SAPNews : Média no Modernizasaun Komunikasaun Digital  Iha Xina Lori Lisaun Valiozu &  Prezerva Identidade Kultural

SAPNewsTL, China : Repúblika Popular Xina (RPX) maka nasaun ida ne’ebé boot iha sudeste aziátiku ho populasaun 1.41 billiaun ne’ebe kunhesidu nu’udar país sivilizadu, modernizadu, revitalizadu, dezenvolvidu, inovativu no teknolójiku. nasaun ne’ebe nia kapitál lokaliza iha Beijing ne’e iha influénsia boot iha mundu tanba domina teknolojia, artifisial intelijénsia, komunikasaun sosial, transportasaun, infraestrutura no ekonomia mundial liu hosi produsaun, utilizasaun no exportasaun ba merkadu global.

Marciana da Conceição – SAPNewsTL

Hafoin partisipa treinamentu no estudu vizita iha China, ha’u hetan materia no esperiénsia oioin husi oportunidade ne’e, entre lisaun hirak ne’e ha’u interesadu tebes kona-ba “China’s National Conditions and Traditional Culture”, matéria ne’e define ho klaru, oinsa kondisaun nasionál iha dezenvolvimentu kultural heritage, infraestrutura nasionál, revitaliza uma tradisional, konservasaun urbanu no planeamentu infraestrutura iha prosesu modernizasaun.

Kultura tradisionál Xina iha istória kle’an liu tinan 5.000, ne’ebé sai fundasaun importante ba identidade nasionál Xina to’o ohin loron. Tuir doutrina moral Konfusionismu, Taoísmu, no Budismu marka forte iha valór sosiál povu nian. Doutrina tolu ne’e inspira relasaun harmoniozu entre família, respeitu ba matebian, dever moral ba sosiedade, ekilibriu, simplesidade no buka atu hala’o moris tuir fluxu natural, la’ós ho luta kontra natureza, fidelidade no esperansa. Valór sira ne’e sei iha influénsia boot iha komportamentu sosiál Xina kontemporáneu, maski nasaun ne’e hetan modernizasaun no globalizasaun.

Xina famozu ho arte oioin hanesan kaligrafia, pintura tradisionál, ópera Xina no artezanato seramika. Festividade tradisionál hanesan Tinan Foun Xina (Festa Primavera), Festival Meiu-Outuno, no Festival Barku Naga kontinua selebra ho entuziasmu bo’ot husi jerasaun ba jerasaun. Alimentasaun Xina mós sai parte importante husi identidade kulturál, ho variedade rejionál ne’ebé rikeza tebes, husi hahan pikante Sichuan to’o comida delikadu Cantonese.

Xina reprezenta kombinasaun únika entre modernizasaun rápidu no preservasaun tradisaun kulturál. Governu Xina hala’o esforsu kontinua atu promove no proteje patrimóniu kulturál nasionál, hanesan rekonhesementu UNESCO ba fatin istóriku oioin iha Xina. Komprensaun kona-ba nasaun no kultura tradisionál Xina importante tebes atu haforsa relasaun internasionál no koperasaun entre povu sira iha mundu globalizadu ohin loron.

Durante apresentasaun, espesialista ko’alia kona-ba modelu konservasaun no prezervasaun identidade kultural nasaun nian ne’ebe integra iha desenvolvimentu ekonomia, infraestrutura, sosial no teknolojia iha prosesu modernizasaun urbanu. Nune’e nafatin iha kontinuidade, integridade, lori mudansa no moris diak ba nia populasaun sira.

Programa interkámbiu estimula jornalista sira-nia kunhesimentu kona-ba dezenvolvimentu China, kooperasaun China-ASEAN, Belt and Road Initiative, modernizasaun China no sistema komunikasaun internasionál iha Repúblika Popular China. Timoroan hala’o vizita ba instituisaun mídia no sentru inovasaun, Cental Gifts and Artifacts Center iha Beijing, Muzeum of the Communits Party of China no muzeum kapital iha Beijing hodi haree direita Xina prezerva artistika sira ne’ebe konserva iha muzeum husi kada dekade, oinsa sira-nia istoria sai nasaun dezenvolvidu ho nia pasajen istoriku sira.

