Makina Barak Laiha Kondisaun Ba Manutensaun, IGE.IP Propoin Planu Tolu
![](https://sapnewstl.com/wp-content/uploads/2022/09/image-23-650x356.png)
SAPNewsTL, Dili: Relasiona ho ekipamentu pezadu sira ne’ebe avaria, Prezidente Instituto Gestão Ekipamentus,Instituto Públiku (IGE.IP) Hermenegilda da Costa Laurentina hateten planu atu hadia didi’ak makina ne’ebé avaria tau hanesan arkivu no sai ekipamentu treinamentu ba estudante sira.
“IGE.IP mos iha ona pasu atu rezolve makina sira ne’ebé labele ona atu halo operasaun ho ideia sira hanesan hadia didi’ak nia atu nune’e bele tau hanesan arkivu iha muzeu no opsaun seluk mak sobu tiha tau hanesan makina treinamentu ba estudante sira no funsionariu sira, estadu Japaun mos la permite ba IGE.IP atu halo lelan ba makina sira ne’e tanba lei Japaun la fo dalan”. Dehan Prezidente IGE.IP Hermenegilda iha nia knaar fatin Colmera, Sexta-Feira, 2/09/2022.
Prezidente ne’e aumenta, difikuldade ba sira mak makina sira ne’e la iha spare part atu hadia fali tanba uluk produs ba militar Japaun, la’os ba merkadoria.
![](https://sapnewstl.com/wp-content/uploads/2022/09/image-24-650x384.png)
“Husi parte IGE.IP nian, esforsu nafatin oinsa atu hetan spare part para bele halo manutensaun maibé problema mak makina doasaun husi Japaun nian, uluk produs la’os ba fa’an iha merkadoria nian maibé produs ba militar Japaun sira, entaun signifika ninia spare part ne’e la fa’an iha merkadu entaun ne’e hanesan difikuldade ida ba IGE.IP atu hetan ninia spare part atu hadia fali makina sira ne’e”. Tenik nia
Nia hatutan, makinas sira ne’ebé iha IGE.IP ne’e husi Japaun, Portugal no Korea no barak liu mak husi Japaun.
“Makina pezadus sira ne’ebé mak destaka iha IGE.IP, ita haré iha kor tolu: kor mutin doasaun husi Japaun, kinur husi governu Timor Leste no kor metan husi Portugal no Korea, maibé ne’e makina ida-idak de’it, barak liu mak husi Japaun no barak liu aat ne’e makina doasaun husi Japaun nian tanba kestaun idade, maizumenus 20 ital anos ona”. Nia informa
![](https://sapnewstl.com/wp-content/uploads/2022/09/image-25-650x363.png)
Enkuantu, makina sira ne’ebe iha ona kondisaun labele halo manutensaun hamutuk unidade ruanulu resin-tolu (23), ekipamentu ne’ebe sei halo manutensaun hamutuk sanulu resin-hitu(17), portantu, ekipamentu existente hamutuk 122 no foun 15.
Jornalista: Dulcio Antonino da Silva
Editor: Ekipa Editorial