Kazu Assassíniu Iha Elemloi, Familia Matebean Rezeita Deklarasaun Francisco & Xefe Kaza Militar Husu Perdaun

SAPNewsTL, Dili: Liu husi Komunikadu Imprensa Kuarta-Feira orseik, Familia Matebian Isac Sinarai sei lori Francisco da Silva ba dalan justisa tanba fo deklarasaun la los ba publiku ne’ebe la tuir situasaun mak akontese iha terenu.
“Depois ha’u rona deklarasaun Francisco da Silva iha Palasiu Prezidente, ha’u hein hela advogadu atu lori nia ba iha parte justisa nian tanba odamatan justisa nian nakloke ba ita hotu tanba nu’udar aman ha’u sente laran moras ba deklarasaun ne’e tanba la fo informasaun tuir problema ne’ebe akontese iha terenu”, dehan aman matebian Florentino Da Costa Sinarai ba jornalista sira iha Delta 4, Dili kuarta (11/01/2023)
Florentino hatutan, nia hakarak husu klarifikasaun katak nia oan ne’e ba treinu ho se, iha ranting ne’ebe no rai ida ne’ebe mak sira hadau malu to’o ohin loron nia oan lakon nia vida no agora seidauk hatene katak se mak sai asisnatu ba matebian ne’e.

Nia informa, husu fali ba Francisco da Silva atu dada fali nia deklarasaun ida ne’e tanba deklarasaun ne’ebe deklara la relevante ho kondisaun oan. nia mos konvida kolega sira husi arte marsiais no arte rituais sira ne’ebe Fransisco Da Silva temi momos iha ninia deklarasaun ne’e hodi fo informasaun klaru ba publiku hotu.

Iha fatin hanesan sekretariu Jeral IKS (Ikatan Kera sakti) Samuel Guterres hatete, sira kontra deklarasaun Maijor Francisco da Silva ne’ebe deklara probelma Elemloi mosu tanba matebian treinu uluk Kera Sakti mak muda fali ba Sete Sete no sira konsidera Francisco da Silva fo sai informasaun sedu liu tanba rezultadu investigasaun seidauk iha.

“Ami husi lideransa maximu organizasaun Arte marsiais kera sakti hamutuk ho familia Isac Sinarai da costa hakarak hato’o ami nia deklarasaun kontra husi “chefe casa militar” Maijor Francisco da Silva ne’ebe deklara ba publika iha loron 10 fulan janeiru 2023 liu husi media televisaun no media sosiais katak kauza husi kazu Elemloi ne’ebe hakotu Isac Sinarai Da Costa nia vida tanba matebian uluk treinu tiha Kera Sakti depois mak ba fali arte ritual Sete Sete maka problema mosu iha Elemloi, Estetmentu ne’ebe fo sai husi Maijor Fransisco da Silva prematura ou sedu liu tanba resultadu husi rezultadu husi kazu investigasaun seidauk iha maibe Francisco da Silva fo sai ona rezultadu mai ami” tenik Samuel

Entretantu, Xefe Kaza Militar Francisco da silva hato’o ona deskulpa ba familia matebean Isac Sinarai da Costa no Organizasaun IKS Kera Sakti Timor Leste no Sete Sete tanba nu’udar ema nia mos iha frakeza, nune’e nia husu perdaun ba familia vitima no organizasaun sira

Enkuantu, Matebean Isac Sinarai da Costa mate hafoin hetan sona husi pessoa ignoradu ne’ebe resulta Isac lakon nia vida tanba hetan sona iha oin no kotuk. relasiona ho kazu ne’e Polisia Nasioal Timor Leste asegura ona ema nain lima no buka tuir hela autor assasinatu iha Elemloi

Jornalista: Aquelina Magalhaes & Ermelinda Soares