Esperiénsia furak ne’ebe hetan iha sidade Beijing, sidade Guangxi to’o Liuzhou oinsa utilizasaun Intelijénsia Artifisiál (AI) iha área saúde, agrikultura, komunikasaun digital, dezenvolvimentu rurál, konservasaun ambientál, integrasaun kultural, turizmu no inovasaun industrial.

Iha dékada ikus ne’e, dezenvolvimentu ekonómiku ne’ebé la’o lalais no espansaun sidade sira nian lori ameasa boot ba komunidade tradisionál sira liuhosi destruisaun ba uma-lulik no uma-tuan sira ne’ebé iha valór kultu no istóriku tebes. Governasaun Xina komesa rekoñese katak modernizasaun la’ós de’it hari’i prediu aas no moderna, maibé integra salvaguarda ba identidade kulturál liuhosi programa reabilitasaun ne’ebé kontroladu hodi labele lakon baze istórika no kultura nasional. Revitalizasaun ne’e ho forma integradu ne’ebe aposta ba kualidade moris komunidade nian, iha ne’ebe ohin loron uza sai turizmu kulturál, ekonómia lokál, no hadi’a povu nia moris.

Revitalizasaun ne’ebe uza tékniku integradu entre tradisaun no teknolojia foun hodi hadi’a infraestrutura bázika hanesan sistema bee, no saneamentu la hó estraga dezeñu orijinál no materiál tradisionál sira hanesan ai, fatuk, no kalsiu. eransa vernakulár kontinua moris no fó benefísiu foun ba dezenvolvimentu ekonómiku rural.

Dezenvolvimentu komunikasaun sosial ne’ebe idéntiku ho plataforma digital no kapasidade inovasaun sempre defende, proteze no promove identidade kultural Xina nian, Esperiénsia husi Xina fó lisaun importante ba Timor-Leste katak dezenvolvimentu urbanu no teknolojia ne’ebé sustentável labele  separa ho istória  no kultura, maibé leno an ba pasadu nu’udar fundasaun hodi harii futuru ida ne’ebé boot no iha kór kulturál ne’ebé kmanek liuhosi protesaun eransa kultural. Sidade moderna sira iha Xina la’ós de’it sai sentru ekonómiku maibé mós sai fatin ne’ebé rai metin memória koletiva hosi jerasaun ba jerasaun.

Iha modernizasaun sidade sira iha Xina hetan kritika tanba tenta halakon kuartél istóriku sira hodi hari’i prédiu aas. Ohin loron, Xina aliña an ona ho padraun internasionál sira (hanesan rekoñese hosi UNESCO) hodi hili de’it dalan konservasaun ne’ebé la muda komunidade lokál no la hamate “memória moris” hosi populasaun ne’ebé hela kleur ona iha fatin hirak ne’e.

Dezafiu boot liu iha planeamentu ne’e mak oinsá aposta iha infraestrutura moderna hanesan bee, saneamentu, no internet iha sidade sira la hó estraga obra tradisionál. Xina uza abordajen internasionál hanesan Transit-Oriented Development (TOD) no konstrusaun subterraun ne’ebé avansadu tebes liu hosi kanalizasaun sira konekta iha rai-okos, nune’e mós ho estasaun metru nian ne’ebé halo tuir dezañu arkitetura lokál.

Pontu ne’ebé Xina lidera iha mundu globál mak uza teknolojia ba sidade intelijente (Smart City) ba konservasaun patrimóniu. Liuhosi uza Digital Twins, sensor IoT, no inteligénsia artifiál (AI), monitorizador sira bele monitoriza mudansa ba estrutura ai, kualidade bee iha kanál, no mós tesi-lia ba tráfegu turizmu nian. Esperiénsia ne’ebé Xina dezenvolve ne’e fó lisaun foun ba mundu inklui Timor-Leste katak modernizmu no istória bele la’o hamutuk nu’udar baze sustentável ba sidade sira iha futuru.

Durante formasaun ne’e, ha’u hetan inspirasaun foun kona-bá modelu dezenvolvimentu Xina nian ne’ebe kombinadu ho AI, prezervasaun kultura, valorizasaun istória, dezenvolvimentu infraestrutura no avansu teknolojia. Lisaun bo’ot liu-hosi esperiénsia ne’e hanorin katak, dezenvolvimentu tenke bazeia bá planeamentu tempu naruk, sai lisaun bo’ot bá nasaun sub dezenvolvidu sira inklui Timor-Leste.

