Hakbesik Atividade Ba Povu, Autoridade Postu Luro Deside Halo Rotativa Ba Fatin Komemorasaun
Imajem: Komunidade Luro komemora loron Restaurasaun Independénsia ba dala-24 iha Suku Baricafa, Postu Luro, Munisípiu Lautem, 20/05/2026
SAPNewsTL, Lautem: Relasiona ho komemorasaun loron restaurasaun independensia ba dala XXIV, Autoridade Lokal postu administrativu Luro deside halo rotativa ba nivel suku, nune’e komunidade sente orgullu tanba bele hakbesik atividade ba povu hodi partisipa.
Administrador Postu Administrativu Luro Gaspar Xavier hateten tinan tinan komemorasaun loron nasional sempre sentraliza iha villa, nune’e liu husi enkontru ho autoriedade sira deside halo rotativa hodi realiza iha suku sira.
”Durante ne’e komemorasaun ba loron bo’ot sira ne’e, loron 20 Maiu no 28 Novembru sira ne’e ita sempre halo iha postu maibe tinan ida ne’e deside liu husi reuniaun ho autoriedade suku no aldeia, Veteranus hamutuk ho funsionariu sira hodi deside katak festa loron nasional ne’e diak liu maka halo rotativa hodi hala’o iha Suku ida-idak”.
”Nune’e tinan ida ne’e komemorasaun loron restaurasaun independensia iha nível postu, ita hala’o iha Suku Baricafa no loron 28 Novembru tinan ida ne’e sei hala’o iha suku Afabubo, hafoin sei kontinua ba suku sira seluk atu inan aman no komunidade sira bele partisipa hotu tanba besik”. Dehan Administrador Postu Administrativu Luro hafoin serimonia isar bandeira iha Suku Baricafa, Postu Luro, Munisípiu Lautem, 20/05/2026
Administrador ne’e informa serimonia sira ne’ebe hala’o ne’e komunidade hotu nian, loron boot ne’e ba hotu-hotu, komunidade sira ne’ebe iha Postu, Suku no Aldeia hotu nian entaun ohin iha Suku Baricafa ne’e ema hotu mai partisipa.
”Nune’e mos aban bainrua hala’o fali iha Suku seluk, ita sei fasilita inan aman sira iha Suku sira ba partisipa hotu”. Tenik Nia
Lider lokal ne’e mós husu ba joven sira atu hametin ispíritu patriotizmu, nasionalismu no voluntarizmu hodi kontinua kontribui ba estabilidade no desenvolvimentu nasional.
Iha fatin hanesan, Xefe Suku Baricafa Lamberto Soares sente orgullu tanba komemorasaun loron nasional ne’e hala’o iha sira-nia suku no fasilita inan aman sira bele la’o besik.
”Ha’u kontente tanba komemorasaun loron nasional ida ne’e Prezidente Autoridade Munisípiu Lautem hanesan fo despaixu ba Administrador Postu liu husi enkontru ba forma komisaun nian deside Suku Baricafa, entaun hanesan autoriedade sente orgullu tanba hakbesik ba inan aman sira ne’ebe durante ne’e la partisipa serimonia loron boot sira iha Postu hodi bele partisipa”. Tenik Xefe Suku
Komisaun Organizadora ba komemorasaun loron restaurasaun independensia ba dala XXIV iha Suku Baricafa nian ne’e mos relata fontes orsamentu ne’ebe uza ba komemorasaun loron restaurasaun independensia nivel postu husi munisípiu no kontribuisaun husi veteranus no funsionariu sira.
”Orsamentu ne’ebe ami hetan husi Munisípiu ba komsumu nian ne’e hamutuk dolar rihun ida ($. 1,000.00) maibe ami Suku Baricafa veteranus sira hamutuk ho funsionariu sira kontribui hotu, nune’e ami-nia orsamentu hamutuk dolar rihun rua atus tolu ($ 2,300.00) hodi utiliza ba komsumu hahu husi preparasaun to’o realizasaun serimónia”. Nia hato’o
Komunidade Eva Maria Hornay sente kontente tanba serimonia isar bandeira ne’e hala’o iha sira nia suku, komunidade sira iha aldeia sira hotu bele partisipa.
”Ha’u sente orgullu tanba autoriedade sira deside komemorasaun loron nasional sira nivel postu ne’e halo rotativa no ohin hahu realiza iha ami-nia Suku ba selebrasaun 20 Maiu, nune’e inan aman sira ne’ebe iha Aldeia bele la’o besik hodi partisipa”. Katak Eva
Enkuantu, Administrador Postu Administrativu Luro hamutuk ho Autoridade Suku no veteranus sira sira deside ona komemorasaun loron nasional sira nivel Postu Luro nian sei realiza iha Suku sira ho forma rotativa.
