael Guilhermino da Silva, liu husi nia omilia, iha Igreja Motael, Kuarta-Feira, 18/02/2026.

“Ahu-kdesan fó hanoin mai ita kona-ba ita-nia moris ne’ebe la eterna ka hotu lalais deit husi mundu ne’e, ho rai rahun sei fila fali ba rai. Maibe rai-rahun ne’e-mos hatudu sinal esperansa nian, basa husi rai-rahun ne’ebe folin laek Maromak halo iha moris foun ida”. Dehan Padre

Ahu-kdesan kuarta-feira sinzas nian nu’udar odamatan ba tempu konversaun ka hakribi sala nian, tempu ida ne’ebe konvida ita atu fila ba Maromak ho laran tomak.

Pe. Guilhermino hatutan, liu husi profeta Joel nian haklaken ne’ebé fo hanoin mai ita katak Maromak nunka haree ita-ema nia aparénsia exterior maibe hare’e ba fuan ne’ebé moras no haraik-aan, Maromak ne’ebe mizerekordioju no pasiénsia ho ema nia hahalok ho domin ne’ebe boot.

Livru profeta Joel nian haklaken dehan “fila mai ha’u ho laran tomak liu-husi haberan aan hodi tanis no halerik, keta lees imi-nia hatais, lees imi-nia fuan ho laran”. Atu dehan katak husik imi nia ropa sira mos nafatin ba maibe imi nia laran tenke moras tan imi-nia moris.

“Maromak laharee ba aparensia exterior, maibe fuan-laran ne’ebe moras no haraik aan, nia Maromak ne’ebe mizerekordioju, Maromak ne’ebe pasiénsia tebes ho ita ema nia hahalok no jeitu sira no nia domin boot tebes mai ita”.

“Profeta Joel nia haklaken ida ne’e  konvite ida-ne’ebe ita labele rezeita, hahu ohin se hakarak halo kuarezma. Hanesan ita moras no labele kansela tratamentu, nune’e bele konsumu ai-moruk, tan oras ne’e mak tempu loloos, oras ne’e mak tempu grasa nian mai ita”.

São Paulo iha nia kanta ba sarani sira iha Korento haklaken no afirma dehan “oras ne’e daudaun mak tempu diak, oras ne’e daudaun mak tempu salvasaun nian ka tempu maksoin”.

“Konversaun ka hakribi sala ne’e laos kestaun ne’ebe tenke kansela, maibe bolu ita atu halo ohin kedas basa ita lahatene minutu tuir-mai ne’e ita sei to’o pontu konversaun ka lae?”.

São Paulo fó hanoin katak ita mak Kristu nia saseluk, bolu ita atu ba dame malu ho Maromak. Tempu Kuarezma hanesan oportunidade osan-mean atu hafoun relasaun ho Nai Maromak atu ita-nia moris sai tebes provas ida ba Nai nia domin.

“Se iha tempu baibain ita hala’o ita-nia moris ho tinan baibain entaun tama iha Kuarezma ita halo buat seluk ida atu bele hafoun ita nia moris”.

Kuarta-Feira Sinzas hanorin ita atu haree ba ita-nia moris ho onestu, “ita loos duni, frajil no folin laek, ita sala nain no halo sala barak tebes duni. Ita dalabarak lao sala dalan maibe tenke konsiente, rai-rahun iha ita-nia rentos laos sinal dezanima ninian, maibe sinal esperansa ida mos mai ita katak, ho ita-nia maneira sira limita ita-nia hakarak sira, ita sei bele goja salvasaun ne’ebé mak Maromak hakarak fó ba ita.

“Rai-rahun fó hanoin mai ita katak, Maromak transforma rai-rahun ba moris, tristeza ba ksolok no pekadu sai grasa, tan ne’e mai ita hala’o ita-nia kuarezma ho laran tomak, lalika ho laran rua-rua, lalika mos defende ita-nia aan iha sesta-feira sira hodi dehan ha’u han sala, hau haluha”.

Kuda metin iha o nia fuan katak loron haat-nulu (40) nia laran ne’e loron koarezma, hamulak ho laran loos, haderaan aan, haraik aan no halo karidade ho laran moos no lolos.

“Nune’e rai-rahun ne’ebe belit iha ita-nia rentos sai sinal konkreta ida katak husi ita-nia haraik aan, mosu konversaun, husi ita-nia konversaun mosu moris foun no husi moris foun mosu naroman no domin ne’ebe restaura mundu, ita-nia moris fatin no ita-nia aan rasik”. Nia hakotu