Integrasaun Tradisaun no Modernizasaun Infraestrutura sai lisaun ba Timor-Leste, oinsa bele integra modernizasaun no asegura identidade kulturál no eransa vernakular. Ita-nia nasaun presiza moderniza ninia infraestrutura bázika hanesan sistema bee, saneamentu, no naroman, maibé dezenvolvimentu ne’e tenke uza tékniku inovativu ne’ebé respeita no proteje dezañu orijinál no materiál tradisionál.

Ha’u orgullu ho esforsu Timor-Leste atu proteje no preserva ninia istória. Lisaun importante ida mak dezenvolvimentu infraestrutura, urbanizasaun, no uma-fatin tenke integra protesaun patrimóniu kulturál, uma tradisionál, fatin istóriku, no koñesimentu lokál.

Ha’u hetan impresaun kle’an durante viajen ne’e ho inovasaun teknolójiku Xina, ninia dezenvolvimentu média avansadu no profisionál, infraestrutura modernu, no kresimentu ekonómiku modernu. Ha’u mós observa sosiedade sivilizadu ida, regulamentu forte kona-ba média sosiál, ambiente ne’ebé moos no furak, no karakterístika Xina hanesan pontualidade, disiplina, servisu-a’as, dilijénsia iha estudu, respeitu mútuu, preservasaun patrimóniu kulturál, humildade, no ordem públiku. Importante mós katak la iha barullu iha fatin públiku no la iha oras-fó-lakon ba asuntu ne’ebé la esensiál. Formasaun família mós segue regra klaru: kaben-naʼin ba mane iha idade 22, no ba feto iha idade 23, ho maksimu oan tolu ba família ida.

Vizita estudu ne’e fó komprensaun kle’an kona-ba natureza multidimensionál husi dezenvolvimentu nasionál. Progresu, avansu, no susesu Xina iha sustentabilidade média nasionál no internasionál, no mós kresimentu ekonómiku modernu, iha ninia raiz iha lideransa polítika ho vizaun, lei no regulamentu forte, investimentu estratéjiku iha infraestrutura, inovasaun teknolójiku kontínuu, polítika sosiál inklusivu, no preservasaun identidade kulturál.

Durante vizita estudu ne’e, área foku sira hanesan komunikasaun digital, polítika públika, modernizasaun infraestrutura, inovasaun teknolójiku, intelijénsia artifisiál, no bem-estar sosiál. Ha’u observa katak Xina sai ezemplu importante ba transformasaun no inovasaun nasionál ne’ebé integradu, inklusivu, no sustentável. Esperiénsia iha Xina hatudu katak dezenvolvimentu sustentável presiza lideransa polítika ho vizaun klaru, forte, no konsistente, planeamentu integradu no koordenadu,  instituisaun públika no privadu ne’ebé kapás atu asegura implementasaun efetivu.

Governu kontinua investe iha dezenvolvimentu komunikasaun, intelijénsia artifisial digitalizasaun, modernizasaun infraestrutura ne’ebe fó suporta ba kresimentu ekonómiku no hadi’a kualidade moris liu-liu liu husi parke urbanu, sistema transporte públiku, fasilidade asesível ba ema ho defisiénsia, no servisu digitál públiku.

Nasaun foun ne’e bele hahu uza teknolojia dijitál no inovasaun sira hodi monitoriza no salvaguarda estrutura patrimóniu sira husi estragu, nune’e bele hatudu katak teknolojia no pasadu bele la’o hamutuk, nune’e sidade sira sai sentru ekonómiku, no fatin ne’ebé rai metin memória koletiva nasaun nian.

Timor-Leste nu’udar nasaun ne’ebé foin dezenvolve an, komunikasaun sosial seidauk forte ho dezenvolvimentu rural no urbanu sustentável labele separa husi nia istória no identidade nasionál. Protesaun ba eransa kultural no knua tradisionál sira tenke sai nu’udar pilar prinsipál, nune’e mudansa no dezenvolvimentu ne’ebé la’o ba oin bele lori benefísiu, moris di’ak, no kontinuidade ba jerasaun agora no aban bainrua.