Lori Nasaun Ba Oin, KHUNTO Prepara Lideransa Feto Konkore Iha Eleisaun Presidensial

Imajem: Konselleiru Másimu partidu KHUNTO Jose Naimori Bukar & Prezidente Partidu KHUNTO Armanda Berta dos Santos, iha Salaun MAUBAI 3 de Marsu Beto Dili, Domingu, 24/05/2026.

‎SAPNewsTL, Dili : Partidu Kmanek Unidade Nasional (KHUNTO) realiza tomada de posse ba joven sira hamutuk 720 iha Suku Madohi, Postu Administrativu Dom Aleixo hodi hametin estrutura partidu no prepara forsa polítika tanba sei kandidata Presidente Partidu KHUNTO Armanda Berta dos Santos ba eleisaun prezidensial tinan 2027.
‎
‎Konselleiru Partidu KHUNTO Jose dos Santos Naimori Bukar, hateten polítika mak instrumentu importante ida ba dezenvolvimentu nasaun, ema hotu iha direitu atu partisipa no halo polítika ba interese ba públiku.
‎
‎“Ita hotu-hotu tuir polítika tanba polítika mak instrumentu nasaun nian. Polítika ne’e ema hotu nian, tanba ne’e mak ami orienta membru sira atu fó apoiu ba governu hodi hametin pás no estabilidade, atu dezenvolvimentu bele la’o ho diak iha rai ida ne’e.” Dehan Konselleiru KHUNTO Jose Naimori Bukar ba jornalista sira iha Salaun MAUBAI 3 de Marsu Beto Dili Domingo 24/05/2026.
‎
‎Konselleiru ne’e hatutan, KHUNTO prepara hela atu kandidatu Presidente Partidu ba períodu 2027-2032, bainhira partidu hetan despaxu ofisiál atu partisipa iha eleisaun sira tuirmai.
‎
‎“Prezidente Partidu KHUNTO prontu hela atu kandidata-an ba períodu 2027-2032, bainhira Prezidente RDTL fó despaxu ofisiál ba partidu atu partisipa iha eleisaun 2027.” Konselleiru Informa
‎
‎Iha oportunidade ne’e, Jose Naimori Bukar refere mos liafuan husi Papa Francisco kona-ba Timor-Leste.
‎
‎“Papa Francisco dehan ‘Timor rai santa, la’ós rai santu’. Tanba ne’e mak ami hakarak prepara lideransa feto ida atu lori nasaun ida ne’e ba oin. Ida ne’e mak Partidu KHUNTO nia mehi.” Nia Salienta.
‎
‎Naimori afirma KHUNTO sei la halo kompetisaun polítika ho partidu seluk, maibé entrega fila fali desizaun ba povu atu hili lider ne’ebé konsidera diak liu atu lidera nasaun.
‎
‎“Partidu KHUNTO la kompete ho partidu seluk, maibé depende ba povu nia fiar atu hili se mak bele sai Prezidente RDTL. Lider sira hotu Timor oan ne’ebé hakarak servi nasaun, maibé depende ba ida-idak nia programa no planu. Karik programa diak, povu sei fó konfiansa.” Nia Afirma
‎