SAPNews Despede Estajiáriu Hosi UNITAL & GFD, Mundu Jornalizmu Espasu Dejafiante

Imajem : Ezekutivu SAPNewsTL hamutuk ho Estajiáriu hosi UNITAL no Grace for Development (GFD) iha Fatuhada, 15/8/2026.

‎SAPNewsTL, Dili – Midia Sa’ani Asamana Prazer News Timor-Leste (SAPNewsTL) realiza serimónia despedia no fahe sertifikado ba estajiáriu 11, husi Universidade Oriental Timor Lorosa’e (UNITAL) no Grace for Development (GFD), ne’ebé durante fulan rua hala’o estajio no aprende prátika imprensa hakerek no television broadcasting iha SAPNews.

Diretór SAPNewsTL, Sérgio Alves da Costa, hateten programa estajiu ne’e krusial tebes hodi estimula estudante sira konkretiza koñesimentu teóriku ba prátika iha mundu jornalizmu tanba espasu ne’e presiza responsivu, dejafiante, loyal, honestu no sakrifísiu.
‎
‎“Estudante sira husi UNITAL no GFD ne’ebé partisipa iha programa ne’e aprende kona-ba programasaun, televizaun, no prosesu hakerek notísia. Koñesimentu ne’e importante atu sira bele kompriende realidade no dezafiu sira iha mundu jornalizmu, espeasu ida ne’e difisil, dejafiante, responsivu, loyalidade no onestidade.” Hateten Diretór SAPNewsTL, Sérgio Alves da Costa iha Fatuhada,15/08/2026
‎
‎Nia argumenta, ‎“Teoria ne’ebé imi aprende durante tinan tolu presiza hetan prátika, atu bele konkretiza koñesimentu no kompriende realidade iha sosiedade no servisu jornalizmu.”
‎
‎“Husi inísiu ha’u dehan katak sira sei hasoru dezafiu, maibé ne’e mak oportunidade atu aprende, hakat ba oin no koñese mundu jornalizmu iha faze oioin.”
‎
Sérgio fo sasin,‎“Uluk ha’u rasik la estuda jornalizmu, maibé hamutuk ho kolega sira ami aprende no aprende lorloron, leitura beibeik no akompaña notisia nasionál no internasionál, hafoin tuir formasaun no kapasitasaun barak, ikus mai hatudu katak la iha buat ida impossível ba ita, se ita iha vontade atu koko no prontu atu halo. Importante mak firme ho desizaun, prontu halo sakrifísiu no kontinua aprende, tanba ida-ne’e parte husi prosesu natural iha mundu jornalizmu.”

Dosente Orientadora, Lídia Correia da Cruz, hato’o apresiasaun ba oportunidade ne’ebé SAPNewsTL fornese ba estudante sira hosi UNITAL.
‎
‎“Hasoru malu ida-ne’e fó priviléjiu ba ha’u, tanba primeiru tama iha SAPNewsTL. Ha’u kontente haree joven sira hamutuk no aprende ba malu no hari’i media ho kapasidade no responsabilidade to’o ohin loron tanba media bele sai ponte ida atu lori Timor-Leste ba mundu.” Nia Salienta.
‎
‎Lídia mós konsidera SAPNewsTL hanesan espasu ida ne’ebé fó oportunidade ba estudante sira atu fahe esperiénsia no aprende hamutuk.
‎
‎“Ami agradese ba SAPNewsTL tanba simu estudante sira. Iha jovem ne’ebé estudante no balun finalista, maibé sira bele halibur malu, servisu hamutuk no fahe esperiénsia ho joven sira seluk.”
‎
‎“Karik iha hahalok balun ne’ebé la di’ak, hanesan inan ka irmã ida, ha’u husu deskulpa ba Presidente SAPNewsTL no estrutura tomak. Estudante sira mai ho koñesimentu teóriku, maibé prátika sei menus, tanba ne’e sira mai aprende liután iha SAPNewsTL.”
‎
‎Representante estaziadu UNITAL, Evalino de Andrade, hato’o agradesementu ba SAPNewsTL tanba fó oportunidade ba estudante sira atu hala’o estajiu no aprende prátika iha mundu media.
‎
‎“Ami hato’o agradese ba Prezidente no estrutura tomak SAPNews-TL ne’ebe fó oportunidade ba ami atu aprende no kompriende liután kona-ba saida mak ami aprende durante estajiu, ida ne’e bele sai baze ba ami nia futuru.” Dehan Evalino de Andrade
‎
‎Nia mós husu deskulpa ba lideransa no estrutura SAPNewsTL, karik durante hala’o atividade estajiu iha sala ka halo asaun ne’ebé kontra regra interna.
‎
‎“Karik iha ami nia estazio ne’e, ami halo sala ruma durante atividade, ami husu deskulpa ba Diretór no estrutura SAPNewsTL tomak. Ami agradese ba ekipa ne’ebé akompaña ami durante prosesu estajiu” Nia hatutan.
‎
Representante estaziada GFD, Yanti Ede Fransilda Salus, hato’o “deskulpa, agradese no obrigadu”, hanesan forma apresiasaun ida ba oportunidade ne’ebé SAPNewsTL oferese.
‎
‎“Durante prosesu estajiu, ami mós halo sala balun, maibé ami aprende katak sala mak parte husi prosesu atu hadia an. Ami agradese tebes ba SAPNewsTL tanba oportunidade ida-ne’e ajuda ami atu hetan esperiénsia no konfiansa atu enfrenta servisu iha futuru.” Dehan Yanti.
‎
‎Nia dehan,‎“Maski iha difikuldade no sala balun, ekipa SAPNewsTL kontinua buka dalan atu orienta ami, nune’e ami bele kontinua prosesu aprendizajen to’o remata ho di’ak.”Nia esplika.

‎Programa estajiu ne’e sai hanesan oportunidade ba estudante sira atu aumenta esperiénsia prátika, dezenvolve kapasidade no kompriende prosesu servisu iha indústria media no jornalizmu.
‎
‎Entretantu, aktividade ne’e partisipa husi Prezidente SAPNewsTL hamutuk ho estrutura media, dosente orientadora husi UNITAL, estajiáriu UNITAL hamutuk na’in neen (6) no estajiáriu husi GFD nain lima (5).

SAPNews kontinua loke odamatan ba joven timoroan sira ne’ebe iha potensialidade, kapasidade no kursu komunikasaun sosial atu bele halo estajiu profisionál iha SAPNews hamutuk ho jornalista joventude sira.
‎