Dezenvolve Edukasaun Fizika Iha TL, SEJD : Japaun Apoia Péritus Voluntáriu 7

SAPNewsTL, Dili: Sekretariu Estadu Juventude no Desportu (SEJD) hasoru embaixador Japaun iha Timor-Leste, objetivu husi sorumutu ne’e katak embaixada Japaun sei lori nia ema voluntariu nain hitu atu dezenvole edukasaun fizika iha ensinu baziku no universidade iha Timor-Leste (TL).

“Ohin loron ha’u mai iha SEJD ho objetivu atu hala’o kortejia vizita sua exselensia sekretariu estadu hodi fahe opiniaun oinsa atu dezenvolve ami nia kooperasaun ba area desportu no juventude, tinan ida ami sei haruka ami nia ema voluntariu nain hitu liu husi Japan Overseas Corporation Volunteer (JOCV) atu mai Timor-Leste iha fulan Marsu hodi aloka sira ba eskola sira iha nivel ensinu baziku no universidade hodi dezenvolve edukasaun fizika iha Timor-Leste”, dehan Embaixador Japaun ba Timor-Leste Tetsuya Kimura ba jornalista sira iha edifisiu SEJD Lecidere, Dili kuarta, (18/01/2023).

Embaixador Japaun hatutan, nia fahe mos ninia experensia ba SEJD nu’udar diretor jeral iha ajensia ba servisu desportu iha Japaun iha tinan 2015-2017 ne’ebe fahe hanoin mos ho SEJD kona ba lalaok desportu nian liuliu desportu nia papel oinsa halo ema respeita malu liu husi pratika desportu

Iha sorumutu ne’e mos parte rua halo diskusaun klean oinsa dezenvolve area oi-oin iha juventude nian, sira halo mos diskusaun ba jinastika Taiso iha Japaun ne’ebe iha fulan marsu vise

Entretantu, Nia informa prezidente ba jinastika Taiso sei mai vizita Timor-Leste oinsa sira promove sira nia jinastika ne’e ba sidadaun sira husi Labarik to’o idozu sira, sira hakarak fahe mos experiensia kona ba arte kombate ne’ebe iha Timor-Leste eziste mos arte marsial husi Japaun maka Karate, Judo, Aikido no Shorinji Kempo ne’ebe liu husi arte sira ne’e sira promove sidadaun hotu hakruk ba Lei.

Iha fatin hanesan SEJD Abrão Saldanha hatete, ohin hasoru malu ho embaixador Japaun hakarak explora desportu iha Timor-Leste hanesan diplomasia entre Japaun ho Timor-Leste.

“Ohin hasoru malu ho embaixador Japaun ne’ebe foin mai Timor-Leste vizita kortejia mai iha SEJD, antes ne’e nia sai diretor jeral ba ajensia desportu iha Japaun ne’ebe hakarak explora desportu hanesan diplomasia entre Japaun ho Timor-Leste entaun ami diskute esperensia sira nian atu fahe ba Timor-Leste liuliu iha atividade edukasaun fizika no desportu”, tenik Abrão

Sekretariu Estadu informa, tinan ida ne’e sei haruka voluntariu nain hitu mai Timor-Leste ba area edukasaun fizika no desportu ba ensinu baziku no universidade hodi promove atividade fizika ba eskola publiku, privadu no universidade sira iha departamentu desportu no sira mos explora oituan sira nia experensia jere desportu kombate liuliu iha modalidade arte marsial ne’ebe sira uluk dezkontroladu ne’eba sira konsege kontrola ho diak tebes agora sai ba modalidade desportu iha olimpiku, pratika arte marsial ne’e atu moris laos oho malu, sira mos sei tau matan sira nia arte marsial ne’ebe pratika Timor-Leste Karate, Judo, Shorinji Kempo no Aikido ne’ebe sira lori experiensia dezenvolve ba federasaun, asosiasaun no klube sira iha Timor-Leste.

Abrão aumenta tan, sira mos sei explora jinastika ne’ebe sira iha experiensia oinsa halo populasaun ativu liu husi jinastika Taiso iha Japaun ne’ebe sira publika liu husi radiu, televizaun, komunidade, eskola ne’ebe halo populasaun sai saudavel, sira intregra ba dezenvolvimentu umanu ne’ebe sira hakarak fahe ba Timor-Leste ne’ebe SEJD fo bemvindu ba sira bele explora area desportu no juventude hamutuk ho embaixador Japaun iha Timor-Leste.

Reportajen: Augusto dos Santos