SEJD Atribui Orsamentu Apresiasaun Ba Atleta Espesial Olimpiku Nain-8
Imajen Atribuisaun Orsamentu ba atleta espesial olimpiku nain ualu ne’ebe kompete iha Abu Dabhi
(SAP News TL) DILI- Sekretariu Estadu Juventude Desportu (SEJD) entrega ona orsamentu apresiasaun ba atleta espesial olimpiku nain ualu ne’ebe hetan medalla sanulu iha kompetisaun espesial olimpiku ne’ebe realiza iha sidade Abu Dabhi, United Emirad Arab iha 2019.
“Ohin governu fo apresiasaun ba ita nia atleta espesial olimpiku nain ualu ne’ebe partisipa kompetisaun espesial olimpiku iha Abu Dabhi iha 2019, tuir lolos prosesu ne’e ita hala’o ona maibe tanba kovid-19 entaun ohin mak ami mai atribui premiu ba ita nia atleta sira ne’ebe hetan medalla iha eventu refere”, dehan Diretora Alta Kompetisaun Maria Luisa Monteiro ba jornalista sira iha Kafetaria Letefoho Marconi, Dili Sexta (02/12)
Diretora akresenta, total orsamentu ne’ebe mak governu apoiu ba atleta sira hamutuk 12,000 USD fahe tuir ba kategoria medalla ne’ebe sira hetan medalla osan mean lima, mutin tolu no osan metan rua no atleta nain ualu mak kompete ona iha Abu Dhabi mak sira kompete iha modalidade rua mak atletizmu Oscar Alexandrinho C.dos Reis hetan Medalla osan mean rua simu orsamentu 3,000.00 USD, Amavel Da Costa Silva medalla osan mean ida no mutin ida simu orsamentu 2,500 USD, Norberta da Cruz hetan medalla osan mean ida simu orsamentu 1,500 USD, Carmelita de C, dos Santa Fe hetan medalla mean ida simu orsamentu 1,000 USD Felizarda Marcal Da Costa hetan medalla osan mutin ida simu orsamentu 1,000 USD no Mateus Brite Guterres hetan medalla osan mutin ida simu orsamentu 750 USD no modalidade Bocce hanesan Lisandra Aurelia Sarmento hetan medalla osan mutin ida ho 1,000 USD no Basilio Dinis hetan medalla osan mutin simu $750.00.
Iha fatin hanesan Prezidente Spesial Olimpiku Timor Leste (SOTL) Maria Domingas Fernandes Alves hatete, ohin governu bele rekonese no atribui premiu ba atleta espesial olimpiku ne’ebe kompete iha Abu Dhabi tinan 2019 fiar katak sira sei utiliza osan ne’e ho diak.
“Depois de tinan tolu tanba situasaun covid-19 finalmente ohin ita nia governu nia sensibilidade tebes bele ona atribui premiu apresiasaun ba atleta nain ualu ne’ebe kompete kompetisaun espesial olimpiku iha Abu Dhabi tinan 2019 ne’ebe atleta feto no mane ami fiar katak sira bele utiliza osan ne’e ho diak tanba ita nia governu bele fo duni rekoñsimentu ba ema sira ne’e maske sira situasaun espesial ho defisiensia intelektual maibe sira mos bele hasa’e no valoriza Timor-Leste nia naran iha nivel mundial”, tenik Maria Domingas
Iha sorin seluk Atleta Oscar Alexandrinho C.dos Reis dehan, sente kontente hetan medalla osan mean ne’ebe ohin simu premiu husi governu
“Ha’u sente kontente bainhira partisipa iha eventu ne’e hodi hetan medalla osan mean no ohin simu premiu husi ita nia governu, ha’u sei prepara an diak liu hodi partisipa nafatin iha eventu tuir mai”, dehan Oscar
Reportajen: Augusto dos Santos