Molok Arranka Ba Nova Yorke, PR Horta Rona PM Taur

SAPNewsTL(Dili) : Primeiru Ministru Taur Matan Ruak simu Direita Presidente da Repúblika Jose Manuel Ramos Horta iha Residensia Primeiru Ministru farol Dili.

Ba Jornalista sira, Presidente da Repúblika hateten sorumutu ho primeiru Ministru ne’e hodi rona mos ideia husi PM Taur, molok ba vizita Estado nian iha Nova Yorke hodi partisipa Asembleia Jeral Nacoes unidas (ONU) nian.

“Ha’u agradese ba Primeiru Ministru ne’ebe simu ona Ha’u iha ne’e, Ha’u mak oferese aan mai iha ne’e atu ko’alia ho Primeiru Ministru tanba Quarta aranka ba Nova Yorke, nune’e Ha’u hakarak rona preokupasaun Governo husi Primeiru Ministru, asuntu ruma Governu Hakarak tau iha Presidente nia Diskursus atu ko’alia”. (Hateten PR Horta iha farol Dili segunda feira ne’e (19-09)

Tuir Xefe Estadu asuntu hirak ne’e prepara dadaun ona, sei haruka ba Primeiru Ministru Taur Matan Ruak hodi haree.

“Asuntu ne’ebe Ha’u sei ko’alia iha Asembleia Jeral ne’e maka asuntu nasional, komu Timor Leste enfrenta ho efikasia prevensaun Covid 19, Timor Leste konsege duni kontrola ka halo jestaun diak ba Covid 19 maski momentu ne’eba laiha ida mak iha esperiensia tantu komunidade internasional no medida ne’ebe Governu halo para impaktu Ekonomia sosial ba kiak sira labele boot demais, ita haree konsege duni”.(afirma PR)

Aleinde ida ne’e, Primeiru Ministru Taur Matan Ruak mos fo liberdade total ba Presidente da Repúblika atu hato’o iha Asembleia Jeral (ONU) nian iha Nova Yorke.

” Ha’u Nu’udar xefe Estado Ha’u la koalia nu’udar ha’u nia naran pessoal, Ha’u Lori naran Estado, entaun ha’u nia Diskursu kuaze bele hateten relatorio ida husi Timor Leste nian ba komunidade Internasional kona-ba progresu iha paz no seguransa iha Rai-Laran  inklui iha politika toleransia rekonsiliasaun Timor Leste”.( Tenik Xefe Estado)

Entertantu, Presidente da Repúblika Jose Manuel Ramos Horta sei aranka  ba Nova Yorke iha loron Quarta feira (21-09-2022) hodi partisipa Asembleia Jeral Nacoes unidas (ONU) nian.

Jornalista : Vinsensius Saldanha Morais De Araujo

Editor       : Luis Pailofo