Eventu Dili Internasional Marathon ! PR Horta Deklara “TL Iha Kapasidade Organiza Eventu Boot”

Imajem : Eventu Dili Internasionál Marathon 2026. Foto : Daniel da Silva

‎‎Sapnews Pro, Dili : Presidénsia Repúblika realiza eventu Dili Internasional Marathon 2026 ba dala X ho tema “Hadomi Ita-Nia Ai-Laran & Ita-Nia Balada Fuik Sira”, eventu boot ne’e partisipa hodi atleta nasionál no internasional sira hamutuk rihun ida atus sia.

‎‎Dili International Marathon (DIM) iha edisaun ba dala 10 ho tema “Hadomi ita-nia ai-laran no ita-nia balada fuik sira.” hodi inspira públiku katak proteje biodiversidade país nian, prezerva tasi, no promove estilu moris saudável la’ós de’it devér governu nian, maibé responsabilidade koletiva ida ne’ebé esensiál ba saúde, moris-di’ak no futuru sidadaun Timoroan hotu-hotu nian.

Presidente Republika Jose Ramos Horta informa, eventu ne’e Timor-oan barak partisipa, ema estranjeiru, media internasional sira no reprezentante ida husi Federasaun Mundiál ba Atletizmu Ázia nian husi Qatar.

‎‎”Ho kontente tebes bele partisipa eventu ne’e, liu husi maratona ida ne’e bele hatudu ba Mundu Atletizmu katak Timor-Leste mós iha kapasidade organiza eventu boot, la’os ba desportu de’it maibé ita mós halo promosaun ba turizmu”. Dehan Xefe Estadu José Ramos Horta iha Palásiu Presidente Aitarak-Laran, 08/07/2026.

‎‎Horta sublinha, eventu maratona tenke tuir regra internasionál la’os ema hotu bele organiza, “nune’e ita bele dada ema tékniku internasionál sira hodi halo kontrolu mai iha ita-nia rai tanba ita-nia maratona tama ona iha kalendariu mundiál rekoñese ona mundu Atletizmu”.

‎‎”Dili Internasionál Maratona ne’e dedika ba protesaun ba ita-nia ai-laran, labele tesi ai arbiru liuliu tempu bailoron ne’e labele sunu arbiru tanba ita lakon floresta lakon mós bee-matan sira sei maran”.

‎‎Ramos Horta mós solisita komunidade hotu hodi labele oho balada fuik sira liliu laku iha ai-laran no proteze sira-nia vida tanba laku-teen bele lori ba merkadu liu hosi kafé.

‎‎”Husu mós labele oho balada fuik arbiru hanesan laku, tanba sei hamosu fali kafé laku-teen ho presu ne’ebé aas liu iha Hongkon 1kg dólar 500 resin, ho ida ne’e husu ba ita hotu keta oho animal fuik arbiru, husik sira moris iha ai-laran, uluk kakatua barak maibé agora lakon dadaun ona tanba ne’e nafatin hadomi rai laran, ai-laran no balada fuik sira hotu”.

‎‎Xefe estadu ne’e hatutan, “ita halo maratona no programa sira seluk desportu nian ne’e hanesan ezersisiu ida ba sosiedade tomak hodi la’o, sira ne’ebé idade 40 anos ba leten tenke la’o 30 Minutu ba leten, ba joven sira bele halo desportu oioin”.

‎‎‎‎Vensedora feto, Wang Jiali hosi China sente kontente partisipa iha eventu ne’e no sai vensedor ho distánsia 42 Kilometru no haree kultura diferente hosi Timor-Leste.

‎‎”Kompetisaun ida ne’e diak tebtebes, ha’u haree diferente tebes, ida ne’e la difisil, ha’u haree katak Timor-Leste nia ema sira sempre luta atu manan no forte tebes”.

‎‎Atleta Zhang Bangliu ne’ebe representa China partisipa iha eventu ne’e sente alegria no fo agradese ba Timor-Leste tanba organiza diak tebes eventu internasional ne’e ho diak no susesu.

‎‎”Ha’u kontente tebes bele hetan konvite hosi Timor-Leste, ha’u orgullu bele sai kampiaun, eventu maratona ida ne’e iha pozisaun ne’ebe diak liu no organizador sira organiza diak tebes, ha’u espera bele mai fali dala ida tan iha futuru”. Sublinha Zhang Bangliu

‎‎Vensedor timoroan, Felisberto de Deus fo agradese ba inisitiva Presidente Repúblika José Ramos Horta ne’ebe realiza eventu maratona internasionál hodi halibur atleta nasionál no internasionál sira.

‎‎”Agradese ba Prezidente Repúblika tanba bele inisia eventu ne’e, eventu ida ne’e bele promove ita nia rai doben Timor-leste ba mundu liu-husi desportu. ‎‎Desportu laos ita kompete atu manam maibe oinsa mak partisipa ita bele hetan saúde di’ak nafatin no prepara ba ita-nia future”. Nia agradese

Enkuantu, DIM 2026 hetan partisipasaun hosi atleta internasjonal, no nasional sira hamutuk 1.900, eventu ne’e anima tebes komunidade no promove Timor-Leste ba mundu liu hosi desportu.