TL Prepara Sai Membru OMK
SAPNewsTL,Dili: Servisu Rejistrasaun no Verifikasaun Emprezarial, Institutu Publiku (SERVE.IP) hamutuk ho Organizasaun Mundial Komersiu (OMK) halo konsultasaun públika kona-ba adezaun Timor Leste ba organizasaun mundial komersiu.
Tuir Direktor Ezekutivu SERVE Florencio Sanches katak SERVE tenke hola parte iha organizasaun mundial komersiu tuir despaixu Primeiru Ministru maske nasaun kiik.
“Iha despaixu Primeiru Ministru nian temi katak SERVE tenki sai membru ba ekipa traballu ne’e, presiza hatete ba nia funsionariu hotu katak importansia adezaun ba iha Timor Leste ba Organizasaun Mundial Komersiu (OMK) ne’ebé hala’o husi ekipa tékniku traballu ida ne’e, SERVE tenke fo hatene ba iha nia ekipa traballu, ita tenke manan iha área polítika nian no hanesan nasaun ki’ik RDTL bele sai membru ba organizasaun bo’ot hanesan Organizasaun Mundial Komersiu ne’e privilejiu la halimar”. Dehan Direktor Ezekutivu SERVE Florencio Sanches iha Salaun Delta Nova, Sexta-Feira, 26/08/2022.
Direktor ne’e akresenta Timor Leste bele sai membru organizasaun mundial komersiu tanba sei fo benefisiu bo’ot ba Timor
“SERVE mos presiza fo hatene nia funsionariu tomak katak nia iha área ekonomia nian importante la halimar tanba pais Timor Leste nia abitante 1,3 porsentu ne’e labele produz ita nia produtu rasik, se ita iha produtu ruma sei lori ba nasaun membru organizasaun mundial nian, ne’e importante no benefisiu bo’ot ba Timor, politikamente mundu tomak hatene katak Timor bele sai membru estadu ba iha organizasaun ida difisil teb-tebes, ita iha produtu balun ne’ebé bele produz mais sei hakat fronteira ba pais seluk”.Tenik Direktor
Nia hatutan, dezafiu ida mak seitor privadu sira depende de’it ba orsamentu jeral nune’e presiza entidade hotu nia apoiu atu Timor mos bele hola parte iha organizasaun ne’e.
“Iha dezafiu maka ita nia setor privadu sira ne’ebé autor prinsipal ba iha autoridade ekonómiko komersial rai laran seida’uk preparadu, ita labele hein to’o nia preparadu pelu menus ita halo buat ruma, tanba durante ne’e ita nia setor privadu sira dependensia totalmente ba iha orsamentu jeral estadu, tanba ita haree ba mundansa politika iha pais ida nia laran, tanba ne’e mak entidade hotu hotu ne’ebé hola parte iha prosesu adezaun ida ne’e ita husu para apoiu malu atu nune’e to’o tempu ida ita Timor mos bele hola parte tanba sai membru OMK importante tebes ba dezenvolvimento pais ida nian”. Nia realsa
Florencio fundamenta tan liu husi papel SERVE nian sei halo mudansa hodi labele dependensia ba orsamentu jeral no kumpri regras sira ne’ebé iha.
“Iha nasaun seluk setor privadu sira la senti todan, tanba sira forte, maibé Timor Leste labele tanba ne’e liu husi SERVE nia papel ida ne’e hamós no eduka neneik para hado’ok an husi dependensia ba iha orsamentu jeral estadu liu husi kriteira no impedimentu ne’ebé maka agora OMK iha no Ita tenki kumpri nafatin regras sira, tanba ne’e la fasil iha buat hotu sira husu ne’e mai ho lei infelismente ita seidauk preparadu, tanba ne’e ita hotu hatene katak ita Timor Leste iha lejislasaun hamutuk 240 ne’ebe presiza harmoniza husi 240 ne’e tolu husi SERVE”. Nia informa
Entretantu, tuir planu sira sei hala’o enkontru dala rua tan hodi haforsa ekipa Timor Leste ba prosesu dezenvolvimentu OMK nian.
“Sei iha tan enkontru dala rua tan iha tinan ida ne’e Setembru ou Dezembru depois ida ne’e tinan oin ita halo teste Timor Leste liu ka la liu, tanba ne’e ekipa husi Timor Leste nian ne’ebé sai membru ba prosesu dezenvolvimento OMK ne’e tenki forte, ekipa maka SERVE ne’ebé representa ho membru nain tolu”. Nia hakotu.
Jornalista : Ermelinda Soares & Aquelina Magalhaes
Editor : Ekipa Editorial