Tiru Silvano To’o La Konsege Salva Nia Vida ! Família Hatudu Maturidade & Husu Justisa Ba Nia Oan
Imajem : Edital
SAPNewsTL,Dili – Relativamente ho kazu oknum membru PNTL ne’ebe tiru joven mane ida iha postu administrativu Uatucarbau, munisípiu Viqueque iha 15 Agusto 2026, vítima hakotu ona iis no família autoriza autópsia hodi asegura evidénsia ba prosesu investigasaun no justisa.
Familia Vitima Elizario da Silva hateten Silvano Games lakon vida tanba hetan tiru,nune’e autoriza halo autópsia hodi asegura evidénsia ba prosesu investigasaun.
“Ha’u mak foti desizaun no autoriza autópsia, tanba presiza iha evidénsia ba prosesu ne’ebé bele lori ba tribunal.”Dehan Familia Vitima Elizario da silva ba jornalista sira iha hospital HNGV Dili 17/08/2026
Nia hatutan, família la hatene kronolojia kompletu kona-ba insidente ne’e, inklui razaun tanba saida vítima hetan tiru. Tanba ne’e, família husu autoridade sira atu investigasaun ho rigorozu hodi determina faktu no ema ne’ebé responsavel.
“Ha’u la hatene kazu ne’e tamba saida mak tiru. Investigasaun mak tenki hatudu kronolojia no razaun akontesimentu ne’e. Tanba ne’e, ami família husu autoridade sira atu investiga ho rigor hodi determina faktu.” Nia husu.
Elizario mós husu atu prosesa suspeitu tuir lei no konsidera la fo sala ba instituisaun PNTL tanba krime ne’e individu mak komete.
“Oknum ida no instituisaun ida buat ketak. Se ema ida sala, tenki ema ne’e mak responde tuir lei. Tribunal mak deside, se mak sala no se mak loos.” Nia afirma.
Kona-ba autópsia, Elizario esplika, família hein autorizasaun husi Ministériu Públiku, tanba autópsia presiza bazeia ba prosedimentu legal no evidénsia ne’ebé bele uza iha prosesu.
Nia relata, vítima hetan tratamentu ho diak iha ospitál, no doutór sira halo esforsu máximu atu salva nia vida. Tuir informasaun ne’ebé nia simu husi doutór, vítima hetan kanek grave tanba tiru tama husi kotuk no borus to’o kabun.
“Ha’u rona husi doutór katak tiru tama husi kotuk no sai iha sorin. Ten bo’ot iha kuak tolu no ten ki’ik iha kuak haat. Doutór sira halo ona operasaun, maibé nia kondisaun grave no ikusmai mate. Agora ami husu de’it prosesu tuir lei.” Nia esplika
Elizario mós husu Governu no PNTL atu aumenta formasaun ba membru sira, atu evita akontesimentu hanesan ne’e no garante membru sira komprende didi’ak sira-nia responsabilidade.
“Ha’u rekomenda ba Governu atu fó formasaun didi’ak ba PNTL, tanba membru barak iha hanoin no atitude diferente. Ema ida nia sala la bele tau todan ba PNTL tomak.” nia afirma.
Elizario husu públiku no media atu la halo konkluzaun antes prosesu legal remata, tanba informasaun ne’ebé seidauk konfirma bele hamosu interpretasaun no reasaun husi komunidade.
Entretantu Vítima Silvano Games ne’ebe hetan tiru husi Oknum PNTL MG lakon vida ho idade 30 anos, no husik Hela oan nain rua(2).
Kazu tiru kanek ne’e mosu iha oras dadersan 08:30, loron 15 fulan Agustu tinan 2026, iha Suku Irabin de Baixo, postu Uatukatbau. Hafoin akontesimentu familia lori kedas ba sentru saúde hodi halo tratamentu urgente ba vítima refere maibe infelizmente la konsege salva nia vida.
