World Cup 2026 Maka Ronaldo Nia Jogu Última, Prontu Simu Rezultadu Hasoru Espanha Ho Kontente
Imajem: Cristiano Ronaldo. Foto: Sosial Media Internasionál
SAPNewsTL, Internasionál: Jogador Legendáriu Cristiano Ronaldo liu hosi konferénsia imprensa deklara world cup 2026 ne’e nu’udar nia jogu ikus, nia hein katak joga hasoru Espanha iha Round of 16 sei la sai jogu ikus.
“Importante liu mak disfruta kompetisaun ida-ne’e to’o hotu, tanba ne’e mak hau nia World Cup ikus. Ha’u espera katak aban la’ós hau nia jogu ikus.” Hateten Cristiano Ronaldo, 06/07/2026. Sita Oh My Goal.
Ronaldo hatutan, nia parte la preokupa rezultadu saida mak bele mosu iha tanba buat hotu nia fo ona ba mundu futebol.
“La importa saida mak akontese aban, Cristiano sei husik kompetisaun ida-ne’e ho konsiénsia moos. La’ós deit 100%, maibé 1.000%. Ita boot sira hatene tanbasá? Tanba iha moris no iha futeból, ha’u fó ona hotu buat ne’ebé ha’u iha.” Nia sublinha
Nia dehan joga durante tinan naruk laos tanba nesesidade ka buka osan maibé tanba hadomi futebol.
“Ha’u-nia paixaun no hakarak kontinua joga durante tinan barak la’ós tanba presiza. Ne’e tanba ha’u hadomi futeból. Ha’u joga iha selesaun nasional no klube sira tanba ha’u tebes hadomi futeból, saida deit mak akontese aban, ha’u sei kontente.”
Bainhira jornalista internasionál sira husu kona-ba presiza atu sai kampiaun iha FIFA World Cup 2026, Ronaldo hatán: “Ha’u la bele tau presaun hanesan ne’e ba an rasik. Ha’u lakohi remata ha’u-nia karreira ho sentimentu katak ha’u obriga atu manán, Lae. Buat hotu sei akontese tuir Maromak nia hakarak.”
Ronaldo salienta, “Importante mak disfruta loron ida-idak, partida ida-idak, no disfruta kompetisaun espesiál ida hanesan World Cup. Maski balu hanoin ha’u la joga di’ak, ha’u la hanoin hanesan ne’e. Ha’u marka ona golo tolu. Seluk marka barak liu tanba sira joga di’ak loos, maibé ha’u mos la hanoin katak ha’u halo prestasaun aat.” Nia deklara
Tuir horáriu, Selesaun Nasionál Portugal sei hasoru Espanha iha loron 7 fulan Jullu 2026, iha madrugaga 04:00 oras Timor-Leste. Enkauntu iha kuartu finais, França sei kontra Moroco no Norvegia sei hasoru England.
