Departamentu Medisina Jeral UNTL Realiza Medisina CUP 2022

SAPNewsTL,Dili: Universidade Nasional Timor Lorosa’e (UNTL) liu husi Departamentu Medisina Jeral realiza Medisina Jeral Cup 2022 hodi kria lasu amizade entre estudante sira husi siklu baziku to’o alumni husi departamentu refere.

“Ohin ami abertura ba jogu Medisina Jeral Cup 2022 nian ne’e ho objetivu atu hametin lasu amizade entre estudante Departamentu Medisina Jeral UNTL nian husi siklu baziku to’o estudante alumni sira”. Dehan Prezidente komisaun organizadora Silvio Joma da Silva Correia ba jornalista SAPNewsTL, iha kampu SEJD Lecidere, Sabadu, 10/09/2022.

Prezidente komisaun ne’e akresenta, aktividade refere sira hala’o kada tinan no ekipa hamutuk sanulu resin ualu mak partisipa iha kompetisaun ne’e.

“Kompetisaun ne’e partisipa husi  ekipa 18 ne’ebé ekipa mane hamutuk 12 no ekipa feto neen ne’ebé sistema jogu  mane sira sei joga tuir grupu no feto sira hala’o ho modelu liga ne’ebé sei hala’o durante fulan ida nia laran no kompetisaun ne’e hala’o kada tinan ne’ebé organiza husi estudante departamentu Medisina Jeral UNTL nian”. Tenik nia

Nia hatutan, eventu ne’e hetan apoiu masimu husi governu liu husi Sekretariu Estadu Juventude no Desportu, Nano Sport no Diretor Departamentu Medisina Jeral UNTL nian.

“Eventu ne’e ami hetan suportasaun masimu husi governu atravez Sekretariu Estadu Juventude Desportu (SEJD) ne’ebé ajuda kampu no material sira, Nano Sport hamutuk ho Diretor ensinu superior medisina UNTL ho nia estrutura tomak no kompetisaun ne’e hetan antusiasmu makaas los husi estudante feto mane sira”. Nia hakotu

Enkuantu, jogu rerefe sira halo abertura iha loron 11/09/2022, tuir planu jogu refere sei la’o durante fulan ida.

Jornalista: Augusto dos Santos

Editor: Luis Pailofo