Maria Agradese TL Asume Presidénsia Temporária CPLP Ba Periodu 2025-2027

Imajem: Sekretária Ezekutiva Comunidade dos Países de Língua Portuguesa (CPLP), Maria de Fátima Jardim enkontru ho Primeiru-Ministru, Kay Rala Xanana Gusmão, iha Palásiu Governu, Dili, kuarta-feira, 03/06/2026. Foto: Media PM

SAPNewsTL, Dili : Sekretária Ezekutiva Comunidade dos Países de Língua Portuguesa (CPLP), Maria de Fátima Jardim, agradese bá Timor-Leste (TL) ne’ebé simu responsabilidade atu assume Prezidénsia Prezidénsia Temporária CPLP bá períodu 2025-2027.
‎
‎“Ami hakarak agradese Primeiru-Ministru no povu Timor-Leste tomak ne’ebé simu Prezidénsia Pro-Tempore CPLP nian.” Dehan Sekretaria Ezekutiva CPLP Maria de Fátima Jardim, durante enkontru ho Primeiru-Ministru, Kay Rala Xanana Gusmão, iha Palásiu Governu, Dili, kuarta-feira, 03/06/2026.
‎
‎Durante reuniaun, Sekretária Ezekutiva informa mós kona-bá vizaun estratéjika CPLP nian bá períodu 2016-2026 sei remata iha tinan ida-ne’e no sei substitui ho vizaun foun ida, aproveita ho lideransa Timor-Leste nian iha organizasaun ne’e.
‎
‎Daudaun ne’e CPLP fó atensaun bá kestaun seguransa marítima integrada, ne’ebé konsidera importante bá soberania Estadu-membru sira.
‎
‎Assuntu ne’e mós sei sai tema importante iha Konferénsia Ministru Peskas CPLP nian ne’ebé sei realiza iha sede CPLP iha loron 8 fulan juñu.
‎
‎CPLP la’o tuir prinsípiu dame, liberdade, demokrasia no Estadu direitu atu promove progresu no moris-di’ak bá povu sira iha nasaun membru sira.
‎
‎Organizasaun ne’e kontinua hala’o prosesu reestruturasaun no modernizasaun hodi reforsa nia papél hanesan plataforma diálogu no konsultasaun entre Estadu-membru sira ne’ebé distribui iha kontinente haat.
‎
‎Sekretária Ezekutiva mós destaka importánsia atu CPLP responde bá dezafiu globál sira, inklui konflitu, mudansa klimátika, seguransa umana, seguransa ai-han no seguransa nutrisionál.
‎
‎Dili sei simu Reuniaun Konsellu Ministrus no Simeira CPLP nian iha loron 17 fulan Jullu 2026, nu’udár parte hosi komemorasaun aniversáriu bá dala 30 CPLP nian.
‎
‎Tanba ne’e nia parabeniza Timor-Leste ninia Prezidénsia Pro-Tempore ho lema ne’ebé hili hodi reafirma kompromisu bá demokrasia, konstitusionalidade no direitu fundamentál sira.
‎
‎Maria de Fátima Jardim hala’o vizita bá dala-uluk mai Timor-Leste no sente Timor-Leste nu’udár “rai dame nian” no “rai maun-alin CPLP nian”.