Preokupa Tafera Transporte Sa’e Husi $5 Ba $17 ! MOFA Husu Governu Prioritiza Estrada Ermera Ba Atsabe
Imajem: Estrada Ermera-Atsabe, Movimentu Foinsa’e Atsabe (MOFA) no portavoz Agostinho Gomes Fernandes. Jardim 5 de Maio Sexta -feira 29/05/2026. Foto: SAPNewsTL
SAPNewsTL, Dili : Movimentu Foinsa’e Atsabe (MOFA) husu ba Governu Sentrál no instituisaun relevante sira atu prioritiza no aselera konstrusaun estrada Ermera-Atsabe, tanba kondisaun estrada ne’ebé aat afeta movimentasaun povu, atividade ekonómika, edukasaun, saúde no moris loroloron komunidade nian.
Conzita Mota – SAP News Agency
Portavoz MOFA Agostinho Gomes Fernandes hateten estrada ne’ebé liga Gleno ho Atsabe atualmente sai obstákulu boot ba dezenvolvimentu komunidade, maski Munisípiu Ermera kontribui importante ba ekonomia nasionál liu hosi produsaun kafé no setor agrikultura.
“Ermera nu’udar munisípiu ida-ne’ebé kontribui boot ba ekonomia nasionál liu hosi produsaun kafé no agrikultura. Tanba ne’e, Ermera merese infraestrutura ne’ebé di’ak no dignu ba povu.” Dehan Portavoz MOFA Agostinho Gomes Fernandes ba jornalista sira iha Jardim 5 de Maio Sexta -feira 29/05/2026
Portavoz MOFA hatutan kondisaun estrada ne’ebé aat halo tempu viajen entre Díli no Atsabe aumenta problema signifikativamente. Tuir movimentu ne’e, antes viajen entre área rua-ne’e normalmenti presiza de’it oras lima to’o neen, maibé agora bele viajem to’o oras 12 – 14.
“Tuir realidade no preokupasaun hosi komunidade-sira ne’ebé uza transporte públiku diariamente, antes tinan-ida ba kotuk, viajen hosi Díli ba Atsabe ka hosi Atsabe mai Díli normalmente presiza de’it oras 5 to’o 6. Maibé, tanba estrada ne’ebé aat ba bebeik no difikulta transporte, agora povu tenke presiza oras 12 to’o 14 antes to’o ba sira-nia destinasaun. Situasaun ida-ne’e la merese ba povu, tanba povu lakon tempu produtivu, enfrenta risku boot durante viajen naruk ne’ebé tenke hala’o iha kondisaun estrada ne’ebé aat.” Portavoz MOFA hatutan
Relasiona ho kustu transporte, MOFA afirma katak tarifa transporte públiku entre Díli no Atsabe aumenta hosi US$5 ba US$17 tanba kondisaun estrada no kustu operasionál transporte ne’ebé aumenta.
“Preokupasaun ne’e sai grave liu tanba kustu transporte mos auménta aas ba bebeik. Antes, komunidade sira selu de’it US$5 ida-idak atu viazen ba Atsabe. Agora, tanba kondisaun estrada ne’ebé aat no kustu operasionál ne’ebé auménta ba transporte-sira, tarifa transporte sa’e to’o US$17. Ida-ne’e signifika katak povu tenke selu liu dala tolu hosi kustu ne’ebé antes sira selu.”
“Ba família agrikultór sira no komunidade ne’ebé moris ho rendimentu limitadu, aumentu kustu transporte ida-ne’e sai karga ekonómika ne’ebé todan tebes.” Informa Portavoz MOFA
MOFA mós relata katak iha situasaun balu, bainhira transporte públiku la bele opera tanba estrada aat, família sira obriga atu la’o ain hosi Atsabe ba Gleno atu asesa servisu essensiál, inklui edukasaun no nesesidade urjente seluk.
Movimentu ne’e konsidera katak problema infraestrutura la’os de’it asuntu tékniku, maibé problema sosial no dezenvolvimentu povu nian.
“Bainhira povu rurál sira tenke gasta tempu no osan barak liu atu asesa merkadu, eskola, ospitál no servisu públiku sira, ne’e hatudu katak asesu ba dezenvolvimentu seidauk sente hosi komunidade sira.” Salienta Portavoz
Tanba ne’e, MOFA husu ba Governu Sentrál, Ministériu Obras Públikas, Ministériu Planeamentu no Investimentu Estratéjiku (MPIE), Governu Munisipál Ermera no autoridade relevante sira atu implementa medida konkreta ba konstrusaun estrada Ermera–Atsabe.
“Povu presiza rezultadu konkretu no asaun ne’ebé bele sente diretamente iha sira-nia moris loroloron.”
Iha parte seluk, MOFA kritika mós lideransa polítika balu no reprezentante eleitu sira ne’ebé, tuir sira-nia haree, seidauk fó resposta efetiva ba problema infraestrutura iha área Atsabe no Ermera.
“MOFA kontinua promove edukasaun popular no konsiénsia krítika hodi hametin partisipasaun sidadaun sira iha fiskalizasaun polítika públika no monitorizasaun rekursu Estadu.”
Ikus mai, MOFA konvida juventude, estudante, intelektuál, lideransa komunitária no povu tomak atu hamutuk promove unidade, solidariedade no konsiénsia sosial hodi defende interese komunidade nian.
“Luta ba estrada di’ak la’os de’it luta ba infraestrutura, maibé luta ba dignidade, igualdade no futuru ne’ebé di’ak liu ba povu Ermera no Atsabe.”
Enkuantu, oras ne’e Governu halo ona ema akordu ho kompanha hodi halo estrada ligasaun Gleno ba Letefone no Ermera Antiga, enkuantu ligadaun b Atsabe sei iha faze planeamentu.
